Exodus 23:16 Cross References - HOT

¹⁶ וחג הקציר בכורי מעשׂיך אשׁר תזרע בשׂדה וחג האסף בצאת השׁנה באספך את מעשׂיך מן השׂדה׃

Exodus 22:29

²⁹ (22:28) מלאתך ודמעך לא תאחר בכור בניך תתן׃

Exodus 34:22

²² וחג שׁבעת תעשׂה לך בכורי קציר חטים וחג האסיף תקופת השׁנה׃

⁹ וידבר יהוה אל משׁה לאמר׃¹⁰ דבר אל בני ישׂראל ואמרת אלהם כי תבאו אל הארץ אשׁר אני נתן לכם וקצרתם את קצירה והבאתם את עמר ראשׁית קצירכם אל הכהן׃¹¹ והניף את העמר לפני יהוה לרצנכם ממחרת השׁבת יניפנו הכהן׃¹² ועשׂיתם ביום הניפכם את העמר כבשׂ תמים בן שׁנתו לעלה ליהוה׃¹³ ומנחתו שׁני עשׂרנים סלת בלולה בשׁמן אשׁה ליהוה ריח ניחח ונסכה יין רביעת ההין׃¹⁴ ולחם וקלי וכרמל לא תאכלו עד עצם היום הזה עד הביאכם את קרבן אלהיכם חקת עולם לדרתיכם בכל משׁבתיכם׃¹⁵ וספרתם לכם ממחרת השׁבת מיום הביאכם את עמר התנופה שׁבע שׁבתות תמימת תהיינה׃¹⁶ עד ממחרת השׁבת השׁביעת תספרו חמשׁים יום והקרבתם מנחה חדשׁה ליהוה׃¹⁷ ממושׁבתיכם תביאו לחם תנופה שׁתים שׁני עשׂרנים סלת תהיינה חמץ תאפינה בכורים ליהוה׃¹⁸ והקרבתם על הלחם שׁבעת כבשׂים תמימם בני שׁנה ופר בן בקר אחד ואילם שׁנים יהיו עלה ליהוה ומנחתם ונסכיהם אשׁה ריח ניחח ליהוה׃¹⁹ ועשׂיתם שׂעיר עזים אחד לחטאת ושׁני כבשׂים בני שׁנה לזבח שׁלמים׃²⁰ והניף הכהן אתם על לחם הבכרים תנופה לפני יהוה על שׁני כבשׂים קדשׁ יהיו ליהוה לכהן׃²¹ וקראתם בעצם היום הזה מקרא קדשׁ יהיה לכם כל מלאכת עבדה לא תעשׂו חקת עולם בכל מושׁבתיכם לדרתיכם׃

Leviticus 23:34-44

³⁴ דבר אל בני ישׂראל לאמר בחמשׁה עשׂר יום לחדשׁ השׁביעי הזה חג הסכות שׁבעת ימים ליהוה׃³⁵ ביום הראשׁון מקרא קדשׁ כל מלאכת עבדה לא תעשׂו׃³⁶ שׁבעת ימים תקריבו אשׁה ליהוה ביום השׁמיני מקרא קדשׁ יהיה לכם והקרבתם אשׁה ליהוה עצרת הוא כל מלאכת עבדה לא תעשׂו׃³⁷ אלה מועדי יהוה אשׁר תקראו אתם מקראי קדשׁ להקריב אשׁה ליהוה עלה ומנחה זבח ונסכים דבר יום ביומו׃³⁸ מלבד שׁבתת יהוה ומלבד מתנותיכם ומלבד כל נדריכם ומלבד כל נדבתיכם אשׁר תתנו ליהוה׃³⁹ אך בחמשׁה עשׂר יום לחדשׁ השׁביעי באספכם את תבואת הארץ תחגו את חג יהוה שׁבעת ימים ביום הראשׁון שׁבתון וביום השׁמיני שׁבתון׃⁴⁰ ולקחתם לכם ביום הראשׁון פרי עץ הדר כפת תמרים וענף עץ עבת וערבי נחל ושׂמחתם לפני יהוה אלהיכם שׁבעת ימים׃⁴¹ וחגתם אתו חג ליהוה שׁבעת ימים בשׁנה חקת עולם לדרתיכם בחדשׁ השׁביעי תחגו אתו׃⁴² בסכת תשׁבו שׁבעת ימים כל האזרח בישׂראל ישׁבו בסכת׃⁴³ למען ידעו דרתיכם כי בסכות הושׁבתי את בני ישׂראל בהוציאי אותם מארץ מצרים אני יהוה אלהיכם׃⁴⁴ וידבר משׁה את מעדי יהוה אל בני ישׂראל׃

