John 8:13 Cross References - WestSaxon990

¹³ Ða pharisei cwædon to him. Þu cystþ (sic) gewitnesse be ðe sylfon. nis ðin gewitnes soð;

³¹ Gif ic ge-witnesse be me cyþe. mïn gewitnes nis soð; ³² Oþer is se ðe cyþ gewitnesse be me. & ic wät þt seo cyðnes is soð þe he cyþ be me. ³³ ge sendon to iohanne & he cyðde soþfæstnesse gewitnesse; ³⁴ Ic ne onfo gewitnesse fram menn. ac þas þing ic secge þt ge syn hale; ³⁵ He wæs byrnende leoht-fæt & lyhtende. ge woldon sume hwile geblissian on his leohte; ³⁶ Ic hæbbe maran gewitnesse þonne iohannes. witodlice þa weorc þe fæder me sealde þt ic hig full-fremme. Ða weorc þe ic wyrce cyþað gewitnesse be me þt fæder me asende. ³⁷ & se fæder þe me sende cyþ gewitnesse be me; Ne ge næfre his stefne ne gehyrdon. ne ge his hiw ne gesawon; ³⁸ And ge nabbað his word on eow wunigende. forþam þe ge ne gelyfað þam ðe he sende; ³⁹ Smeageað halige gewritu forðam þe ge wenað þt ge habbon ece lïf on þam. & hig synt þe gewitnesse cyþaþ be me ⁴⁰ & ge nellað cuman to me þt ge habbon lïf; ⁴¹ Ne under-fo ic nane beorht-nesse æt mannum. ⁴² Ac ic gecneow eow þt ge nabbaþ godes lufe on eow; ⁴³ Ic com on mines fæder naman & ge me ne under-fengon. gyf oþer cymþ on his agenum naman hyne ge under-foð. ⁴⁴ hu mage ge gelyfan. þe eow betweonan wuldor under-foð & ne seceaþ þt wuldor þe is fram gode syluum. ⁴⁵ ne wene ge þt ic eow wrege to fæder. Se is þe eow wregð. moyses on þone ge ge-hyhtað; ⁴⁶ Witodlice gif ge gelyfdon on moyse. ge gelyfdon eac me; Soðlice he wrat be me. ⁴⁷ gif ge his stafum ne gelyfað. hu gelyfe ge minum wordum;