Proverbs 28:2 Cross References - HOT

² בפשׁע ארץ רבים שׂריה ובאדם מבין ידע כן יאריך׃

Genesis 45:5-8

⁵ ועתה אל תעצבו ואל יחר בעיניכם כי מכרתם אתי הנה כי למחיה שׁלחני אלהים לפניכם׃⁶ כי זה שׁנתים הרעב בקרב הארץ ועוד חמשׁ שׁנים אשׁר אין חרישׁ וקציר׃⁷ וישׁלחני אלהים לפניכם לשׂום לכם שׁארית בארץ ולהחיות לכם לפליטה גדלה׃⁸ ועתה לא אתם שׁלחתם אתי הנה כי האלהים וישׂימני לאב לפרעה ולאדון לכל ביתו ומשׁל בכל ארץ מצרים׃

1 Kings 15:25

²⁵ ונדב בן ירבעם מלך על ישׂראל בשׁנת שׁתים לאסא מלך יהודה וימלך על ישׂראל שׁנתים׃

1 Kings 15:28

²⁸ וימתהו בעשׁא בשׁנת שׁלשׁ לאסא מלך יהודה וימלך תחתיו׃

1 Kings 16:8-29

⁸ בשׁנת עשׂרים ושׁשׁ שׁנה לאסא מלך יהודה מלך אלה בן בעשׁא על ישׂראל בתרצה שׁנתים׃⁹ ויקשׁר עליו עבדו זמרי שׂר מחצית הרכב והוא בתרצה שׁתה שׁכור בית ארצא אשׁר על הבית בתרצה׃¹⁰ ויבא זמרי ויכהו וימיתהו בשׁנת עשׂרים ושׁבע לאסא מלך יהודה וימלך תחתיו׃¹¹ ויהי במלכו כשׁבתו על כסאו הכה את כל בית בעשׁא לא השׁאיר לו משׁתין בקיר וגאליו ורעהו׃¹² וישׁמד זמרי את כל בית בעשׁא כדבר יהוה אשׁר דבר אל בעשׁא ביד יהוא הנביא׃¹³ אל כל חטאות בעשׁא וחטאות אלה בנו אשׁר חטאו ואשׁר החטיאו את ישׂראל להכעיס את יהוה אלהי ישׂראל בהבליהם׃¹⁴ ויתר דברי אלה וכל אשׁר עשׂה הלוא הם כתובים על ספר דברי הימים למלכי ישׂראל׃¹⁵ בשׁנת עשׂרים ושׁבע שׁנה לאסא מלך יהודה מלך זמרי שׁבעת ימים בתרצה והעם חנים על גבתון אשׁר לפלשׁתים׃¹⁶ וישׁמע העם החנים לאמר קשׁר זמרי וגם הכה את המלך וימלכו כל ישׂראל את עמרי שׂר צבא על ישׂראל ביום ההוא במחנה׃¹⁷ ויעלה עמרי וכל ישׂראל עמו מגבתון ויצרו על תרצה׃¹⁸ ויהי כראות זמרי כי נלכדה העיר ויבא אל ארמון בית המלך וישׂרף עליו את בית מלך באשׁ וימת׃¹⁹ על חטאתו אשׁר חטא לעשׂות הרע בעיני יהוה ללכת בדרך ירבעם ובחטאתו אשׁר עשׂה להחטיא את ישׂראל׃²⁰ ויתר דברי זמרי וקשׁרו אשׁר קשׁר הלא הם כתובים על ספר דברי הימים למלכי ישׂראל׃²¹ אז יחלק העם ישׂראל לחצי חצי העם היה אחרי תבני בן גינת להמליכו והחצי אחרי עמרי׃²² ויחזק העם אשׁר אחרי עמרי את העם אשׁר אחרי תבני בן גינת וימת תבני וימלך עמרי׃²³ בשׁנת שׁלשׁים ואחת שׁנה לאסא מלך יהודה מלך עמרי על ישׂראל שׁתים עשׂרה שׁנה בתרצה מלך שׁשׁ שׁנים׃²⁴ ויקן את ההר שׁמרון מאת שׁמר בככרים כסף ויבן את ההר ויקרא את שׁם העיר אשׁר בנה על שׁם שׁמר אדני ההר שׁמרון׃²⁵ ויעשׂה עמרי הרע בעיני יהוה וירע מכל אשׁר לפניו׃²⁶ וילך בכל דרך ירבעם בן נבט ובחטאתיו אשׁר החטיא את ישׂראל להכעיס את יהוה אלהי ישׂראל בהבליהם׃²⁷ ויתר דברי עמרי אשׁר עשׂה וגבורתו אשׁר עשׂה הלא הם כתובים על ספר דברי הימים למלכי ישׂראל׃²⁸ וישׁכב עמרי עם אבתיו ויקבר בשׁמרון וימלך אחאב בנו תחתיו׃²⁹ ואחאב בן עמרי מלך על ישׂראל בשׁנת שׁלשׁים ושׁמנה שׁנה לאסא מלך יהודה וימלך אחאב בן עמרי על ישׂראל בשׁמרון עשׂרים ושׁתים שׁנה׃