Numbers 28:26-31

²⁶ וביום הבכורים בהקריבכם מנחה חדשׁה ליהוה בשׁבעתיכם מקרא קדשׁ יהיה לכם כל מלאכת עבדה לא תעשׂו׃²⁷ והקרבתם עולה לריח ניחח ליהוה פרים בני בקר שׁנים איל אחד שׁבעה כבשׂים בני שׁנה׃²⁸ ומנחתם סלת בלולה בשׁמן שׁלשׁה עשׂרנים לפר האחד שׁני עשׂרנים לאיל האחד׃²⁹ עשׂרון עשׂרון לכבשׂ האחד לשׁבעת הכבשׂים׃³⁰ שׂעיר עזים אחד לכפר עליכם׃³¹ מלבד עלת התמיד ומנחתו תעשׂו תמימם יהיו לכם ונסכיהם׃

Numbers 29:12-39

¹² ובחמשׁה עשׂר יום לחדשׁ השׁביעי מקרא קדשׁ יהיה לכם כל מלאכת עבדה לא תעשׂו וחגתם חג ליהוה שׁבעת ימים׃¹³ והקרבתם עלה אשׁה ריח ניחח ליהוה פרים בני בקר שׁלשׁה עשׂר אילם שׁנים כבשׂים בני שׁנה ארבעה עשׂר תמימם יהיו׃¹⁴ ומנחתם סלת בלולה בשׁמן שׁלשׁה עשׂרנים לפר האחד לשׁלשׁה עשׂר פרים שׁני עשׂרנים לאיל האחד לשׁני האילם׃¹⁵ ועשׂרון עשׂרון לכבשׂ האחד לארבעה עשׂר כבשׂים׃¹⁶ ושׂעיר עזים אחד חטאת מלבד עלת התמיד מנחתה ונסכה׃¹⁷ וביום השׁני פרים בני בקר שׁנים עשׂר אילם שׁנים כבשׂים בני שׁנה ארבעה עשׂר תמימם׃¹⁸ ומנחתם ונסכיהם לפרים לאילם ולכבשׂים במספרם כמשׁפט׃¹⁹ ושׂעיר עזים אחד חטאת מלבד עלת התמיד ומנחתה ונסכיהם׃²⁰ וביום השׁלישׁי פרים עשׁתי עשׂר אילם שׁנים כבשׂים בני שׁנה ארבעה עשׂר תמימם׃²¹ ומנחתם ונסכיהם לפרים לאילם ולכבשׂים במספרם כמשׁפט׃²² ושׂעיר חטאת אחד מלבד עלת התמיד ומנחתה ונסכה׃²³ וביום הרביעי פרים עשׂרה אילם שׁנים כבשׂים בני שׁנה ארבעה עשׂר תמימם׃²⁴ מנחתם ונסכיהם לפרים לאילם ולכבשׂים במספרם כמשׁפט׃²⁵ ושׂעיר עזים אחד חטאת מלבד עלת התמיד מנחתה ונסכה׃²⁶ וביום החמישׁי פרים תשׁעה אילם שׁנים כבשׂים בני שׁנה ארבעה עשׂר תמימם׃²⁷ ומנחתם ונסכיהם לפרים לאילם ולכבשׂים במספרם כמשׁפט׃²⁸ ושׂעיר חטאת אחד מלבד עלת התמיד ומנחתה ונסכה׃²⁹ וביום השׁשׁי פרים שׁמנה אילם שׁנים כבשׂים בני שׁנה ארבעה עשׂר תמימם׃³⁰ ומנחתם ונסכיהם לפרים לאילם ולכבשׂים במספרם כמשׁפט׃³¹ ושׂעיר חטאת אחד מלבד עלת התמיד מנחתה ונסכיה׃³² וביום השׁביעי פרים שׁבעה אילם שׁנים כבשׂים בני שׁנה ארבעה עשׂר תמימם׃³³ ומנחתם ונסכהם לפרים לאילם ולכבשׂים במספרם כמשׁפטם׃³⁴ ושׂעיר חטאת אחד מלבד עלת התמיד מנחתה ונסכה׃³⁵ ביום השׁמיני עצרת תהיה לכם כל מלאכת עבדה לא תעשׂו׃³⁶ והקרבתם עלה אשׁה ריח ניחח ליהוה פר אחד איל אחד כבשׂים בני שׁנה שׁבעה תמימם׃³⁷ מנחתם ונסכיהם לפר לאיל ולכבשׂים במספרם כמשׁפט׃³⁸ ושׂעיר חטאת אחד מלבד עלת התמיד ומנחתה ונסכה׃³⁹ אלה תעשׂו ליהוה במועדיכם לבד מנדריכם ונדבתיכם לעלתיכם ולמנחתיכם ולנסכיכם ולשׁלמיכם׃

