Exodus 36:1 Cross References - HOT

¹ ועשׂה בצלאל ואהליאב וכל אישׁ חכם לב אשׁר נתן יהוה חכמה ותבונה בהמה לדעת לעשׂת את כל מלאכת עבדת הקדשׁ לכל אשׁר צוה יהוה׃

Exodus 23:21-22

²¹ השׁמר מפניו ושׁמע בקלו אל תמר בו כי לא ישׂא לפשׁעכם כי שׁמי בקרבו׃²² כי אם שׁמוע תשׁמע בקלו ועשׂית כל אשׁר אדבר ואיבתי את איביך וצרתי את צרריך׃

Exodus 28:3

³ ואתה תדבר אל כל חכמי לב אשׁר מלאתיו רוח חכמה ועשׂו את בגדי אהרן לקדשׁו לכהנו׃

¹ וידבר יהוה אל משׁה לאמר׃² ראה קראתי בשׁם בצלאל בן אורי בן חור למטה יהודה׃³ ואמלא אתו רוח אלהים בחכמה ובתבונה ובדעת ובכל מלאכה׃⁴ לחשׁב מחשׁבת לעשׂות בזהב ובכסף ובנחשׁת׃⁵ ובחרשׁת אבן למלאת ובחרשׁת עץ לעשׂות בכל מלאכה׃⁶ ואני הנה נתתי אתו את אהליאב בן אחיסמך למטה דן ובלב כל חכם לב נתתי חכמה ועשׂו את כל אשׁר צויתך׃

Exodus 35:30-35

³⁰ ויאמר משׁה אל בני ישׂראל ראו קרא יהוה בשׁם בצלאל בן אורי בן חור למטה יהודה׃³¹ וימלא אתו רוח אלהים בחכמה בתבונה ובדעת ובכל מלאכה׃³² ולחשׁב מחשׁבת לעשׂת בזהב ובכסף ובנחשׁת׃³³ ובחרשׁת אבן למלאת ובחרשׁת עץ לעשׂות בכל מלאכת מחשׁבת׃³⁴ ולהורת נתן בלבו הוא ואהליאב בן אחיסמך למטה דן׃³⁵ מלא אתם חכמת לב לעשׂות כל מלאכת חרשׁ וחשׁב ורקם בתכלת ובארגמן בתולעת השׁני ובשׁשׁ וארג עשׂי כל מלאכה וחשׁבי מחשׁבת׃

Exodus 36:3-4

³ ויקחו מלפני משׁה את כל התרומה אשׁר הביאו בני ישׂראל למלאכת עבדת הקדשׁ לעשׂת אתה והם הביאו אליו עוד נדבה בבקר בבקר׃⁴ ויבאו כל החכמים העשׂים את כל מלאכת הקדשׁ אישׁ אישׁ ממלאכתו אשׁר המה עשׂים׃

