Proverbs 21:27 Cross References - HOT

27 זבח רשׁעים תועבה אף כי בזמה יביאנו׃

1 Samuel 13:12-13

12 ואמר עתה ירדו פלשׁתים אלי הגלגל ופני יהוה לא חליתי ואתאפק ואעלה העלה׃13 ויאמר שׁמואל אל שׁאול נסכלת לא שׁמרת את מצות יהוה אלהיך אשׁר צוך כי עתה הכין יהוה את ממלכתך אל ישׂראל עד עולם׃

1 Samuel 15:21-23

21 ויקח העם מהשׁלל צאן ובקר ראשׁית החרם לזבח ליהוה אלהיך בגלגל׃22 ויאמר שׁמואל החפץ ליהוה בעלות וזבחים כשׁמע בקול יהוה הנה שׁמע מזבח טוב להקשׁיב מחלב אילים׃23 כי חטאת קסם מרי ואון ותרפים הפצר יען מאסת את דבר יהוה וימאסך ממלך׃

Psalms 50:8-13

8 לא על זבחיך אוכיחך ועולתיך לנגדי תמיד׃9 לא אקח מביתך פר ממכלאתיך עתודים׃10 כי לי כל חיתו יער בהמות בהררי אלף׃11 ידעתי כל עוף הרים וזיז שׂדי עמדי׃12 אם ארעב לא אמר לך כי לי תבל ומלאה׃13 האוכל בשׂר אבירים ודם עתודים אשׁתה׃

Proverbs 15:8

8 זבח רשׁעים תועבת יהוה ותפלת ישׁרים רצונו׃

Proverbs 28:9

9 מסיר אזנו משׁמע תורה גם תפלתו תועבה׃

Isaiah 1:11-16

11 למה לי רב זבחיכם יאמר יהוה שׂבעתי עלות אילים וחלב מריאים ודם פרים וכבשׂים ועתודים לא חפצתי׃12 כי תבאו לראות פני מי בקשׁ זאת מידכם רמס חצרי׃13 לא תוסיפו הביא מנחת שׁוא קטרת תועבה היא לי חדשׁ ושׁבת קרא מקרא לא אוכל און ועצרה׃14 חדשׁיכם ומועדיכם שׂנאה נפשׁי היו עלי לטרח נלאיתי נשׂא׃15 ובפרשׂכם כפיכם אעלים עיני מכם גם כי תרבו תפלה אינני שׁמע ידיכם דמים מלאו׃16 רחצו הזכו הסירו רע מעלליכם מנגד עיני חדלו הרע׃

Isaiah 66:3

3 שׁוחט השׁור מכה אישׁ זובח השׂה ערף כלב מעלה מנחה דם חזיר מזכיר לבנה מברך און גם המה בחרו בדרכיהם ובשׁקוציהם נפשׁם חפצה׃

Jeremiah 6:20

20 למה זה לי לבונה משׁבא תבוא וקנה הטוב מארץ מרחק עלותיכם לא לרצון וזבחיכם לא ערבו׃

Jeremiah 7:11-12

11 המערת פרצים היה הבית הזה אשׁר נקרא שׁמי עליו בעיניכם גם אנכי הנה ראיתי נאם יהוה׃12 כי לכו נא אל מקומי אשׁר בשׁילו אשׁר שׁכנתי שׁמי שׁם בראשׁונה וראו את אשׁר עשׂיתי לו מפני רעת עמי ישׂראל׃

Amos 5:21-22

21 שׂנאתי מאסתי חגיכם ולא אריח בעצרתיכם׃22 כי אם תעלו לי עלות ומנחתיכם לא ארצה ושׁלם מריאיכם לא אביט׃

Cross Reference data is from OpenBible.info, retrieved June 28, 2010, and licensed under a Creative Commons Attribution License.