Numbers 1:47 Cross References - HOT

⁴⁷ והלוים למטה אבתם לא התפקדו בתוכם׃

³ מבן עשׂרים שׁנה ומעלה כל יצא צבא בישׂראל תפקדו אתם לצבאתם אתה ואהרן׃

⁵⁰ ואתה הפקד את הלוים על משׁכן העדת ועל כל כליו ועל כל אשׁר לו המה ישׂאו את המשׁכן ואת כל כליו והם ישׁרתהו וסביב למשׁכן יחנו׃

³³ והלוים לא התפקדו בתוך בני ישׂראל כאשׁר צוה יהוה את משׁה׃

¹ ואלה תולדת אהרן ומשׁה ביום דבר יהוה את משׁה בהר סיני׃² ואלה שׁמות בני אהרן הבכר נדב ואביהוא אלעזר ואיתמר׃³ אלה שׁמות בני אהרן הכהנים המשׁחים אשׁר מלא ידם לכהן׃⁴ וימת נדב ואביהוא לפני יהוה בהקרבם אשׁ זרה לפני יהוה במדבר סיני ובנים לא היו להם ויכהן אלעזר ואיתמר על פני אהרן אביהם׃⁵ וידבר יהוה אל משׁה לאמר׃⁶ הקרב את מטה לוי והעמדת אתו לפני אהרן הכהן ושׁרתו אתו׃⁷ ושׁמרו את משׁמרתו ואת משׁמרת כל העדה לפני אהל מועד לעבד את עבדת המשׁכן׃⁸ ושׁמרו את כל כלי אהל מועד ואת משׁמרת בני ישׂראל לעבד את עבדת המשׁכן׃⁹ ונתתה את הלוים לאהרן ולבניו נתונם נתונם המה לו מאת בני ישׂראל׃¹⁰ ואת אהרן ואת בניו תפקד ושׁמרו את כהנתם והזר הקרב יומת׃¹¹ וידבר יהוה אל משׁה לאמר׃¹² ואני הנה לקחתי את הלוים מתוך בני ישׂראל תחת כל בכור פטר רחם מבני ישׂראל והיו לי הלוים׃¹³ כי לי כל בכור ביום הכתי כל בכור בארץ מצרים הקדשׁתי לי כל בכור בישׂראל מאדם עד בהמה לי יהיו אני יהוה׃¹⁴ וידבר יהוה אל משׁה במדבר סיני לאמר׃¹⁵ פקד את בני לוי לבית אבתם למשׁפחתם כל זכר מבן חדשׁ ומעלה תפקדם׃¹⁶ ויפקד אתם משׁה על פי יהוה כאשׁר צוה׃¹⁷ ויהיו אלה בני לוי בשׁמתם גרשׁון וקהת ומררי׃¹⁸ ואלה שׁמות בני גרשׁון למשׁפחתם לבני ושׁמעי׃¹⁹ ובני קהת למשׁפחתם עמרם ויצהר חברון ועזיאל׃²⁰ ובני מררי למשׁפחתם מחלי ומושׁי אלה הם משׁפחת הלוי לבית אבתם׃²¹ לגרשׁון משׁפחת הלבני ומשׁפחת השׁמעי אלה הם משׁפחת הגרשׁני׃²² פקדיהם במספר כל זכר מבן חדשׁ ומעלה פקדיהם שׁבעת אלפים וחמשׁ מאות׃²³ משׁפחת הגרשׁני אחרי המשׁכן יחנו ימה׃²⁴ ונשׂיא בית אב לגרשׁני אליסף בן לאל׃²⁵ ומשׁמרת בני גרשׁון באהל מועד המשׁכן והאהל מכסהו ומסך פתח אהל מועד׃²⁶ וקלעי החצר ואת מסך פתח החצר אשׁר על המשׁכן ועל המזבח סביב ואת מיתריו לכל עבדתו׃²⁷ ולקהת משׁפחת העמרמי ומשׁפחת היצהרי ומשׁפחת החברני ומשׁפחת העזיאלי אלה הם משׁפחת הקהתי׃²⁸ במספר כל זכר מבן חדשׁ ומעלה שׁמנת אלפים ושׁשׁ מאות