Luke 21:5 Cross References - WestSaxon990

⁵ & þa cwæð he to þam þe sædon be þam temple. þt hit wære geglenged mid gödum stänum & godum gifum.

¹ & þa se hælend ut-eode of þam temple. him tö-genealæhton hys leorning-cnihtas. þt hi him ætywdon þæs temples getimbrunge. ² þa &swarode he him & cwæð; Ge-seoþ ge eall þis. Soð ic secge eow. ne bið her læfed stan uppan stane þe ne beo to-worpen; ³ Ða he sæt uppan oliuetes dune þa comun hys leorningcnihtas dihlice & cwædon; Sege us hwænne þas ðing gewurþun. & hwilc tacn si þines to-cymys & worulde ge-endunge; ⁴ Ða &swarode he him & cwæð. warniað þt eow nan ne beswice; ⁵ Manega cumaþ on minum naman & cweðaþ; Ic eom crist. & beswicaþ manega; ⁶ Witodlice ge gehyrað gefeoht & gefeohta hlisan. warnigeað þt ge ne beon gedrefede; Ðas þing sceolun gewurþan. ac nys þonne gyt se ende; ⁷ Þeod winð ongen þeode & rice ongen rice. & mann-cwealmas beoð & hungras wide geond land & eorþan styrunga ⁸ ealle þas þing synt þæra sara anginnu; ⁹ Ðonne syllað hi eow on gedrefednysse. & ofsleað eow & ealle menn eow hatigeað for minum naman ¹⁰ & þonne beoð manega unge-trywsode & belæwað betwyx him & hatigað him be-twynan; ¹¹ & manega lease witegan cumað & beswicað manega. ¹² & forþam þe unryhtwisnys rixað manegra lufu acolaþ; ¹³ Witodlice seþe þurhwunað oð ende se byþ hal; ¹⁴ & þis godspel byþ bodod ofer ealle eorþan on gewittnysse eallum þeodum & þonne cymð seo ge-endung; ¹⁵ Ðonne ge ge-seoð þa onsceonunge þære toworpennysse þe se witega. gecwæð daniel. þa he stod on haligre stowe. ongyte seðe hit ræt; ¹⁶ Fleon þonne to muntum þa þe on iudea lande synt. ¹⁷ & seþe ys uppan hys huse ne gä he nyþyr þt he ænig þing on his huse fecce ¹⁸ & seþe is on æcyre. ne cyrre he þt he hys tunecan nyme; ¹⁹ Wä eacniendum & fedendum on þam dagum. ²⁰ biddað þt eower fleam on wintra oððe on reste-dæge ne gewurþe; ²¹ Witodlice þonne byð swa mycel gedeorf swa næs of middan-geardes fruman oþ þis; Ne nü ne ge-wurð; ²² & buton þa dagas gescyrte wærun. nære nan mann hal gewordyn; Ac for þam ge-corenum þe he geceas þa dagas beoð gescyrte; ²³ Ðonne gyf eow hwa segð nu crist ys her oþþe ðær. ne gelyfe ge him; ²⁴ Þonne cumað lease cristas & lease witegan. & doð mycle tacn & fore-beacn þt ðä beoþ on ge-dwolan gelædde gyf hyt beon mæg þe ge-corene wærun; ²⁵ Witodlice ic hyt eow fore-sæde; ²⁶ Gyf hig eow secgeað her he ys on westene ne fare ge üt. gyf hig secgeað her he is on þurh-ferun ne ge-lyfe ge; ²⁷ Wito[d]lice swa swa lïgyt færð fram est-dæle & æt-ywð oþ west-dæl. swa byð mannes suna to-cyme; ²⁸ Swa hwær swa hold byþ þæder beoð earnas gegaderude; ²⁹ Sona æfter þæra daga ge-drefydnesse seo sunne byð for-sworcen & se mona hys leoht ne sylð & steorran feallaþ of þære heofenan. & þære heofenan mægenu beoþ astyrede. ³⁰ & þonne æt-ywð mannes suna tacn on heofonan. & þonne wepað ealle eorþan mægþa. & geseoð mannes sunu cumende on heofonan