Nehemiah 7:6 Cross References - HOT

⁶ אלה בני המדינה העלים משׁבי הגולה אשׁר הגלה נבוכדנצר מלך בבל וישׁובו לירושׁלם וליהודה אישׁ לעירו׃

¹⁴ והגלה את כל ירושׁלם ואת כל השׂרים ואת כל גבורי החיל עשׂרה אלפים גולה וכל החרשׁ והמסגר לא נשׁאר זולת דלת עם הארץ׃¹⁵ ויגל את יהויכין בבלה ואת אם המלך ואת נשׁי המלך ואת סריסיו ואת אולי הארץ הוליך גולה מירושׁלם בבלה׃¹⁶ ואת כל אנשׁי החיל שׁבעת אלפים והחרשׁ והמסגר אלף הכל גבורים עשׂי מלחמה ויביאם מלך בבל גולה בבלה׃

¹¹ ואת יתר העם הנשׁארים בעיר ואת הנפלים אשׁר נפלו על המלך בבל ואת יתר ההמון הגלה נבוזראדן רב טבחים׃

¹ ויקחו עם הארץ את יהואחז בן יאשׁיהו וימליכהו תחת אביו בירושׁלם׃² בן שׁלושׁ ועשׂרים שׁנה יואחז במלכו ושׁלשׁה חדשׁים מלך בירושׁלם׃³ ויסירהו מלך מצרים בירושׁלם ויענשׁ את הארץ מאה ככר כסף וככר זהב׃⁴ וימלך מלך מצרים את אליקים אחיו על יהודה וירושׁלם ויסב את שׁמו יהויקים ואת יואחז אחיו לקח נכו ויביאהו מצרימה׃⁵ בן עשׂרים וחמשׁ שׁנה יהויקים במלכו ואחת עשׂרה שׁנה מלך בירושׁלם ויעשׂ הרע בעיני יהוה אלהיו׃⁶ עליו עלה נבוכדנאצר מלך בבל ויאסרהו בנחשׁתים להליכו בבלה׃⁷ ומכלי בית יהוה הביא נבוכדנאצר לבבל ויתנם בהיכלו בבבל׃⁸ ויתר דברי יהויקים ותעבתיו אשׁר עשׂה והנמצא עליו הנם כתובים על ספר מלכי ישׂראל ויהודה וימלך יהויכין בנו תחתיו׃⁹ בן שׁמונה שׁנים יהויכין במלכו ושׁלשׁה חדשׁים ועשׂרת ימים מלך בירושׁלם ויעשׂ הרע בעיני יהוה׃¹⁰ ולתשׁובת השׁנה שׁלח המלך נבוכדנאצר ויבאהו בבלה עם כלי חמדת בית יהוה וימלך את צדקיהו אחיו על יהודה וירושׁלם׃¹¹ בן עשׂרים ואחת שׁנה צדקיהו במלכו ואחת עשׂרה שׁנה מלך בירושׁלם׃¹² ויעשׂ הרע בעיני יהוה אלהיו לא נכנע מלפני ירמיהו הנביא מפי יהוה׃¹³ וגם במלך נבוכדנאצר מרד אשׁר השׁביעו באלהים ויקשׁ את ערפו ויאמץ את לבבו משׁוב אל יהוה אלהי ישׂראל׃¹⁴ גם כל שׂרי הכהנים והעם הרבו למעול מעל ככל תעבות הגוים ויטמאו את בית יהוה אשׁר הקדישׁ בירושׁלם׃¹⁵ וישׁלח יהוה אלהי אבותיהם עליהם ביד מלאכיו השׁכם ושׁלוח כי חמל על עמו ועל מעונו׃¹⁶ ויהיו מלעבים במלאכי האלהים ובוזים דבריו ומתעתעים בנבאיו עד עלות חמת יהוה בעמו עד לאין מרפא׃¹⁷ ויעל עליהם את מלך כשׂדיים ויהרג בחוריהם בחרב בבית מקדשׁם ולא חמל על בחור ובתולה זקן וישׁשׁ הכל נתן בידו׃¹⁸ וכל כלי בית האלהים הגדלים והקטנים ואצרות בית יהוה ואצרות המלך ושׂריו הכל הביא בבל׃¹⁹ וישׂרפו את בית האלהים וינתצו את חומת ירושׁלם וכל ארמנותיה שׂרפו באשׁ וכל כלי מחמדיה להשׁחית׃²⁰ ויגל השׁארית מן החרב אל בבל ויהיו לו ולבניו לעבדים עד מלך מלכות פרס׃²¹ למלאות דבר יהוה בפי ירמיהו עד רצתה הארץ את שׁבתותיה כל ימי השׁמה שׁבתה למלאות שׁבעים שׁנה׃²² ובשׁנת אחת לכורשׁ מלך פרס לכלות דבר יהוה בפי ירמיהו העיר יהוה את רוח כורשׁ מלך פרס ויעבר קול בכל מלכותו וגם במכתב לאמר׃²³ כה אמר כורשׁ מלך פרס כל ממלכות הארץ נתן לי יהוה אלהי השׁמים והוא פקד עלי לבנות לו בית בירושׁלם אשׁר ביהודה מי בכם מכל עמו יהוה אלהיו עמו ויעל׃