שׁמרי משׁמרת הקדשׁ׃²⁹ משׁפחת בני קהת יחנו על ירך המשׁכן תימנה׃³⁰ ונשׂיא בית אב למשׁפחת הקהתי אליצפן בן עזיאל׃³¹ ומשׁמרתם הארן והשׁלחן והמנרה והמזבחת וכלי הקדשׁ אשׁר ישׁרתו בהם והמסך וכל עבדתו׃³² ונשׂיא נשׂיאי הלוי אלעזר בן אהרן הכהן פקדת שׁמרי משׁמרת הקדשׁ׃³³ למררי משׁפחת המחלי ומשׁפחת המושׁי אלה הם משׁפחת מררי׃³⁴ ופקדיהם במספר כל זכר מבן חדשׁ ומעלה שׁשׁת אלפים ומאתים׃³⁵ ונשׂיא בית אב למשׁפחת מררי צוריאל בן אביחיל על ירך המשׁכן יחנו צפנה׃³⁶ ופקדת משׁמרת בני מררי קרשׁי המשׁכן ובריחיו ועמדיו ואדניו וכל כליו וכל עבדתו׃³⁷ ועמדי החצר סביב ואדניהם ויתדתם ומיתריהם׃³⁸ והחנים לפני המשׁכן קדמה לפני אהל מועד מזרחה משׁה ואהרן ובניו שׁמרים משׁמרת המקדשׁ למשׁמרת בני ישׂראל והזר הקרב יומת׃³⁹ כל פקודי הלוים אשׁר פקד משׁה ואהרן על פי יהוה למשׁפחתם כל זכר מבן חדשׁ ומעלה שׁנים ועשׂרים אלף׃⁴⁰ ויאמר יהוה אל משׁה פקד כל בכר זכר לבני ישׂראל מבן חדשׁ ומעלה ושׂא את מספר שׁמתם׃⁴¹ ולקחת את הלוים לי אני יהוה תחת כל בכר בבני ישׂראל ואת בהמת הלוים תחת כל בכור בבהמת בני ישׂראל׃⁴² ויפקד משׁה כאשׁר צוה יהוה אתו את כל בכור בבני ישׂראל׃⁴³ ויהי כל בכור זכר במספר שׁמת מבן חדשׁ ומעלה לפקדיהם שׁנים ועשׂרים אלף שׁלשׁה ושׁבעים ומאתים׃⁴⁴ וידבר יהוה אל משׁה לאמר׃⁴⁵ קח את הלוים תחת כל בכור בבני ישׂראל ואת בהמת הלוים תחת בהמתם והיו לי הלוים אני יהוה׃⁴⁶ ואת פדויי השׁלשׁה והשׁבעים והמאתים העדפים על הלוים מבכור בני ישׂראל׃⁴⁷ ולקחת חמשׁת חמשׁת שׁקלים לגלגלת בשׁקל הקדשׁ תקח עשׂרים גרה השׁקל׃⁴⁸ ונתתה הכסף לאהרן ולבניו פדויי העדפים׃⁴⁹ ויקח משׁה את כסף הפדיום מאת העדפים על פדויי הלוים׃

¹ וידבר יהוה אל משׁה ואל אהרן לאמר׃² נשׂא את ראשׁ בני קהת מתוך בני לוי למשׁפחתם לבית אבתם׃³ מבן שׁלשׁים שׁנה ומעלה ועד בן חמשׁים שׁנה כל בא לצבא לעשׂות מלאכה באהל מועד׃⁴ זאת עבדת בני קהת באהל מועד קדשׁ הקדשׁים׃⁵ ובא אהרן ובניו בנסע המחנה והורדו את פרכת המסך וכסו בה את ארן העדת׃⁶ ונתנו עליו כסוי עור תחשׁ ופרשׂו בגד כליל תכלת מלמעלה ושׂמו בדיו׃⁷ ועל שׁלחן הפנים יפרשׂו בגד תכלת ונתנו עליו את הקערת ואת הכפת ואת המנקית ואת קשׂות הנסך ולחם התמיד עליו יהיה׃⁸ ופרשׂו עליהם בגד תולעת שׁני וכסו אתו במכסה עור תחשׁ ושׂמו את בדיו׃⁹ ולקחו בגד תכלת וכסו את מנרת המאור ואת