Matthew 13:54 Cross References - Wycliffe

⁵⁴ And he cam in to his cuntrei, and tauyte hem in her synagogis, so that thei wondriden, and seiden, Fro whennus this wisdam and vertues camen to this?

⁹ Thei ordeineden an yuel word ayens me; Whether he that slepith, schal not leie to, that he rise ayen? ¹⁰ For whi the man of my pees, in whom Y hopide, he that eet my looues; made greet disseit on me.

²³ and cam, and dwelte in a citee, that ys clepid Nazareth, that it shulde be fulfillid, that was seid bi profetis, For he shal be clepid a Nazarey.

²³ And Jhesus yede aboute al Galilee, techynge in the synagogis of hem, and prechynge the gospel of the kyngdom, and heelynge euery languor and eche sekenesse among the puple.

²⁸ And it was doon, whanne Jhesus hadde endid these wordis, the puple wondride on his techyng;

¹ And he yede out fro thennus, and wente in to his owne cuntre; and hise disciplis folewiden him. ² And whanne the sabat was come, Jhesus bigan to teche in a synagoge. And many herden, and wondriden in his techyng, and seiden, Of whennus to this alle these thingis? and what is the wisdom that is youun to hym, and siche vertues whiche ben maad bi hise hondis? ³ Whether this is not a carpenter, the sone of Marie, the brother of James and of Joseph and of Judas and of Symount? whether hise sistris ben not here with vs? And thei weren sclaundrid in hym. ⁴ And Jhesus seide to hem, That a profete is not without onoure, but in his owne cuntrey, and among his kynne, and in his hous. ⁵ And he myyte not do there ony vertu, saue that he helide a fewe sijk men, leiynge on hem hise hoondis. ⁶ And he wondride for the vnbileue of hem. And he wente aboute casteles on ech side, and tauyte.

¹⁶ And he cam to Nazareth, where he was norisschid, and entride aftir his custom in the sabat dai in to a synagoge, and roos to reed. ¹⁷ And the book of Ysaye, the prophete, was takun to hym; and as he turnede the book, he foond a place, where it was wrytun, ¹⁸ The Spirit of the Lord on me, for which thing he anoyntide me; he sente me to preche to pore men, to hele contrite men in herte, ¹⁹ and to preche remyssioun to prisoneris, and siyt to blynde men, and to delyuere brokun men in to remissioun; to preche the yeer of the Lord plesaunt, and the dai of yeldyng ayen. ²⁰ And whanne he hadde closid the book, he yaf ayen to the mynystre, and sat; and the iyen of alle men in the synagoge were biholdynge in to hym. ²¹ And he bigan to seie to hem, For in this dai this scripture is fulfillid in youre eeris. ²² And alle men yauen witnessyng to hym, and wondriden in the wordis of grace, that camen forth of his mouth. And thei seiden, Whether this is not the sone of Joseph? ²³ And he seide to hem, Sotheli ye schulen seie to me this liknesse, Leeche, heele thi silf. The Farisees seiden to Jhesu, Hou grete thingis han we herd don in Cafarnaum, do thou also here in thi cuntre. ²⁴ And he seide, Treuli Y seie to you, that no profete is resseyued in his owne cuntre. ²⁵ In treuthe Y seie to you, that many widowis weren in the daies of Elie, the prophete, in Israel, whanne heuene was closid thre yeer and sixe monethis, whanne greet hungur was maad in al the erthe; ²⁶ and to noon of hem was Elye sent, but in to Sarepta of Sydon, to a widowe. ²⁷ And many meseles weren in Israel, vndur Helisee, the prophete, and noon of hem was clensid, but Naaman of Sirye. ²⁸ And alle in the synagoge herynge these thingis, weren fillid with wraththe. ²⁹ And thei risen vp, and drouen hym out with out the citee, and ledden hym to the cop of the hil on which her citee was bildid, to caste hym doun. ³⁰ But Jhesus passide, and wente thorou the myddil of hem; and cam doun in to Cafarnaum,

¹¹ He cam in to his owne thingis, and hise resseyueden hym not.

¹⁵ And the Jewis wondriden, and seiden, Hou can this man lettris, sithen he hath not lerned? ¹⁶ Jhesus answerde to hem, and seide, My doctryne is not myn, but his that sente me.

¹³ And thei siyen the stidfastnesse of Petre and of Joon, for it was foundun that thei weren men vnlettrid, and lewid men, and thei wondriden, and knewen hem that thei weren with Jhesu.

⁴⁶ Thanne Poul and Barnabas stidfastli seiden, To you it bihofte first to speke the word of God; but for ye putten it awei, and han demyd you vnworthi to euerlastinge lijf, lo! we turnen to hethen men.

¹⁷ And after the thridde dai, he clepide togidir the worthieste of the Jewis. And whanne thei camen, he seide to hem, Britheren, Y dide no thing ayens the puple ether custom of fadris, and Y was boundun at Jerusalem, and was bitakun in to the hondis of Romayns. ¹⁸ And whanne thei hadden axid of me, wolden haue delyuerid me, for that no cause of deth was in me. ¹⁹ But for Jewis ayenseiden, Y was constreyned to appele to the emperour; not as hauynge ony thing to accuse my puple. ²⁰ Therfor for this cause Y preiede to se you, and speke to you; for for the hope of Israel Y am gird aboute with this chayne. ²¹ And thei seiden to hym, Nether we han resseyued lettris of thee fro Judee, nether ony of britheren comynge schewide, ether spak ony yuel thing of thee. ²² But we preyen to here of thee, what thingis thou felist; for of this sect it is knowun to vs, that euerywhere me ayenseith it. ²³ And whanne thei hadden ordeined a dai to hym, many men camen to hym in to the in. To whiche he expownede, witnessinge the kyngdom `of God, and counseilide hem of Jhesu, of the lawe of Moyses, and profetis, for the morewe til to euentid. ²⁴ And summe bileueden to these thingis that weren seid of Poul, summe bileueden not. ²⁵ And whanne thei weren not consentinge togidir, thei departiden. And Poul seide o word, For the Hooli Goost spak wel bi Ysaye, the profete, to oure fadris, ²⁶ and seide, Go thou to this puple, and seie to hem, With eere ye schulen here, and ye schulen not vndirstonde; and ye seynge schulen se, and ye schulen not biholde. ²⁷ For the herte of this puple is greetli fattid, and with eeris thei herden heuyli, and thei closiden togider her iyen, lest perauenture thei se with iyen, and with eeris here, and bi herte vndurstonde, and be conuertid, and Y hele hem. ²⁸ Therfor be it knowun to you, that this helthe of God is sent to hethen men, and thei schulen here.