2 Kings 15:8-31

⁸ בשׁנת שׁלשׁים ושׁמנה שׁנה לעזריהו מלך יהודה מלך זכריהו בן ירבעם על ישׂראל בשׁמרון שׁשׁה חדשׁים׃⁹ ויעשׂ הרע בעיני יהוה כאשׁר עשׂו אבתיו לא סר מחטאות ירבעם בן נבט אשׁר החטיא את ישׂראל׃¹⁰ ויקשׁר עליו שׁלם בן יבשׁ ויכהו קבל עם וימיתהו וימלך תחתיו׃¹¹ ויתר דברי זכריה הנם כתובים על ספר דברי הימים למלכי ישׂראל׃¹² הוא דבר יהוה אשׁר דבר אל יהוא לאמר בני רביעים ישׁבו לך על כסא ישׂראל ויהי כן׃¹³ שׁלום בן יבישׁ מלך בשׁנת שׁלשׁים ותשׁע שׁנה לעזיה מלך יהודה וימלך ירח ימים בשׁמרון׃¹⁴ ויעל מנחם בן גדי מתרצה ויבא שׁמרון ויך את שׁלום בן יבישׁ בשׁמרון וימיתהו וימלך תחתיו׃¹⁵ ויתר דברי שׁלום וקשׁרו אשׁר קשׁר הנם כתבים על ספר דברי הימים למלכי ישׂראל׃¹⁶ אז יכה מנחם את תפסח ואת כל אשׁר בה ואת גבוליה מתרצה כי לא פתח ויך את כל ההרותיה בקע׃¹⁷ בשׁנת שׁלשׁים ותשׁע שׁנה לעזריה מלך יהודה מלך מנחם בן גדי על ישׂראל עשׂר שׁנים בשׁמרון׃¹⁸ ויעשׂ הרע בעיני יהוה לא סר מעל חטאות ירבעם בן נבט אשׁר החטיא את ישׂראל כל ימיו׃¹⁹ בא פול מלך אשׁור על הארץ ויתן מנחם לפול אלף ככר כסף להיות ידיו אתו להחזיק הממלכה בידו׃²⁰ ויצא מנחם את הכסף על ישׂראל על כל גבורי החיל לתת למלך אשׁור חמשׁים שׁקלים כסף לאישׁ אחד וישׁב מלך אשׁור ולא עמד שׁם בארץ׃²¹ ויתר דברי מנחם וכל אשׁר עשׂה הלוא הם כתובים על ספר דברי הימים למלכי ישׂראל׃²² וישׁכב מנחם עם אבתיו וימלך פקחיה בנו תחתיו׃²³ בשׁנת חמשׁים שׁנה לעזריה מלך יהודה מלך פקחיה בן מנחם על ישׂראל בשׁמרון שׁנתים׃²⁴ ויעשׂ הרע בעיני יהוה לא סר מחטאות ירבעם בן נבט אשׁר החטיא את ישׂראל׃²⁵ ויקשׁר עליו פקח בן רמליהו שׁלישׁו ויכהו בשׁמרון בארמון בית מלך את ארגב ואת האריה ועמו חמשׁים אישׁ מבני גלעדים וימיתהו וימלך תחתיו׃²⁶ ויתר דברי פקחיה וכל אשׁר עשׂה הנם כתובים על ספר דברי הימים למלכי ישׂראל׃²⁷ בשׁנת חמשׁים ושׁתים שׁנה לעזריה מלך יהודה מלך פקח בן רמליהו על ישׂראל בשׁמרון עשׂרים שׁנה׃²⁸ ויעשׂ הרע בעיני יהוה לא סר מן חטאות ירבעם בן נבט אשׁר החטיא את ישׂראל׃²⁹ בימי פקח מלך ישׂראל בא תגלת פלאסר מלך אשׁור ויקח את עיון ואת אבל בית מעכה ואת ינוח ואת קדשׁ ואת חצור ואת הגלעד ואת הגלילה כל ארץ נפתלי ויגלם אשׁורה׃³⁰ ויקשׁר קשׁר הושׁע בן אלה על פקח בן רמליהו ויכהו וימיתהו וימלך תחתיו בשׁנת עשׂרים ליותם בן עזיה׃³¹ ויתר דברי פקח וכל אשׁר עשׂה הנם כתובים על ספר דברי הימים למלכי ישׂראל׃