genipod. mid myclum mægene & mægenþrymme. ³¹ & he asent hys englas mid byman & mycelre stefne. & hï ge-gaderigað hys gecorenan. of feower middan-eardes endum of heofona heahnyssum oð hyra gemæru; ³² Leornigeað big-spell be þam fic-treowwe þonne hys twig byþ hnesce & leaf acennede. ge witun þt sumor ys gehende ³³ & wite ge swa þonne ge þas þing geseoð þt he ys on durum gehende; ³⁴ Soð ic secge eow þt ðeos cneorys ne gewit ærþam þe ealle þas þing gewurðon; ³⁵ Heofone & eorþe gewitað. witodlice mine word ne gewitað; ³⁶ Nat nan mann be þam dæge ne be þære tide ne furðun englas buton fæder äna; ³⁷ Witodlice swa swa on nöes dagum wæs. swa byð mannes suna tocyme. ³⁸ swa hi wærun on þam dagum ær þam flode. etende & drincynde & wifigende & gyfta syllende. oð þone dæg þe nöe on þa earce eode. ³⁹ & hi nysðon ær þt flod com & nam hig ealle. swa byð mannes suna töcyme; ⁴⁰ Ðonne beoð twegen on æcyre. än byð genumen & oðer byþ læfyd. ⁴¹ Twa beoð æt cwyrne grindende. än byð genumen & oðer byþ læfed; Twegen beoþ on bedde. än byð ge-numen & oþer byð læfed; ⁴² [Note: Ðys godspel sceal to mænies confessores mæsse-dæge. ] Wacigeað [Note: The capital W is written as Ð. ] witodlice forþam þe ge nyton on hwylcyre tide eower hlaford cuman wyle; ⁴³ Witað þt gyf se hiredes ealdor wiste on hwylcere tide se þeof töwerd wære. witodlice he wolde wacigean & nolde geþafigen þt man hys hus under-dulfe; ⁴⁴ & for-þam beo gë gearwe. forþam ðe mannes sunnu (sic) wyle cuman on þære tide þe ge nyton; ⁴⁵ Wens þu (sic) hwa sy getrywe & gleaw þeow. þone geset hys hlafurd ofer his hired. þt he him on tide mete sylle; ⁴⁶ Eadi ys se þeow þe hys hlafurd hyne gemët þus dondne þonne he cymð; ⁴⁷ Soþ ic eow secge þt ofer eall þt he ah he hyne gesett; ⁴⁸ Gyf se yfela þeowa ðencþ on hys heortan & cwyþ. min hlafurd uferað hys cyme. ⁴⁹ & agynð beatan hys efen-þeowas. & yt & drincþ mid druncenum. ⁵⁰ þonne cymþ ðæs weles hlaford on þam dæge ðe he nä ne wenþ & on ðære tide þe he nat. ⁵¹ & todælþ hyne & asett hys dæl mid liccetterum. þær byþ wop & toþa gristbitung;

¹ Ða he of þam temple eode þa cwæð än of his leorning-cnihtum to him. lareow loca hwylce stanas her synt & hwylce getimbrunga þisses temples; ² Þa cwæð se hælend. ne ge-seoge ealle þas mycelan getimbrunga. ne bið her læfed stan ofer stan þe ne beo toworpen; ³ Þa hi sæton on oliuetes düne ongen þt tempel synderlice hine petrus & iacobus. & iohannes. & andreas. ahsodon; ⁴ Sege us hwænne þas þing ge-wurdon & hwylc tacen bið þænne ealle þas ðing onginnað beon ge-endud; ⁵ Þa ongan se hælend him &swarigende to cweðan; Warniað þt eow nan mann ne be-swice; ⁶ Soþlice manega cumað on minum naman. & cweþað. ic eom crist & beswicað manega ⁷ & þonne ge gehyrað gefeohtu. & gefeohta hlisan. ne ondræde ge eow. hit gebyrað þt hit gebelimpe. ac þonne gyt nis ende; ⁸ Soðlice þeod arist ägën þeode. & rice ongën rice & beoð eorþan