Ezekiel 4:1-8

HOT^{(i) 1} ואתה בן אדם קח לך לבנה ונתתה אותה לפניך וחקות עליה עיר את ירושׁלם׃ ² ונתתה עליה מצור ובנית עליה דיק ושׁפכת עליה סללה ונתתה עליה מחנות ושׂים עליה כרים סביב׃ ³ ואתה קח לך מחבת ברזל ונתתה אותה קיר ברזל בינך ובין העיר והכינתה את פניך אליה והיתה במצור וצרת עליה אות היא לבית ישׂראל׃ ⁴ ואתה שׁכב על צדך השׂמאלי ושׂמת את עון בית ישׂראל עליו מספר הימים אשׁר תשׁכב עליו תשׂא את עונם׃ ⁵ ואני נתתי לך את שׁני עונם למספר ימים שׁלשׁ מאות ותשׁעים יום ונשׂאת עון בית ישׂראל׃ ⁶ וכלית את אלה ושׁכבת על צדך הימוני שׁנית ונשׂאת את עון בית יהודה ארבעים יום יום לשׁנה יום לשׁנה נתתיו׃ ⁷ ואל מצור ירושׁלם תכין פניך וזרעך חשׂופה ונבאת עליה׃ ⁸ והנה נתתי עליך עבותים ולא תהפך מצדך אל צדך עד כלותך ימי מצורך׃