¹ ואלה בני המדינה העלים משׁבי הגולה אשׁר הגלה נבוכדנצור מלך בבל לבבל וישׁובו לירושׁלם ויהודה אישׁ לעירו׃² אשׁר באו עם זרבבל ישׁוע נחמיה שׂריה רעליה מרדכי בלשׁן מספר בגוי רחום בענה מספר אנשׁי עם ישׂראל׃³ בני פרעשׁ אלפים מאה שׁבעים ושׁנים׃⁴ בני שׁפטיה שׁלשׁ מאות שׁבעים ושׁנים׃⁵ בני ארח שׁבע מאות חמשׁה ושׁבעים׃⁶ בני פחת מואב לבני ישׁוע יואב אלפים שׁמנה מאות ושׁנים עשׂר׃⁷ בני עילם אלף מאתים חמשׁים וארבעה׃⁸ בני זתוא תשׁע מאות וארבעים וחמשׁה׃⁹ בני זכי שׁבע מאות ושׁשׁים׃¹⁰ בני בני שׁשׁ מאות ארבעים ושׁנים׃¹¹ בני בבי שׁשׁ מאות עשׂרים ושׁלשׁה׃¹² בני עזגד אלף מאתים עשׂרים ושׁנים׃¹³ בני אדניקם שׁשׁ מאות שׁשׁים ושׁשׁה׃¹⁴ בני בגוי אלפים חמשׁים ושׁשׁה׃¹⁵ בני עדין ארבע מאות חמשׁים וארבעה׃¹⁶ בני אטר ליחזקיה תשׁעים ושׁמנה׃¹⁷ בני בצי שׁלשׁ מאות עשׂרים ושׁלשׁה׃¹⁸ בני יורה מאה ושׁנים עשׂר׃¹⁹ בני חשׁם מאתים עשׂרים ושׁלשׁה׃²⁰ בני גבר תשׁעים וחמשׁה׃²¹ בני בית לחם מאה עשׂרים ושׁלשׁה׃²² אנשׁי נטפה חמשׁים ושׁשׁה׃²³ אנשׁי ענתות מאה עשׂרים ושׁמנה׃²⁴ בני עזמות ארבעים ושׁנים׃²⁵ בני קרית ערים כפירה ובארות שׁבע מאות וארבעים ושׁלשׁה׃²⁶ בני הרמה וגבע שׁשׁ מאות עשׂרים ואחד׃²⁷ אנשׁי מכמס מאה עשׂרים ושׁנים׃²⁸ אנשׁי בית אל והעי מאתים עשׂרים ושׁלשׁה׃²⁹ בני נבו חמשׁים ושׁנים׃³⁰ בני מגבישׁ מאה חמשׁים ושׁשׁה׃³¹ בני עילם אחר אלף מאתים חמשׁים וארבעה׃³² בני חרם שׁלשׁ מאות ועשׂרים׃³³ בני לד חדיד ואונו שׁבע מאות עשׂרים וחמשׁה׃³⁴ בני ירחו שׁלשׁ מאות ארבעים וחמשׁה׃³⁵ בני סנאה שׁלשׁת אלפים ושׁשׁ מאות ושׁלשׁים׃³⁶ הכהנים בני ידעיה לבית ישׁוע תשׁע מאות שׁבעים ושׁלשׁה׃³⁷ בני אמר אלף חמשׁים ושׁנים׃³⁸ בני פשׁחור אלף מאתים ארבעים ושׁבעה׃³⁹ בני חרם אלף ושׁבעה עשׂר׃⁴⁰ הלוים בני ישׁוע וקדמיאל לבני הודויה שׁבעים וארבעה׃⁴¹ המשׁררים בני אסף מאה עשׂרים ושׁמנה׃⁴² בני השׁערים בני שׁלום בני אטר בני טלמון בני עקוב בני חטיטא בני שׁבי הכל מאה שׁלשׁים ותשׁעה׃⁴³ הנתינים בני ציחא בני חשׂופא בני טבעות׃⁴⁴ בני קרס בני סיעהא בני פדון׃⁴⁵ בני לבנה בני חגבה בני עקוב׃⁴⁶ בני חגב בני שׁמלי בני חנן׃⁴⁷ בני גדל בני גחר בני ראיה׃⁴⁸ בני רצין בני נקודא בני גזם׃⁴⁹ בני עזא בני פסח בני בסי׃⁵⁰ בני אסנה בני מעינים בני נפיסים׃⁵¹ בני בקבוק בני חקופא בני חרחור׃⁵² בני בצלות בני מחידא בני חרשׁא׃⁵³ בני ברקוס בני סיסרא בני תמח׃⁵⁴ בני נציח בני חטיפא׃⁵⁵ בני עבדי שׁלמה בני סטי בני הספרת בני פרודא׃⁵⁶ בני יעלה בני דרקון בני גדל׃⁵⁷ בני שׁפטיה בני חטיל בני פכרת הצביים בני אמי׃⁵⁸ כל הנתינים ובני עבדי שׁלמה שׁלשׁ מאות תשׁעים ושׁנים׃⁵⁹ ואלה העלים מתל מלח תל חרשׁא כרוב אדן אמר ולא יכלו להגיד בית אבותם וזרעם אם מישׂראל הם׃⁶⁰ בני דליה בני טוביה בני נקודא שׁשׁ מאות חמשׁים ושׁנים׃⁶¹ ומבני הכהנים בני חביה בני הקוץ בני ברזלי אשׁר לקח מבנות ברזלי הגלעדי אשׁה ויקרא על שׁמם׃⁶² אלה בקשׁו כתבם המתיחשׂים ולא נמצאו ויגאלו מן הכהנה׃⁶³ ויאמר התרשׁתא להם אשׁר לא יאכלו מקדשׁ הקדשׁים עד עמד כהן לאורים ולתמים׃⁶⁴ כל הקהל כאחד ארבע רבוא אלפים שׁלשׁ מאות שׁשׁים׃⁶⁵ מלבד עבדיהם ואמהתיהם אלה שׁבעת אלפים שׁלשׁ מאות שׁלשׁים ושׁבעה ולהם משׁררים ומשׁררות מאתים׃⁶⁶ סוסיהם שׁבע מאות שׁלשׁים ושׁשׁה פרדיהם מאתים ארבעים וחמשׁה׃⁶⁷ גמליהם ארבע מאות שׁלשׁים וחמשׁה חמרים שׁשׁת אלפים שׁבע מאות ועשׂרים׃⁶⁸ ומראשׁי האבות בבואם לבית יהוה אשׁר בירושׁלם התנדבו לבית האלהים להעמידו על מכונו׃⁶⁹ ככחם נתנו לאוצר המלאכה זהב דרכמונים שׁשׁ רבאות ואלף וכסף מנים חמשׁת אלפים וכתנת כהנים מאה׃⁷⁰ וישׁבו הכהנים והלוים ומן העם והמשׁררים והשׁוערים והנתינים בעריהם וכל ישׂראל בעריהם׃