2 Chronicles 32:20-26

²⁰ ויתפלל יחזקיהו המלך וישׁעיהו בן אמוץ הנביא על זאת ויזעקו השׁמים׃²¹ וישׁלח יהוה מלאך ויכחד כל גבור חיל ונגיד ושׂר במחנה מלך אשׁור וישׁב בבשׁת פנים לארצו ויבא בית אלהיו ומיציאו מעיו שׁם הפילהו בחרב׃²² ויושׁע יהוה את יחזקיהו ואת ישׁבי ירושׁלם מיד סנחריב מלך אשׁור ומיד כל וינהלם מסביב׃²³ ורבים מביאים מנחה ליהוה לירושׁלם ומגדנות ליחזקיהו מלך יהודה וינשׂא לעיני כל הגוים מאחרי כן׃²⁴ בימים ההם חלה יחזקיהו עד למות ויתפלל אל יהוה ויאמר לו ומופת נתן׃²⁵ ולא כגמל עליו השׁיב יחזקיהו כי גבה לבו ויהי עליו קצף ועל יהודה וירושׁלם׃²⁶ ויכנע יחזקיהו בגבה לבו הוא וישׁבי ירושׁלם ולא בא עליהם קצף יהוה בימי יחזקיהו׃

2 Chronicles 36:1-12

¹ ויקחו עם הארץ את יהואחז בן יאשׁיהו וימליכהו תחת אביו בירושׁלם׃² בן שׁלושׁ ועשׂרים שׁנה יואחז במלכו ושׁלשׁה חדשׁים מלך בירושׁלם׃³ ויסירהו מלך מצרים בירושׁלם ויענשׁ את הארץ מאה ככר כסף וככר זהב׃⁴ וימלך מלך מצרים את אליקים אחיו על יהודה וירושׁלם ויסב את שׁמו יהויקים ואת יואחז אחיו לקח נכו ויביאהו מצרימה׃⁵ בן עשׂרים וחמשׁ שׁנה יהויקים במלכו ואחת עשׂרה שׁנה מלך בירושׁלם ויעשׂ הרע בעיני יהוה אלהיו׃⁶ עליו עלה נבוכדנאצר מלך בבל ויאסרהו בנחשׁתים להליכו בבלה׃⁷ ומכלי בית יהוה הביא נבוכדנאצר לבבל ויתנם בהיכלו בבבל׃⁸ ויתר דברי יהויקים ותעבתיו אשׁר עשׂה והנמצא עליו הנם כתובים על ספר מלכי ישׂראל ויהודה וימלך יהויכין בנו תחתיו׃⁹ בן שׁמונה שׁנים יהויכין במלכו ושׁלשׁה חדשׁים ועשׂרת ימים מלך בירושׁלם ויעשׂ הרע בעיני יהוה׃¹⁰ ולתשׁובת השׁנה שׁלח המלך נבוכדנאצר ויבאהו בבלה עם כלי חמדת בית יהוה וימלך את צדקיהו אחיו על יהודה וירושׁלם׃¹¹ בן עשׂרים ואחת שׁנה צדקיהו במלכו ואחת עשׂרה שׁנה מלך בירושׁלם׃¹² ויעשׂ הרע בעיני יהוה אלהיו לא נכנע מלפני ירמיהו הנביא מפי יהוה׃

Job 22:28-30

²⁸ ותגזר אומר ויקם לך ועל דרכיך נגה אור׃²⁹ כי השׁפילו ותאמר גוה ושׁח עינים יושׁע׃³⁰ ימלט אי נקי ונמלט בבר כפיך׃

Ecclesiastes 9:15

¹⁵ ומצא בה אישׁ מסכן חכם ומלט הוא את העיר בחכמתו ואדם לא זכר את האישׁ המסכן ההוא׃

Isaiah 3:1-7

¹ כי הנה האדון יהוה צבאות מסיר מירושׁלם ומיהודה משׁען ומשׁענה כל משׁען לחם וכל משׁען מים׃² גבור ואישׁ מלחמה שׁופט ונביא וקסם וזקן׃³ שׂר חמשׁים ונשׂוא פנים ויועץ וחכם חרשׁים ונבון לחשׁ׃⁴ ונתתי נערים שׂריהם ותעלולים ימשׁלו׃⁵ ונגשׂ העם אישׁ באישׁ ואישׁ ברעהו ירהבו הנער בזקן והנקלה בנכבד׃⁶ כי יתפשׂ אישׁ באחיו בית אביו שׂמלה לכה קצין תהיה לנו והמכשׁלה הזאת תחת ידך׃⁷ ישׂא ביום ההוא לאמר לא אהיה חבשׁ ובביתי אין לחם ואין שׂמלה לא תשׂימני קצין עם׃