נרתיה ואת מלקחיה ואת מחתתיה ואת כל כלי שׁמנה אשׁר ישׁרתו \'ec\'e4¹⁰ ונתנו אתה ואת כל כליה אל מכסה עור תחשׁ ונתנו על המוט׃¹¹ ועל מזבח הזהב יפרשׂו בגד תכלת וכסו אתו במכסה עור תחשׁ ושׂמו את בדיו׃¹² ולקחו את כל כלי השׁרת אשׁר ישׁרתו בם בקדשׁ ונתנו אל בגד תכלת וכסו אותם במכסה עור תחשׁ ונתנו על המוט׃¹³ ודשׁנו את המזבח ופרשׂו עליו בגד ארגמן׃¹⁴ ונתנו עליו את כל כליו אשׁר ישׁרתו עליו בהם את המחתת את המזלגת ואת היעים ואת המזרקת כל כלי המזבח ופרשׂו עליו כסוי עור תחשׁ ושׂמו בדיו׃¹⁵ וכלה אהרן ובניו לכסת את הקדשׁ ואת כל כלי הקדשׁ בנסע המחנה ואחרי כן יבאו בני קהת לשׂאת ולא יגעו אל הקדשׁ ומתו אלה משׂא בני קהת באהל מועד׃¹⁶ ופקדת אלעזר בן אהרן הכהן שׁמן המאור וקטרת הסמים ומנחת התמיד ושׁמן המשׁחה פקדת כל המשׁכן וכל אשׁר בו בקדשׁ ובכליו׃¹⁷ וידבר יהוה אל משׁה ואל אהרן לאמר׃¹⁸ אל תכריתו את שׁבט משׁפחת הקהתי מתוך הלוים׃¹⁹ וזאת עשׂו להם וחיו ולא ימתו בגשׁתם את קדשׁ הקדשׁים אהרן ובניו יבאו ושׂמו אותם אישׁ אישׁ על עבדתו ואל משׂאו׃²⁰ ולא יבאו לראות כבלע את הקדשׁ ומתו׃²¹ וידבר יהוה אל משׁה לאמר׃²² נשׂא את ראשׁ בני גרשׁון גם הם לבית אבתם למשׁפחתם׃²³ מבן שׁלשׁים שׁנה ומעלה עד בן חמשׁים שׁנה תפקד אותם כל הבא לצבא צבא לעבד עבדה באהל מועד׃²⁴ זאת עבדת משׁפחת הגרשׁני לעבד ולמשׂא׃²⁵ ונשׂאו את יריעת המשׁכן ואת אהל מועד מכסהו ומכסה התחשׁ אשׁר עליו מלמעלה ואת מסך פתח אהל מועד׃²⁶ ואת קלעי החצר ואת מסך פתח שׁער החצר אשׁר על המשׁכן ועל המזבח סביב ואת מיתריהם ואת כל כלי עבדתם ואת כל אשׁר יעשׂה להם ועבדו׃²⁷ על פי אהרן ובניו תהיה כל עבדת בני הגרשׁני לכל משׂאם ולכל עבדתם ופקדתם עלהם במשׁמרת את כל משׂאם׃²⁸ זאת עבדת משׁפחת בני הגרשׁני באהל מועד ומשׁמרתם ביד איתמר בן אהרן הכהן׃²⁹ בני מררי למשׁפחתם לבית אבתם תפקד אתם׃³⁰ מבן שׁלשׁים שׁנה ומעלה ועד בן חמשׁים שׁנה תפקדם כל הבא לצבא לעבד את עבדת אהל מועד׃³¹ וזאת משׁמרת משׂאם לכל עבדתם באהל מועד קרשׁי המשׁכן ובריחיו ועמודיו ואדניו׃³² ועמודי החצר סביב ואדניהם ויתדתם ומיתריהם לכל כליהם ולכל עבדתם ובשׁמת תפקדו את כלי משׁמרת משׂאם׃³³ זאת עבדת משׁפחת בני מררי לכל עבדתם באהל מועד ביד איתמר בן אהרן הכהן׃³⁴ ויפקד משׁה ואהרן ונשׂיאי העדה את בני הקהתי למשׁפחתם ולבית אבתם׃³⁵ מבן שׁלשׁים שׁנה ומעלה