⁸ ידיע להוא למלכא די אזלנא ליהוד מדינתא לבית אלהא רבא והוא מתבנא אבן גלל ואע מתשׂם בכתליא ועבידתא דך אספרנא מתעבדא ומצלח בידהם׃

² והשׁתכח באחמתא בבירתא די במדי מדינתה מגלה חדה וכן כתיב בגוה דכרונה׃

¹ בשׁנה התשׁעית לצדקיהו מלך יהודה בחדשׁ העשׂרי בא נבוכדראצר מלך בבל וכל חילו אל ירושׁלם ויצרו עליה׃² בעשׁתי עשׂרה שׁנה לצדקיהו בחדשׁ הרביעי בתשׁעה לחדשׁ הבקעה העיר׃³ ויבאו כל שׂרי מלך בבל וישׁבו בשׁער התוך נרגל שׂר אצר סמגר נבו שׂר סכים רב סריס נרגל שׂר אצר רב מג וכל שׁארית שׂרי מלך בבל׃⁴ ויהי כאשׁר ראם צדקיהו מלך יהודה וכל אנשׁי המלחמה ויברחו ויצאו לילה מן העיר דרך גן המלך בשׁער בין החמתים ויצא דרך הערבה׃⁵ וירדפו חיל כשׂדים אחריהם וישׂגו את צדקיהו בערבות ירחו ויקחו אתו ויעלהו אל נבוכדראצר מלך בבל רבלתה בארץ חמת וידבר אתו משׁפטים׃⁶ וישׁחט מלך בבל את בני צדקיהו ברבלה לעיניו ואת כל חרי יהודה שׁחט מלך בבל׃⁷ ואת עיני צדקיהו עור ויאסרהו בנחשׁתים לביא אתו בבלה׃⁸ ואת בית המלך ואת בית העם שׂרפו הכשׂדים באשׁ ואת חמות ירושׁלם נתצו׃⁹ ואת יתר העם הנשׁארים בעיר ואת הנפלים אשׁר נפלו עליו ואת יתר העם הנשׁארים הגלה נבוזר אדן רב טבחים בבל׃¹⁰ ומן העם הדלים אשׁר אין להם מאומה השׁאיר נבוזראדן רב טבחים בארץ יהודה ויתן להם כרמים ויגבים ביום ההוא׃¹¹ ויצו נבוכדראצר מלך בבל על ירמיהו ביד נבוזראדן רב טבחים לאמר׃¹² קחנו ועיניך שׂים עליו ואל תעשׂ לו מאומה רע כי אם כאשׁר ידבר אליך כן עשׂה עמו׃¹³ וישׁלח נבוזראדן רב טבחים ונבושׁזבן רב סריס ונרגל שׂר אצר רב מג וכל רבי מלך בבל׃¹⁴ וישׁלחו ויקחו את ירמיהו מחצר המטרה ויתנו אתו אל גדליהו בן אחיקם בן שׁפן להוצאהו אל הבית וישׁב בתוך העם׃¹⁵ ואל ירמיהו היה דבר יהוה בהיתו עצור בחצר המטרה לאמר׃¹⁶ הלוך ואמרת לעבד מלך הכושׁי לאמר כה אמר יהוה צבאות אלהי ישׂראל הנני מבי את דברי אל העיר הזאת לרעה ולא לטובה והיו לפניך ביום ההוא׃¹⁷ והצלתיך ביום ההוא נאם יהוה ולא תנתן ביד האנשׁים אשׁר אתה יגור מפניהם׃¹⁸ כי מלט אמלטך ובחרב לא תפל והיתה לך נפשׁך לשׁלל כי בטחת בי נאם יהוה׃