Exodus 39:1-40:38

¹ ומן התכלת והארגמן ותולעת השׁני עשׂו בגדי שׂרד לשׁרת בקדשׁ ויעשׂו את בגדי הקדשׁ אשׁר לאהרן כאשׁר צוה יהוה את משׁה׃² ויעשׂ את האפד זהב תכלת וארגמן ותולעת שׁני ושׁשׁ משׁזר׃³ וירקעו את פחי הזהב וקצץ פתילם לעשׂות בתוך התכלת ובתוך הארגמן ובתוך תולעת השׁני ובתוך השׁשׁ מעשׂה חשׁב׃⁴ כתפת עשׂו לו חברת על שׁני קצוותו חבר׃⁵ וחשׁב אפדתו אשׁר עליו ממנו הוא כמעשׂהו זהב תכלת וארגמן ותולעת שׁני ושׁשׁ משׁזר כאשׁר צוה יהוה את משׁה׃⁶ ויעשׂו את אבני השׁהם מסבת משׁבצת זהב מפתחת פתוחי חותם על שׁמות בני ישׂראל׃⁷ וישׂם אתם על כתפת האפד אבני זכרון לבני ישׂראל כאשׁר צוה יהוה את משׁה׃⁸ ויעשׂ את החשׁן מעשׂה חשׁב כמעשׂה אפד זהב תכלת וארגמן ותולעת שׁני ושׁשׁ משׁזר׃⁹ רבוע היה כפול עשׂו את החשׁן זרת ארכו וזרת רחבו כפול׃¹⁰ וימלאו בו ארבעה טורי אבן טור אדם פטדה וברקת הטור האחד׃¹¹ והטור השׁני נפך ספיר ויהלם׃¹² והטור השׁלישׁי לשׁם שׁבו ואחלמה׃¹³ והטור הרביעי תרשׁישׁ שׁהם וישׁפה מוסבת משׁבצת זהב במלאתם׃¹⁴ והאבנים על שׁמת בני ישׂראל הנה שׁתים עשׂרה על שׁמתם פתוחי חתם אישׁ על שׁמו לשׁנים עשׂר שׁבט׃¹⁵ ויעשׂו על החשׁן שׁרשׁרת גבלת מעשׂה עבת זהב טהור׃¹⁶ ויעשׂו שׁתי משׁבצת זהב ושׁתי טבעת זהב ויתנו את שׁתי הטבעת על שׁני קצות החשׁן׃¹⁷ ויתנו שׁתי העבתת הזהב על שׁתי הטבעת על קצות החשׁן׃¹⁸ ואת שׁתי קצות שׁתי העבתת נתנו על שׁתי המשׁבצת ויתנם על כתפת האפד אל מול פניו׃¹⁹ ויעשׂו שׁתי טבעת זהב וישׂימו על שׁני קצות החשׁן על שׂפתו אשׁר אל עבר האפד ביתה׃²⁰ ויעשׂו שׁתי טבעת זהב ויתנם על שׁתי כתפת האפד מלמטה ממול פניו לעמת מחברתו ממעל לחשׁב האפד׃²¹ וירכסו את החשׁן מטבעתיו אל טבעת האפד בפתיל תכלת להית על חשׁב האפד ולא יזח החשׁן מעל האפד כאשׁר צוה יהוה את משׁה׃²² ויעשׂ את מעיל האפד מעשׂה ארג כליל תכלת׃²³ ופי המעיל בתוכו כפי תחרא שׂפה לפיו סביב לא יקרע׃²⁴ ויעשׂו על שׁולי המעיל רמוני תכלת וארגמן ותולעת שׁני משׁזר׃²⁵ ויעשׂו פעמני זהב טהור ויתנו את הפעמנים בתוך הרמנים על שׁולי המעיל סביב בתוך הרמנים׃²⁶ פעמן ורמן פעמן ורמן על שׁולי המעיל סביב לשׁרת כאשׁר צוה יהוה את משׁה׃²⁷ ויעשׂו את הכתנת שׁשׁ מעשׂה ארג לאהרן ולבניו׃²⁸ ואת המצנפת שׁשׁ ואת פארי המגבעת שׁשׁ ואת מכנסי הבד שׁשׁ משׁזר׃²⁹ ואת האבנט שׁשׁ משׁזר ותכלת וארגמן ותולעת שׁני מעשׂה רקם כאשׁר צוה יהוה את משׁה׃³⁰ ויעשׂו את ציץ נזר הקדשׁ זהב טהור ויכתבו עליו מכתב פתוחי חותם קדשׁ ליהוה׃³¹ ויתנו עליו פתיל תכלת לתת על המצנפת מלמעלה כאשׁר צוה יהוה את משׁה׃³² ותכל כל עבדת משׁכן אהל מועד ויעשׂו בני ישׂראל ככל אשׁר צוה יהוה את משׁה כן עשׂו׃³³ ויביאו את המשׁכן אל משׁה את האהל ואת כל כליו קרסיו קרשׁיו בריחו ועמדיו ואדניו׃³⁴ ואת מכסה עורת האילם המאדמים ואת מכסה ערת התחשׁים ואת פרכת המסך׃³⁵ את ארון העדת ואת בדיו ואת הכפרת׃³⁶ את השׁלחן את כל כליו ואת לחם הפנים׃³⁷ את המנרה הטהרה את נרתיה נרת המערכה ואת כל כליה ואת שׁמן המאור׃³⁸ ואת מזבח הזהב ואת שׁמן המשׁחה ואת קטרת הסמים ואת מסך פתח האהל׃