ועד בן חמשׁים שׁנה כל הבא לצבא לעבדה באהל מועד׃³⁶ ויהיו פקדיהם למשׁפחתם אלפים שׁבע מאות וחמשׁים׃³⁷ אלה פקודי משׁפחת הקהתי כל העבד באהל מועד אשׁר פקד משׁה ואהרן על פי יהוה ביד משׁה׃³⁸ ופקודי בני גרשׁון למשׁפחותם ולבית אבתם׃³⁹ מבן שׁלשׁים שׁנה ומעלה ועד בן חמשׁים שׁנה כל הבא לצבא לעבדה באהל מועד׃⁴⁰ ויהיו פקדיהם למשׁפחתם לבית אבתם אלפים ושׁשׁ מאות ושׁלשׁים׃⁴¹ אלה פקודי משׁפחת בני גרשׁון כל העבד באהל מועד אשׁר פקד משׁה ואהרן על פי יהוה׃⁴² ופקודי משׁפחת בני מררי למשׁפחתם לבית אבתם׃⁴³ מבן שׁלשׁים שׁנה ומעלה ועד בן חמשׁים שׁנה כל הבא לצבא לעבדה באהל מועד׃⁴⁴ ויהיו פקדיהם למשׁפחתם שׁלשׁת אלפים ומאתים׃⁴⁵ אלה פקודי משׁפחת בני מררי אשׁר פקד משׁה ואהרן על פי יהוה ביד משׁה׃⁴⁶ כל הפקדים אשׁר פקד משׁה ואהרן ונשׂיאי ישׂראל את הלוים למשׁפחתם ולבית אבתם׃⁴⁷ מבן שׁלשׁים שׁנה ומעלה ועד בן חמשׁים שׁנה כל הבא לעבד עבדת עבדה ועבדת משׂא באהל מועד׃⁴⁸ ויהיו פקדיהם שׁמנת אלפים וחמשׁ מאות ושׁמנים׃⁴⁹ על פי יהוה פקד אותם ביד משׁה אישׁ אישׁ על עבדתו ועל משׂאו ופקדיו אשׁר צוה יהוה את משׁה׃

¹ וידבר יהוה אל משׁה לאמר׃² דבר אל אהרן ואמרת אליו בהעלתך את הנרת אל מול פני המנורה יאירו שׁבעת הנרות׃³ ויעשׂ כן אהרן אל מול פני המנורה העלה נרתיה כאשׁר צוה יהוה את משׁה׃⁴ וזה מעשׂה המנרה מקשׁה זהב עד ירכה עד פרחה מקשׁה הוא כמראה אשׁר הראה יהוה את משׁה כן עשׂה את המנרה׃⁵ וידבר יהוה אל משׁה לאמר׃⁶ קח את הלוים מתוך בני ישׂראל וטהרת אתם׃⁷ וכה תעשׂה להם לטהרם הזה עליהם מי חטאת והעבירו תער על כל בשׂרם וכבסו בגדיהם והטהרו׃⁸ ולקחו פר בן בקר ומנחתו סלת בלולה בשׁמן ופר שׁני בן בקר תקח לחטאת׃⁹ והקרבת את הלוים לפני אהל מועד והקהלת את כל עדת בני ישׂראל׃¹⁰ והקרבת את הלוים לפני יהוה וסמכו בני ישׂראל את ידיהם על הלוים׃¹¹ והניף אהרן את הלוים תנופה לפני יהוה מאת בני ישׂראל והיו לעבד את עבדת יהוה׃¹² והלוים יסמכו את ידיהם על ראשׁ הפרים ועשׂה את האחד חטאת ואת האחד עלה ליהוה לכפר על הלוים׃¹³ והעמדת את הלוים לפני אהרן ולפני בניו והנפת אתם תנופה ליהוה׃¹⁴ והבדלת את הלוים מתוך בני ישׂראל והיו לי הלוים׃¹⁵ ואחרי כן יבאו הלוים לעבד את אהל מועד וטהרת אתם והנפת אתם תנופה׃¹⁶ כי נתנים נתנים המה לי מתוך בני ישׂראל תחת פטרת כל רחם בכור כל מבני ישׂראל לקחתי אתם׃¹⁷ כי