Deuteronomy 16:9-15

⁹ שׁבעה שׁבעת תספר לך מהחל חרמשׁ בקמה תחל לספר שׁבעה שׁבעות׃¹⁰ ועשׂית חג שׁבעות ליהוה אלהיך מסת נדבת ידך אשׁר תתן כאשׁר יברכך יהוה אלהיך׃¹¹ ושׂמחת לפני יהוה אלהיך אתה ובנך ובתך ועבדך ואמתך והלוי אשׁר בשׁעריך והגר והיתום והאלמנה אשׁר בקרבך במקום אשׁר יבחר יהוה אלהיך לשׁכן שׁמו שׁם׃¹² וזכרת כי עבד היית במצרים ושׁמרת ועשׂית את החקים האלה׃¹³ חג הסכת תעשׂה לך שׁבעת ימים באספך מגרנך ומיקבך׃¹⁴ ושׂמחת בחגך אתה ובנך ובתך ועבדך ואמתך והלוי והגר והיתום והאלמנה אשׁר בשׁעריך׃¹⁵ שׁבעת ימים תחג ליהוה אלהיך במקום אשׁר יבחר יהוה כי יברכך יהוה אלהיך בכל תבואתך ובכל מעשׂה ידיך והיית אך שׂמח׃

Nehemiah 8:14-18

¹⁴ וימצאו כתוב בתורה אשׁר צוה יהוה ביד משׁה אשׁר ישׁבו בני ישׂראל בסכות בחג בחדשׁ השׁביעי׃¹⁵ ואשׁר ישׁמיעו ויעבירו קול בכל עריהם ובירושׁלם לאמר צאו ההר והביאו עלי זית ועלי עץ שׁמן ועלי הדס ועלי תמרים ועלי עץ עבת לעשׂת סכת ככתוב׃¹⁶ ויצאו העם ויביאו ויעשׂו להם סכות אישׁ על גגו ובחצרתיהם ובחצרות בית האלהים וברחוב שׁער המים וברחוב שׁער אפרים׃¹⁷ ויעשׂו כל הקהל השׁבים מן השׁבי סכות וישׁבו בסכות כי לא עשׂו מימי ישׁוע בן נון כן בני ישׂראל עד היום ההוא ותהי שׂמחה גדולה מאד׃¹⁸ ויקרא בספר תורת האלהים יום ביום מן היום הראשׁון עד היום האחרון ויעשׂו חג שׁבעת ימים וביום השׁמיני עצרת כמשׁפט׃

Zechariah 14:16-19

¹⁶ והיה כל הנותר מכל הגוים הבאים על ירושׁלם ועלו מדי שׁנה בשׁנה להשׁתחות למלך יהוה צבאות ולחג את חג הסכות׃¹⁷ והיה אשׁר לא יעלה מאת משׁפחות הארץ אל ירושׁלם להשׁתחות למלך יהוה צבאות ולא עליהם יהיה הגשׁם׃¹⁸ ואם משׁפחת מצרים לא תעלה ולא באה ולא עליהם תהיה המגפה אשׁר יגף יהוה את הגוים אשׁר לא יעלו לחג את חג הסכות׃¹⁹ זאת תהיה חטאת מצרים וחטאת כל הגוים אשׁר לא יעלו לחג את חג הסכות׃