Proverbs 5:9 Cross References - HOT

⁹ פן תתן לאחרים הודך ושׁנתיך לאכזרי׃

Genesis 38:23-26

²³ ויאמר יהודה תקח לה פן נהיה לבוז הנה שׁלחתי הגדי הזה ואתה לא מצאתה׃²⁴ ויהי כמשׁלשׁ חדשׁים ויגד ליהודה לאמר זנתה תמר כלתך וגם הנה הרה לזנונים ויאמר יהודה הוציאוה ותשׂרף׃²⁵ הוא מוצאת והיא שׁלחה אל חמיה לאמר לאישׁ אשׁר אלה לו אנכי הרה ותאמר הכר נא למי החתמת והפתילים והמטה האלה׃²⁶ ויכר יהודה ויאמר צדקה ממני כי על כן לא נתתיה לשׁלה בני ולא יסף עוד לדעתה׃

Judges 16:19-21

¹⁹ ותישׁנהו על ברכיה ותקרא לאישׁ ותגלח את שׁבע מחלפות ראשׁו ותחל לענותו ויסר כחו מעליו׃²⁰ ותאמר פלשׁתים עליך שׁמשׁון ויקץ משׁנתו ויאמר אצא כפעם בפעם ואנער והוא לא ידע כי יהוה סר מעליו׃²¹ ויאחזוהו פלשׁתים וינקרו את עיניו ויורידו אותו עזתה ויאסרוהו בנחשׁתים ויהי טוחן בבית האסירים׃

Nehemiah 13:26

²⁶ הלוא על אלה חטא שׁלמה מלך ישׂראל ובגוים הרבים לא היה מלך כמהו ואהוב לאלהיו היה ויתנהו אלהים מלך על כל ישׂראל גם אותו החטיאו הנשׁים הנכריות׃

Proverbs 6:29-35

²⁹ כן הבא אל אשׁת רעהו לא ינקה כל הנגע׃³⁰ לא יבוזו לגנב כי יגנוב למלא נפשׁו כי ירעב׃³¹ ונמצא ישׁלם שׁבעתים את כל הון ביתו יתן׃³² נאף אשׁה חסר לב משׁחית נפשׁו הוא יעשׂנה׃³³ נגע וקלון ימצא וחרפתו לא תמחה׃³⁴ כי קנאה חמת גבר ולא יחמול ביום נקם׃³⁵ לא ישׂא פני כל כפר ולא יאבה כי תרבה שׁחד׃

Hosea 4:13-14

¹³ על ראשׁי ההרים יזבחו ועל הגבעות יקטרו תחת אלון ולבנה ואלה כי טוב צלה על כן תזנינה בנותיכם וכלותיכם תנאפנה׃¹⁴ לא אפקוד על בנותיכם כי תזנינה ועל כלותיכם כי תנאפנה כי הם עם הזנות יפרדו ועם הקדשׁות יזבחו ועם לא יבין ילבט׃