לי כל בכור בבני ישׂראל באדם ובבהמה ביום הכתי כל בכור בארץ מצרים הקדשׁתי אתם׃¹⁸ ואקח את הלוים תחת כל בכור בבני ישׂראל׃¹⁹ ואתנה את הלוים נתנים לאהרן ולבניו מתוך בני ישׂראל לעבד את עבדת בני ישׂראל באהל מועד ולכפר על בני ישׂראל ולא יהיה בבני ישׂראל נגף בגשׁת בני ישׂראל אל הקדשׁ׃²⁰ ויעשׂ משׁה ואהרן וכל עדת בני ישׂראל ללוים ככל אשׁר צוה יהוה את משׁה ללוים כן עשׂו להם בני ישׂראל׃²¹ ויתחטאו הלוים ויכבסו בגדיהם וינף אהרן אתם תנופה לפני יהוה ויכפר עליהם אהרן לטהרם׃²² ואחרי כן באו הלוים לעבד את עבדתם באהל מועד לפני אהרן ולפני בניו כאשׁר צוה יהוה את משׁה על הלוים כן עשׂו׃²³ וידבר יהוה אל משׁה לאמר׃²⁴ זאת אשׁר ללוים מבן חמשׁ ועשׂרים שׁנה ומעלה יבוא לצבא צבא בעבדת אהל מועד׃²⁵ ומבן חמשׁים שׁנה ישׁוב מצבא העבדה ולא יעבד עוד׃²⁶ ושׁרת את אחיו באהל מועד לשׁמר משׁמרת ועבדה לא יעבד ככה תעשׂה ללוים במשׁמרתם׃

⁵⁷ ואלה פקודי הלוי למשׁפחתם לגרשׁון משׁפחת הגרשׁני לקהת משׁפחת הקהתי למררי משׁפחת המררי׃⁵⁸ אלה משׁפחת לוי משׁפחת הלבני משׁפחת החברני משׁפחת המחלי משׁפחת המושׁי משׁפחת הקרחי וקהת הולד את עמרם׃⁵⁹ ושׁם אשׁת עמרם יוכבד בת לוי אשׁר ילדה אתה ללוי במצרים ותלד לעמרם את אהרן ואת משׁה ואת מרים אחתם׃⁶⁰ ויולד לאהרן את נדב ואת אביהוא את אלעזר ואת איתמר׃⁶¹ וימת נדב ואביהוא בהקריבם אשׁ זרה לפני יהוה׃⁶² ויהיו פקדיהם שׁלשׁה ועשׂרים אלף כל זכר מבן חדשׁ ומעלה כי לא התפקדו בתוך בני ישׂראל כי לא נתן להם נחלה בתוך בני ישׂראל׃

¹ (5:27) בני לוי גרשׁון קהת ומררי׃² (5:28) ובני קהת עמרם יצהר וחברון ועזיאל׃³ (5:29) ובני עמרם אהרן ומשׁה ומרים ובני אהרן נדב ואביהוא אלעזר ואיתמר׃⁴ (5:30) אלעזר הוליד את פינחס פינחס הליד את אבישׁוע׃⁵ (5:31) ואבישׁוע הוליד את בקי ובקי הוליד את עזי׃⁶ (5:32) ועזי הוליד את זרחיה וזרחיה הוליד את מריות׃⁷ (5:33) מריות הוליד את אמריה ואמריה הוליד את אחיטוב׃⁸ (5:34) ואחיטוב הוליד את צדוק וצדוק הוליד את אחימעץ׃⁹ (5:35) ואחימעץ הוליד את עזריה ועזריה הוליד את יוחנן׃¹⁰ (5:36) ויוחנן הוליד את עזריה הוא אשׁר כהן בבית אשׁר בנה שׁלמה בירושׁלם׃¹¹ (5:37) ויולד עזריה את אמריה ואמריה הוליד את אחיטוב׃¹² (5:38) ואחיטוב הוליד את צדוק וצדוק הוליד את שׁלום׃¹³ (5:39) ושׁלום הוליד את חלקיה וחלקיה הוליד את עזריה׃¹⁴ (5:40) ועזריה