Acts 17:31 Cross References - Wycliffe

³¹ in which he schal deme the world in equite, in a man in which he ordeynede, and yaf feith to alle men, and reiside hym fro deth.

⁹ Enhaunse ye oure Lord God, and worschipe ye in his hooli hil; for oure Lord God is hooli.

¹⁵ Treuly Y seie to you, it shal be more suffrable to the loond of men of Sodom and of Gommor in the dai of iugement, than to thilke citee.

³¹ Whanne mannus sone schal come in his maieste, and alle hise aungels with hym, thanne he schal sitte on the sege of his maieste; ³² and alle folkis schulen be gaderid bifor hym, ³³ and he schal departe hem atwynne, as a scheeperde departith scheep from kidis; and he schal sette the scheep on his riythalf, and the kidis on the lefthalf. ³⁴ Thanne the kyng schal seie to hem, that schulen be on his riythalf, Come ye, the blessid of my fadir, take ye in possessioun the kyngdoom maad redi to you fro the makyng of the world. ³⁵ For Y hungride, and ye yauen me to ete; Y thristide, and ye yauen me to drynke; Y was herboreles, and ye herboriden me; ³⁶ nakid, and ye hiliden me; sijk, and ye visitiden me; Y was in prisoun, and ye camen to me. ³⁷ Thanne iust men schulen answere to hym, and seie, Lord, whanne siyen we thee hungry, and we fedden thee; thristi, and we yauen to thee drynk? ³⁸ and whanne sayn we thee herborles, and we herboreden thee; or nakid, and we hiliden thee? ³⁹ or whanne sayn we thee sijk, or in prisoun, and we camen to thee? ⁴⁰ And the kyng answerynge schal seie to hem, Treuli Y seie to you, as longe as ye diden to oon of these my leeste britheren, ye diden to me. ⁴¹ Thanne the kyng schal seie also to hem, that schulen be on his lefthalf, Departe fro me, ye cursid, in to euerlastynge fijr, that is maad redi to the deuel and hise aungels. ⁴² For Y hungride, and ye yauen not me to ete; Y thristide, and ye yauen not me to drynke; ⁴³ Y was herborles, and ye herberden not me; nakid, and ye keuerden not me; sijk, and in prisoun, and ye visitiden not me. ⁴⁴ Thanne and thei schulen answere to hym, and schulen seie, Lord, whanne sayn we thee hungrynge, or thristynge, or herboreles, or nakid, or sijk, or in prisoun, and we serueden not to thee? ⁴⁵ Thanne he schal answere to hem, and seie, Treuli Y seie to you, `hou longe ye diden not to oon of these leeste, nether ye diden to me. ⁴⁶ And these schulen goo in to euerlastynge turment; but the iust men schulen go in to euerlastynge lijf.

⁴⁶ And he seide to hem, For thus it is writun, and thus it bihofte Crist to suffre, and ryse ayen fro deeth in the thridde dai; ⁴⁷ and penaunce and remyssioun of synnes to be prechid in his name `in to alle folkis, bigynnynge at Jerusalem. ⁴⁸ And ye ben witnessis of these thingis.

²² For nethir the fadir iugith ony man, but hath youun ech doom to the sone, ²³ that alle men onoure the sone, as thei onouren the fadir. He that onourith not the sone, onourith not the fadir that sente hym.

²³ as ye witen, ye turmentiden, and killiden hym bi the hoondis of wyckid men, bi counseil determyned and bitakun bi the forknouwyng of God. ²⁴ Whom God reiside, whanne sorewis of helle weren vnboundun, bi that that it was impossible that he were holdun of it.

³² God reiside this Jhesu, to whom we alle ben witnessis.

¹⁵ And ye slowen the maker of lijf, whom God reiside fro deth, of whom we ben witnessis. ¹⁶ And in the feith of his name he hath confermyd this man, whom ye seen and knowen; the name of hym, and the feith that is bi him, yaf to this man ful heelthe in the siyt of alle you.

¹⁰ be it knowun to you alle, and to al the puple of Israel, that in the name of Jhesu Crist of Nazareth, whom ye crucifieden, whom God reiside fro deth, in this this man stondith hool bifor you.

³⁰ God of oure fadris reiside Jhesu, whom ye slowen, hangynge in a tre. ³¹ God enhaunside with his riythond this prince and sauyour, that penaunce were yyue to Israel, and remyssioun of synnes. ³² And we ben witnessis of these wordis, and the Hooli Goost, whom God yaf to alle obeischinge to him.

³⁹ And we ben witnessis of alle thingis, whiche he dide in the cuntrei of Jewis, and of Jerusalem; whom thei slowen, hangynge in a tre. ⁴⁰ And God reiside this in the thridde dai, and yaf hym to be maad knowun, ⁴¹ not to al puple, but to witnessis bifor ordeyned of God; to vs that eeten and drunken with hym, after that he roos ayen fro deth. ⁴² And he comaundide to vs to preche to the puple, and to witnesse, that he it is, that is ordeyned of God domesman of the quyk and of deede.

³⁰ And God reiside hym fro deth in the thridde dai; which was seyn bi mony daies to ³¹ hem that wenten vp togidere with hym fro Galilee in to Jerusalem, which ben til now his witnessis to the puple.

¹⁸ And summe Epeicureis, and Stoisens, and filosofris disputiden with hym. And summe seiden, What wole this sowere of wordis seie? And othere seiden, He semeth to be a tellere of newe fendis; for he telde to hem Jhesu, and the ayenrisyng.

⁵ But aftir thin hardnesse and vnrepentaunt herte, thou tresorist to thee wraththe in the dai of wraththe and of schewyng of the riytful doom of God,

¹⁶ in the dai whanne God schal deme the priuy thingis of men aftir my gospel, bi Jhesu Crist.

⁹ For whi for this thing Crist was deed, and roos ayen, that he be Lord bothe of quyke and of deed men. ¹⁰ But what demest thou thi brothir? or whi dispisist thou thi brothir? for alle we schulen stonde bifore the trone of Crist.

⁵ Therfor nyle ye deme bifore the tyme, til that the Lord come, which schal liytne the hyd thingis of derknessis, and schal schewe the counseils of hertis; and thanne preisyng schal be to ech man of God.

³ For Y bitook to you at the bigynnyng that thing which also Y haue resseyued; that Crist was deed for oure synnes, bi the scripturis; ⁴ and that he was biried, and that he roos ayen in the thridde dai, after scripturis; ⁵ and that he was seyn to Cephas, and aftir these thingis to enleuene; ⁶ aftirward he was seyn to mo than fyue hundrid britheren togidere, of whiche manye lyuen yit, but summe ben deed; aftirward he was seyn to James, ⁷ and aftirward to alle the apostlis. ⁸ And last of alle he was seyn also to me, as to a deed borun child.

¹⁰ For it bihoueth vs alle to be schewid bifor the trone of Crist, that euery man telle the propre thingis of the bodi, as he hath don, ethir good, ether yuel.

¹ I witnesse bifore God and Crist Jhesu, that schal deme the quike and the deed, and bi the comyng of hym, and the kyngdom of hym,

⁷ But the heuenes that now ben, and the erthe, ben kept bi the same word, and ben reseruyd to fier in to the dai of doom and perdicioun of wickid men.

¹⁴ But Enoch, the seuenthe fro Adam, profeciede of these, and seide, Lo! the Lord cometh with hise hooli thousandis, ¹⁵ to do dom ayens alle men, and to repreue alle vnfeithful men of alle the werkis of the wickidnesse of hem, bi whiche thei diden wickidli, and of alle the harde wordis, that wyckid synneris han spoke ayens God.