styrunga geond stowa & hungor. þis synd sara angin; ⁹ Warniað eow sylfe. hi syllað eow on geþeahte & swingað on gesamnungum. & ge standað beforan demum & cyningum. for minum naman him on ge-witnesse ¹⁰ & on ealle þeoda; Ærest ge-byrað beon þt godspel gebodud. ¹¹ & þonne hi syllende eow læþað ne fore-smeage ge hwæt ge specan. ac specað þt eow on þære tide ge-seald bið; Ne synd ge na specende ac se halga gast; ¹² Soðlice se broðor þone broþor to deaðe sylð. & se fæder his sunu. & þa bearn arisað agën hyra magas. & mid deaðe hi ge-wæceað. ¹³ & ge beoð eallum on hatunge for minum naman; Soðlice se bið hal se þe oð ende þurh-wunað; ¹⁴ Ðonne ge ge-seoð þære toworpednysse asceonunge standan þar heo ne sceal. þonne ongyte se þe ræt. fleon þonne on muntas þa ðe synt on iudea ¹⁵ & se ðe is ofer þëcene ne stige he on his hüs ne he in ne ga þt he aht on his huse nime. ¹⁶ & se ðe bið on æcere ne cyrre he ongean þt he his reaf nime; ¹⁷ Wä cenne[n]dum on þam dagum. ¹⁸ biddað þt ðis on wintra ne ge-wurðe; ¹⁹ Soþlice on þam dagum beoð swylce gedrefednessa. swylce ne ge-wurdon. of frymmðe þære gesceafte þe god gesceop. oð nu. ne na ne gewurþað. ²⁰ And gif drihten þas dagas ne gescyrte. nan flæsc ne wurde hal. ac for þam gecorenum þe he ge-ceas he ge-scyrte þa dagas; ²¹ And gif eow hwylc segð witodlice her is crist. witodlice þær he is. ne gelyfe ge; ²² Soðlice lease cristas. & lease witegan arisað. & wyrcað fore-beacnu. to beswicanne eac gif hit beon mæg þa ge-corenan; ²³ Warniað eow. nu ealle þing. þe ic eow fore-sæde. ²⁴ ac on þam dagum æfter þære geswencednysse. bið sunne aþeostrod. & se mona his beorhtnesse ne sylð ²⁵ & heofones steorran beoð feallende. & beoð astyrode þa megenu þe on heofonum synt; ²⁶ Ðonne geseoð hi mannes sunu cumendne on ge-nipum mid mycelum mægene & wuldre; ²⁷ þonne sent he his englas & hi gaderiað his gecorenan of feower windum of eorþan heanesse oþ heofones heahnesse; ²⁸ Leorniað an bigspell be þam fic-treowe. þonne his twi bið mearu. & leaf beoð acennede. ge witon þt sumor is gehende. ²⁹ & wite ge þonne ge þas ðing geseoð þt he is dura gehende; ³⁰ Soðlice ic eow secge þt þeos cneores ne gewit ærþam ealle þas ðing gewurðon. ³¹ heofon & eorðe gewitað. witodlice mine word ne ge-witað; ³² Be þam dæge & þære tide nan mann nat. ne englas on heofone ne mannes sunu buton fæder äna; ³³ Warniað & waciað & gebiddaþ eow. ge nyton hwænne seo tid ys; ³⁴ Swa se man ælþeodilice ferde forlet his hus & sealde his þeowum þæne anwald gehwylces weorces. & beode þam dure-wearde þt he wacige; ³⁵ Eornostlice wacigeað ge nyton hwænne þæs huses hlaford cymð; þe on æfen þe on midre nihte. þe on hancrede. þe on mergen. ³⁶ þe læs he eow slapende gemëte þonne he færinga cymð; ³⁷ Soðlice þt ic eow secge eallum ic hit secge waciað.

²⁰ Ða iudeas cwædon to him. þis tempel wæs getimbrod on six & feowertigon wïntron & ä-rærst þü hit on þrym dagon;