הוליד את שׂריה ושׂריה הוליד את יהוצדק׃¹⁵ (5:41) ויהוצדק הלך בהגלות יהוה את יהודה וירושׁלם ביד נבכדנאצר׃¹⁶ (6:1) בני לוי גרשׁם קהת ומררי׃¹⁷ (6:2) ואלה שׁמות בני גרשׁום לבני ושׁמעי׃¹⁸ (6:3) ובני קהת עמרם ויצהר וחברון ועזיאל׃¹⁹ (6:4) בני מררי מחלי ומשׁי ואלה משׁפחות הלוי לאבותיהם׃²⁰ (6:5) לגרשׁום לבני בנו יחת בנו זמה בנו׃²¹ (6:6) יואח בנו עדו בנו זרח בנו יאתרי בנו׃²² (6:7) בני קהת עמינדב בנו קרח בנו אסיר בנו׃²³ (6:8) אלקנה בנו ואביסף בנו ואסיר בנו׃²⁴ (6:9) תחת בנו אוריאל בנו עזיה בנו ושׁאול בנו׃²⁵ (6:10) ובני אלקנה עמשׂי ואחימות׃²⁶ (6:11) אלקנה בנו אלקנה צופי בנו ונחת בנו׃²⁷ (6:12) אליאב בנו ירחם בנו אלקנה בנו׃²⁸ (6:13) ובני שׁמואל הבכר ושׁני ואביה׃²⁹ (6:14) בני מררי מחלי לבני בנו שׁמעי בנו עזה בנו׃³⁰ (6:15) שׁמעא בנו חגיה בנו עשׂיה בנו׃³¹ (6:16) ואלה אשׁר העמיד דויד על ידי שׁיר בית יהוה ממנוח הארון׃³² (6:17) ויהיו משׁרתים לפני משׁכן אהל מועד בשׁיר עד בנות שׁלמה את בית יהוה בירושׁלם ויעמדו כמשׁפטם על עבודתם׃³³ (6:18) ואלה העמדים ובניהם מבני הקהתי הימן המשׁורר בן יואל בן שׁמואל׃³⁴ (6:19) בן אלקנה בן ירחם בן אליאל בן תוח׃³⁵ (6:20) בן ציף בן אלקנה בן מחת בן עמשׂי׃³⁶ (6:21) בן אלקנה בן יואל בן עזריה בן צפניה׃³⁷ (6:22) בן תחת בן אסיר בן אביסף בן קרח׃³⁸ (6:23) בן יצהר בן קהת בן לוי בן ישׂראל׃³⁹ (6:24) ואחיו אסף העמד על ימינו אסף בן ברכיהו בן שׁמעא׃⁴⁰ (6:25) בן מיכאל בן בעשׂיה בן מלכיה׃⁴¹ (6:26) בן אתני בן זרח בן עדיה׃⁴² (6:27) בן איתן בן זמה בן שׁמעי׃⁴³ (6:28) בן יחת בן גרשׁם בן לוי׃⁴⁴ (6:29) ובני מררי אחיהם על השׂמאול איתן בן קישׁי בן עבדי בן מלוך׃⁴⁵ (6:30) בן חשׁביה בן אמציה בן חלקיה׃⁴⁶ (6:31) בן אמצי בן בני בן שׁמר׃⁴⁷ (6:32) בן מחלי בן מושׁי בן מררי בן לוי׃⁴⁸ (6:33) ואחיהם הלוים נתונים לכל עבודת משׁכן בית האלהים׃⁴⁹ (6:34) ואהרן ובניו מקטירים על מזבח העולה ועל מזבח הקטרת לכל מלאכת קדשׁ הקדשׁים ולכפר על ישׂראל ככל אשׁר צוה משׁה עבד האלהים׃⁵⁰ (6:35) ואלה בני אהרן אלעזר בנו פינחס בנו אבישׁוע בנו׃⁵¹ (6:36) בקי בנו עזי בנו זרחיה בנו׃⁵² (6:37) מריות בנו אמריה בנו אחיטוב בנו׃⁵³ (6:38) צדוק בנו אחימעץ בנו׃⁵⁴ (6:39) ואלה מושׁבותם לטירותם בגבולם לבני אהרן למשׁפחת הקהתי כי להם היה הגורל׃⁵⁵ (6:40) ויתנו