Haitian(i)
1 Se yon sòm David. Pou Bondye pa bliye nou.
2 Seyè, pa pini m' lè ou fache! Pa kale m' lè ou an kòlè!
3 Ou bat mwen jouk ou blese m'. Ou kale m' byen kale.
4 Ou te fache anpil, se sa ki fè pa gen yon pati nan kò m' ki pa malad. Mwen te peche, se sa ki fè tout zo nan kò m' ap fè m' mal.
5 Peche m' yo fè pil, yo kouvri tèt mwen. Y'ap kraze m' tankou yon chay ki twò lou pou mwen.
6 Malenng mwen yo santi, y'ap koule paske mwen te viv tankou moun fou.
7 Mwen kagou, ren m' kase nèt. Tout lajounen m'ap mache tèt bese, dlo nan je.