¹ בן עשׂרים ואחת שׁנה צדקיהו במלכו ואחת עשׂרה שׁנה מלך בירושׁלם ושׁם אמו חמיטל בת ירמיהו מלבנה׃² ויעשׂ הרע בעיני יהוה ככל אשׁר עשׂה יהויקים׃³ כי על אף יהוה היתה בירושׁלם ויהודה עד השׁליכו אותם מעל פניו וימרד צדקיהו במלך בבל׃⁴ ויהי בשׁנה התשׁעית למלכו בחדשׁ העשׂירי בעשׂור לחדשׁ בא נבוכדראצר מלך בבל הוא וכל חילו על ירושׁלם ויחנו עליה ויבנו עליה דיק סביב׃⁵ ותבא העיר במצור עד עשׁתי עשׂרה שׁנה למלך צדקיהו׃⁶ בחדשׁ הרביעי בתשׁעה לחדשׁ ויחזק הרעב בעיר ולא היה לחם לעם הארץ׃⁷ ותבקע העיר וכל אנשׁי המלחמה יברחו ויצאו מהעיר לילה דרך שׁער בין החמתים אשׁר על גן המלך וכשׂדים על העיר סביב וילכו דרך הערבה׃⁸ וירדפו חיל כשׂדים אחרי המלך וישׂיגו את צדקיהו בערבת ירחו וכל חילו נפצו מעליו׃⁹ ויתפשׂו את המלך ויעלו אתו אל מלך בבל רבלתה בארץ חמת וידבר אתו משׁפטים׃¹⁰ וישׁחט מלך בבל את בני צדקיהו לעיניו וגם את כל שׂרי יהודה שׁחט ברבלתה׃¹¹ ואת עיני צדקיהו עור ויאסרהו בנחשׁתים ויבאהו מלך בבל בבלה ויתנהו בבית הפקדת עד יום מותו׃¹² ובחדשׁ החמישׁי בעשׂור לחדשׁ היא שׁנת תשׁע עשׂרה שׁנה למלך נבוכדראצר מלך בבל בא נבוזראדן רב טבחים עמד לפני מלך בבל בירושׁלם׃¹³ וישׂרף את בית יהוה ואת בית המלך ואת כל בתי ירושׁלם ואת כל בית הגדול שׂרף באשׁ׃¹⁴ ואת כל חמות ירושׁלם סביב נתצו כל חיל כשׂדים אשׁר את רב טבחים׃¹⁵ ומדלות העם ואת יתר העם הנשׁארים בעיר ואת הנפלים אשׁר נפלו אל מלך בבל ואת יתר האמון הגלה נבוזראדן רב טבחים׃¹⁶ ומדלות הארץ השׁאיר נבוזראדן רב טבחים לכרמים וליגבים׃¹⁷ ואת עמודי הנחשׁת אשׁר לבית יהוה ואת המכנות ואת ים הנחשׁת אשׁר בבית יהוה שׁברו כשׂדים וישׂאו את כל נחשׁתם בבלה׃¹⁸ ואת הסרות ואת היעים ואת המזמרות ואת המזרקת ואת הכפות ואת כל כלי הנחשׁת אשׁר ישׁרתו בהם לקחו׃¹⁹ ואת הספים ואת המחתות ואת המזרקות ואת הסירות ואת המנרות ואת הכפות ואת המנקיות אשׁר זהב זהב ואשׁר כסף כסף לקח רב טבחים׃²⁰ העמודים שׁנים הים אחד והבקר שׁנים עשׂר נחשׁת אשׁר תחת המכנות אשׁר עשׂה המלך שׁלמה לבית יהוה לא היה משׁקל לנחשׁתם כל הכלים האלה׃²¹ והעמודים שׁמנה עשׂרה אמה קומה העמד האחד וחוט שׁתים עשׂרה אמה יסבנו ועביו ארבע אצבעות נבוב׃²² וכתרת עליו נחשׁת וקומת הכתרת האחת חמשׁ אמות ושׂבכה ורמונים על הכותרת סביב הכל נחשׁת וכאלה לעמוד השׁני ורמונים׃²³ ויהיו הרמנים תשׁעים ושׁשׁה רוחה כל הרמונים מאה על השׂבכה סביב׃²⁴ ויקח רב טבחים את שׂריה כהן הראשׁ ואת צפניה כהן המשׁנה ואת שׁלשׁת שׁמרי הסף׃²⁵ ומן העיר לקח סריס אחד אשׁר היה פקיד על אנשׁי המלחמה ושׁבעה אנשׁים מראי פני המלך אשׁר נמצאו בעיר ואת ספר שׂר הצבא המצבא את עם הארץ ושׁשׁים אישׁ מעם הארץ הנמצאים בתוך העיר׃²⁶ ויקח אותם נבוזראדן רב טבחים וילך אותם אל מלך בבל רבלתה׃²⁷ ויכה אותם מלך בבל וימתם ברבלה בארץ חמת ויגל יהודה מעל אדמתו׃²⁸ זה העם אשׁר הגלה נבוכדראצר בשׁנת שׁבע יהודים שׁלשׁת אלפים ועשׂרים ושׁלשׁה׃²⁹ בשׁנת שׁמונה עשׂרה לנבוכדראצר מירושׁלם נפשׁ שׁמנה מאות שׁלשׁים ושׁנים׃³⁰ בשׁנת שׁלשׁ ועשׂרים לנבוכדראצר הגלה נבוזראדן רב טבחים יהודים נפשׁ שׁבע מאות ארבעים וחמשׁה כל נפשׁ ארבעת אלפים ושׁשׁ מאות׃³¹ ויהי בשׁלשׁים ושׁבע שׁנה לגלות יהויכן מלך יהודה בשׁנים עשׂר חדשׁ בעשׂרים וחמשׁה לחדשׁ נשׂא אויל מרדך מלך בבל בשׁנת מלכתו את ראשׁ יהויכין מלך יהודה ויצא אותו מבית הכליא׃³² וידבר אתו טבות ויתן את כסאו ממעל לכסא מלכים אשׁר אתו בבבל׃³³ ושׁנה את בגדי כלאו ואכל לחם לפניו תמיד כל ימי חיו׃³⁴ וארחתו ארחת תמיד נתנה לו מאת מלך בבל דבר יום ביומו עד יום מותו כל ימי חייו׃