Exodus 40:1-38

¹ וידבר יהוה אל משׁה לאמר׃² ביום החדשׁ הראשׁון באחד לחדשׁ תקים את משׁכן אהל מועד׃³ ושׂמת שׁם את ארון העדות וסכת על הארן את הפרכת׃⁴ והבאת את השׁלחן וערכת את ערכו והבאת את המנרה והעלית את נרתיה׃⁵ ונתתה את מזבח הזהב לקטרת לפני ארון העדת ושׂמת את מסך הפתח למשׁכן׃⁶ ונתתה את מזבח העלה לפני פתח משׁכן אהל מועד׃⁷ ונתת את הכיר בין אהל מועד ובין המזבח ונתת שׁם מים׃⁸ ושׂמת את החצר סביב ונתת את מסך שׁער החצר׃⁹ ולקחת את שׁמן המשׁחה ומשׁחת את המשׁכן ואת כל אשׁר בו וקדשׁת אתו ואת כל כליו והיה קדשׁ׃¹⁰ ומשׁחת את מזבח העלה ואת כל כליו וקדשׁת את המזבח והיה המזבח קדשׁ קדשׁים׃¹¹ ומשׁחת את הכיר ואת כנו וקדשׁת אתו׃¹² והקרבת את אהרן ואת בניו אל פתח אהל מועד ורחצת אתם במים׃¹³ והלבשׁת את אהרן את בגדי הקדשׁ ומשׁחת אתו וקדשׁת אתו וכהן׃¹⁴ ואת בניו תקריב והלבשׁת אתם כתנת׃¹⁵ ומשׁחת אתם כאשׁר משׁחת את אביהם וכהנו לי והיתה להית להם משׁחתם לכהנת עולם לדרתם׃¹⁶ ויעשׂ משׁה ככל אשׁר צוה יהוה אתו כן עשׂה׃¹⁷ ויהי בחדשׁ הראשׁון בשׁנה השׁנית באחד לחדשׁ הוקם המשׁכן׃¹⁸ ויקם משׁה את המשׁכן ויתן את אדניו וישׂם את קרשׁיו ויתן את בריחיו ויקם את עמודיו׃¹⁹ ויפרשׂ את האהל על המשׁכן וישׂם את מכסה האהל עליו מלמעלה כאשׁר צוה יהוה את משׁה׃²⁰ ויקח ויתן את העדת אל הארן וישׂם את הבדים על הארן ויתן את הכפרת על הארן מלמעלה׃²¹ ויבא את הארן אל המשׁכן וישׂם את פרכת המסך ויסך על ארון העדות כאשׁר צוה יהוה את משׁה׃²² ויתן את השׁלחן באהל מועד על ירך המשׁכן צפנה מחוץ לפרכת׃²³ ויערך עליו ערך לחם לפני יהוה כאשׁר צוה יהוה את משׁה׃²⁴ וישׂם את המנרה באהל מועד נכח השׁלחן על ירך המשׁכן נגבה׃²⁵ ויעל הנרת לפני יהוה כאשׁר צוה יהוה את משׁה׃²⁶ וישׂם את מזבח הזהב באהל מועד לפני הפרכת׃²⁷ ויקטר עליו קטרת סמים כאשׁר צוה יהוה את משׁה׃²⁸ וישׂם את מסך הפתח למשׁכן׃²⁹ ואת מזבח העלה שׂם פתח משׁכן אהל מועד ויעל עליו את העלה ואת המנחה כאשׁר צוה יהוה את משׁה׃³⁰ וישׂם את הכיר בין אהל מועד ובין המזבח ויתן שׁמה מים לרחצה׃³¹ ורחצו ממנו משׁה ואהרן ובניו את ידיהם ואת רגליהם׃³² בבאם אל אהל מועד ובקרבתם אל המזבח ירחצו כאשׁר צוה יהוה את משׁה׃³³ ויקם את החצר סביב למשׁכן ולמזבח ויתן את מסך שׁער החצר ויכל משׁה את המלאכה׃³⁴ ויכס הענן את אהל מועד וכבוד יהוה מלא את המשׁכן׃³⁵ ולא יכל משׁה לבוא אל אהל מועד כי שׁכן עליו הענן וכבוד יהוה מלא את המשׁכן׃³⁶ ובהעלות הענן מעל המשׁכן יסעו בני ישׂראל בכל מסעיהם׃³⁷ ואם לא יעלה הענן ולא יסעו עד יום העלתו׃³⁸ כי ענן יהוה על המשׁכן יומם ואשׁ תהיה לילה בו לעיני כל בית ישׂראל בכל מסעיהם׃

Numbers 7:9

⁹ ולבני קהת לא נתן כי עבדת הקדשׁ עלהם בכתף ישׂאו׃

Psalms 119:6

⁶ אז לא אבושׁ בהביטי אל כל מצותיך׃