HOT(i)
21 וירדף גיחזי אחרי נעמן ויראה נעמן רץ אחריו ויפל מעל המרכבה לקראתו ויאמר השׁלום׃ 22 ויאמר שׁלום אדני שׁלחני לאמר הנה עתה זה באו אלי שׁני נערים מהר אפרים מבני הנביאים תנה נא להם ככר כסף ושׁתי חלפות בגדים׃ 23 ויאמר נעמן הואל קח ככרים ויפרץ בו ויצר ככרים כסף בשׁני חרטים ושׁתי חלפות בגדים ויתן אל שׁני נעריו וישׂאו לפניו׃ 24 ויבא אל העפל ויקח מידם ויפקד בבית וישׁלח את האנשׁים וילכו׃ 25 והוא בא ויעמד אל אדניו ויאמר אליו אלישׁע מאן גחזי ויאמר לא הלך עבדך אנה ואנה׃