Ezekiel 32:1-32 ויהי בשׁתי עשׂרה שׁנה בשׁני עשׂר חדשׁ באחד לחדשׁ היה דבר יהוה אלי לאמר׃

HOT⁽ⁱ⁾ ¹ ויהי בשׁתי עשׂרה שׁנה בשׁני עשׂר חדשׁ באחד לחדשׁ היה דבר יהוה אלי לאמר׃ ² בן אדם שׂא קינה על פרעה מלך מצרים ואמרת אליו כפיר גוים נדמית ואתה כתנים בימים ותגח בנהרותיך ותדלח מים ברגליך ותרפס נהרותם׃ ³ כה אמר אדני יהוה ופרשׂתי עליך את רשׁתי בקהל עמים רבים והעלוך בחרמי׃ ⁴ ונטשׁתיך בארץ על פני השׂדה אטילך והשׁכנתי עליך כל עוף השׁמים והשׂבעתי ממך חית כל הארץ׃ ⁵ ונתתי את בשׂרך על ההרים ומלאתי הגאיות רמותך׃ ⁶ והשׁקיתי ארץ צפתך מדמך אל ההרים ואפקים ימלאון ממך׃ ⁷ וכסיתי בכבותך שׁמים והקדרתי את ככביהם שׁמשׁ בענן אכסנו וירח לא יאיר אורו׃ ⁸ כל מאורי אור בשׁמים אקדירם עליך ונתתי חשׁך על ארצך נאם אדני יהוה׃ ⁹ והכעסתי לב עמים רבים בהביאי שׁברך בגוים על ארצות אשׁר לא ידעתם׃ ¹⁰ והשׁמותי עליך עמים רבים ומלכיהם ישׂערו עליך שׂער בעופפי חרבי על פניהם וחרדו לרגעים אישׁ לנפשׁו ביום מפלתך׃ ¹¹ כי כה אמר אדני יהוה חרב מלך בבל תבואך׃ ¹² בחרבות גבורים אפיל המונך עריצי גוים כלם ושׁדדו את גאון מצרים ונשׁמד כל המונה׃ ¹³ והאבדתי את כל בהמתה מעל מים רבים ולא תדלחם רגל אדם עוד ופרסות בהמה לא תדלחם׃ ¹⁴ אז אשׁקיע מימיהם ונהרותם כשׁמן אוליך נאם אדני יהוה׃ ¹⁵ בתתי את ארץ מצרים שׁממה ונשׁמה ארץ ממלאה בהכותי את כל יושׁבי בה וידעו כי אני יהוה׃ ¹⁶ קינה היא וקוננוה בנות הגוים תקוננה אותה על מצרים ועל כל המונה תקוננה אותה נאם אדני יהוה׃ ¹⁷ ויהי בשׁתי עשׂרה שׁנה בחמשׁה עשׂר לחדשׁ היה דבר יהוה אלי לאמר׃ ¹⁸ בן אדם נהה על המון מצרים והורדהו אותה ובנות גוים אדרם אל ארץ תחתיות את יורדי בור׃ ¹⁹ ממי נעמת רדה והשׁכבה את ערלים׃ ²⁰ בתוך חללי חרב יפלו חרב נתנה משׁכו אותה וכל המוניה׃ ²¹ ידברו לו אלי גבורים מתוך שׁאול את עזריו ירדו שׁכבו הערלים חללי חרב׃ ²² שׁם אשׁור וכל קהלה סביבותיו קברתיו כלם חללים הנפלים בחרב׃ ²³ אשׁר נתנו קברתיה בירכתי בור ויהי קהלה סביבות קברתה כלם חללים נפלים בחרב אשׁר נתנו חתית בארץ חיים׃ ²⁴ שׁם עילם וכל המונה סביבות קברתה כלם חללים הנפלים בחרב אשׁר ירדו ערלים אל ארץ תחתיות אשׁר נתנו חתיתם בארץ חיים וישׂאו כלמתם את יורדי בור׃ ²⁵ בתוך חללים נתנו משׁכב לה בכל המונה סביבותיו קברתה כלם ערלים חללי חרב כי נתן חתיתם בארץ חיים וישׂאו כלמתם את יורדי בור בתוך חללים נתן׃ ²⁶ שׁם משׁך תבל וכל המונה סביבותיו קברותיה כלם ערלים מחללי חרב כי נתנו חתיתם בארץ חיים׃ ²⁷ ולא ישׁכבו את גבורים נפלים מערלים אשׁר ירדו שׁאול בכלי מלחמתם ויתנו את חרבותם תחת ראשׁיהם ותהי עונתם על עצמותם כי חתית גבורים בארץ חיים׃ ²⁸ ואתה בתוך ערלים תשׁבר ותשׁכב את חללי חרב׃ ²⁹ שׁמה אדום מלכיה וכל נשׂיאיה אשׁר נתנו בגבורתם את חללי חרב המה את ערלים ישׁכבו ואת ירדי בור׃ ³⁰ שׁמה נסיכי צפון כלם וכל צדני אשׁר ירדו את חללים בחתיתם מגבורתם בושׁים וישׁכבו ערלים את חללי חרב וישׂאו כלמתם את יורדי בור׃ ³¹ אותם יראה פרעה ונחם על כל המונה חללי חרב פרעה וכל חילו נאם אדני יהוה׃ ³² כי נתתי את חתיתו בארץ חיים והשׁכב בתוך ערלים את חללי חרב פרעה וכל המונה נאם אדני יהוה׃