Bible verses about "unbelief" | Wycliffe

² Myn hond made alle these thingis, and alle these thingis ben maad, seith the Lord; but to whom schal Y biholde, no but to a pore man and contrit in spirit, and greetli dredynge my wordis?

²⁰ but this kynde is not caste out, but bi preiyng and fastyng.

²³ And he that schal not be sclaundrid in me, is blessid.

¹⁶ For God louede so the world, that he yaf his `oon bigetun sone, that ech man that bileueth in him perische not, but haue euerlastynge lijf.

¹⁴ Nyle ye bere the yok with vnfeithful men. For what parting of riytwisnes with wickidnesse? or what felouschipe of liyt to derknessis? ¹⁵ and what acording of Crist to Belial? or what part of a feithful with the vnfeithful? ¹⁶ and what consent to the temple of God with mawmetis? And ye ben the temple of the lyuynge God, as the Lord seith, For Y schal dwelle in hem, and Y schal walke among hem; and Y schal be God of hem, and thei schulen be a puple to me. ¹⁷ For which thing go ye out of the myddil of hem, and be ye departid, seith the Lord, and touche ye not vnclene thing; ¹⁸ and Y schal resseyue you, and schal be to you in to a fadir, and ye schulen be to me in to sones and douytris, seith the Lord almyyti.

⁶ But axe he in feith, and doute no thing; for he that doutith, is lijk to a wawe of the see, which is moued and borun a boute of wynde.

¹⁹ We witen, that we ben of God, and al the world is set in yuel. ²⁰ And we witen, that the sone of God cam in fleisch, and yaf to vs wit, that we know veri God, and be in the veri sone of hym. ²¹ This is veri God, and euerlastynge lijf. My litle sones, kepe ye you fro maumetis.

³ If ony man techith othere wise, and acordith not to the hoolsum wordis of oure Lord Jhesu Crist, and to that teching that is bi pitee, ⁴ he is proud, and kan no thing, but langwischith aboute questiouns and stryuyng of wordis, of the whiche ben brouyt forth enuyes, stryues, blasfemyes, yuele suspiciouns, fiytingis of men, ⁵ that ben corrupt in soule, and that ben pryued fro treuthe, that demen wynnyng to be pitee.

²¹ Not ech man that seith to me, Lord, Lord, schal entre in to the kyngdom of heuenes; but he that doith the wille of my fadir that is in heuenes, he schal entre in to the kyngdoom of heuenes.

¹⁴ For many ben clepid, but fewe ben chosun.

²⁷ Afterward he seith to Thomas, Putte in here thi fyngur, and se myn hondis, and putte hidur thin hond, and putte in to my side, and nyle thou be vnbileueful, but feithful. ²⁸ Thomas answeride, and seide to him, My Lord and my God. ²⁹ Jhesus seith to him, Thomas, for thou hast seyn me, thou bileuedist; blessid ben thei, that seyn not, and han bileued.

⁸ For bi grace ye ben sauyd bi feith, and this not of you; for it is the yifte of God,

⁵ hauynge the licknesse of pitee, but denyynge the vertu of it. And eschewe thou these men.

²² And repreue ye these men that ben demed,

¹⁵ Nyle ye loue the world, ne tho thingis that ben in the world. If ony man loueth the world, the charite of the fader is not in hym. ¹⁶ For al thing that is in the world, is coueitise of fleisch, and coueitise of iyen, and pride of lijf, which is not of the fadir, but it is of the world. ¹⁷ And the world schal passe, and the coueitise of it; but he that doith the wille of God, dwellith with outen ende.

¹⁶ Who that bileueth, and is baptisid, schal be saaf; but he that bileueth not, schal be dampned.

⁴⁸ He that dispisith me, and takith not my wordis, hath hym that schal iuge hym; thilke word that Y haue spokun, schal deme hym in the last dai.

¹⁸ He that bileueth in hym, is not demed; but he that bileueth not, is now demed, for he bileueth not in the name of the `oon bigetun sone of God. ¹⁹ And this is the dom, for liyt cam in to the world, and men loueden more derknessis than liyt; for her werkes weren yuele.

¹¹ that alle be demed, whiche bileueden not to treuthe, but consentiden to wickidnesse. ¹² But, britheren louyd of God, we owen to do thankyngis euermore to God for you, that God chees vs the firste fruytis in to heelthe, in halewing of spirit and in feith of treuthe;

²³ And anoon the fadir of the child criede with teeris, and seide, Lord, Y bileue; Lord, helpe thou myn vnbileue. ²⁴ And whanne Jhesus hadde seyn the puple rennynge togidere, he manasside the vnclene spirit, and seide to hym, Thou deef and doumbe spirit, Y comaunde thee, go out fro hym, and entre no more in to hym. ²⁵ And he criynge, and myche to breidynge him, wente out fro hym; and he was maad as deed, so that many seiden, that he was deed.