להם את חברון בארץ יהודה ואת מגרשׁיה סביבתיה׃⁵⁶ (6:41) ואת שׂדה העיר ואת חצריה נתנו לכלב בן יפנה׃⁵⁷ (6:42) ולבני אהרן נתנו את ערי המקלט את חברון ואת לבנה ואת מגרשׁיה ואת יתר ואת אשׁתמע ואת מגרשׁיה׃⁵⁸ (6:43) ואת חילז ואת מגרשׁיה את דביר ואת מגרשׁיה׃⁵⁹ (6:44) ואת עשׁן ואת מגרשׁיה ואת בית שׁמשׁ ואת מגרשׁיה׃⁶⁰ (6:45) וממטה בנימן את גבע ואת מגרשׁיה ואת עלמת ואת מגרשׁיה ואת ענתות ואת מגרשׁיה כל עריהם שׁלשׁ עשׂרה עיר במשׁפחותיהם׃⁶¹ (6:46) ולבני קהת הנותרים ממשׁפחת המטה ממחצית מטה חצי מנשׁה בגורל ערים עשׂר׃⁶² (6:47) ולבני גרשׁום למשׁפחותם ממטה ישׂשכר וממטה אשׁר וממטה נפתלי וממטה מנשׁה בבשׁן ערים שׁלשׁ עשׂרה׃⁶³ (6:48) לבני מררי למשׁפחותם ממטה ראובן וממטה גד וממטה זבולן בגורל ערים שׁתים עשׂרה׃⁶⁴ (6:49) ויתנו בני ישׂראל ללוים את הערים ואת מגרשׁיהם׃⁶⁵ (6:50) ויתנו בגורל ממטה בני יהודה וממטה בני שׁמעון וממטה בני בנימן את הערים האלה אשׁר יקראו אתהם בשׁמות׃⁶⁶ (6:51) וממשׁפחות בני קהת ויהי ערי גבולם ממטה אפרים׃⁶⁷ (6:52) ויתנו להם את ערי המקלט את שׁכם ואת מגרשׁיה בהר אפרים ואת גזר ואת מגרשׁיה׃⁶⁸ (6:53) ואת יקמעם ואת מגרשׁיה ואת בית חורון ואת מגרשׁיה׃⁶⁹ (6:54) ואת אילון ואת מגרשׁיה ואת גת רמון ואת מגרשׁיה׃⁷⁰ (6:55) וממחצית מטה מנשׁה את ענר ואת מגרשׁיה ואת בלעם ואת מגרשׁיה למשׁפחת לבני קהת הנותרים׃⁷¹ (6:56) לבני גרשׁום ממשׁפחת חצי מטה מנשׁה את גולן בבשׁן ואת מגרשׁיה ואת עשׁתרות ואת מגרשׁיה׃⁷² (6:57) וממטה ישׂשכר את קדשׁ ואת מגרשׁיה את דברת ואת מגרשׁיה׃⁷³ (6:58) ואת ראמות ואת מגרשׁיה ואת ענם ואת מגרשׁיה׃⁷⁴ (6:59) וממטה אשׁר את משׁל ואת מגרשׁיה ואת עבדון ואת מגרשׁיה׃⁷⁵ (6:60) ואת חוקק ואת מגרשׁיה ואת רחב ואת מגרשׁיה׃⁷⁶ (6:61) וממטה נפתלי את קדשׁ בגליל ואת מגרשׁיה ואת חמון ואת מגרשׁיה ואת קריתים ואת מגרשׁיה׃⁷⁷ (6:62) לבני מררי הנותרים ממטה זבולן את רמונו ואת מגרשׁיה את תבור ואת מגרשׁיה׃⁷⁸ (6:63) ומעבר לירדן ירחו למזרח הירדן ממטה ראובן את בצר במדבר ואת מגרשׁיה ואת יהצה ואת מגרשׁיה׃⁷⁹ (6:64) ואת קדמות ואת מגרשׁיה ואת מיפעת ואת מגרשׁיה׃⁸⁰ (6:65) וממטה גד את ראמות בגלעד ואת מגרשׁיה ואת מחנים ואת מגרשׁיה׃⁸¹ (6:66) ואת חשׁבון ואת מגרשׁיה ואת יעזיר ואת מגרשׁיה׃

⁶ ולוי ובנימן לא פקד בתוכם כי נתעב דבר המלך את יואב׃