Deuteronomy 7:12 Cross References - HOT

¹² והיה עקב תשׁמעון את המשׁפטים האלה ושׁמרתם ועשׂיתם אתם ושׁמר יהוה אלהיך לך את הברית ואת החסד אשׁר נשׁבע לאבתיך׃

Leviticus 26:3-13

³ אם בחקתי תלכו ואת מצותי תשׁמרו ועשׂיתם אתם׃⁴ ונתתי גשׁמיכם בעתם ונתנה הארץ יבולה ועץ השׂדה יתן פריו׃⁵ והשׂיג לכם דישׁ את בציר ובציר ישׂיג את זרע ואכלתם לחמכם לשׂבע וישׁבתם לבטח בארצכם׃⁶ ונתתי שׁלום בארץ ושׁכבתם ואין מחריד והשׁבתי חיה רעה מן הארץ וחרב לא תעבר בארצכם׃⁷ ורדפתם את איביכם ונפלו לפניכם לחרב׃⁸ ורדפו מכם חמשׁה מאה ומאה מכם רבבה ירדפו ונפלו איביכם לפניכם לחרב׃⁹ ופניתי אליכם והפריתי אתכם והרביתי אתכם והקימתי את בריתי אתכם׃¹⁰ ואכלתם ישׁן נושׁן וישׁן מפני חדשׁ תוציאו׃¹¹ ונתתי משׁכני בתוככם ולא תגעל נפשׁי אתכם׃¹² והתהלכתי בתוככם והייתי לכם לאלהים ואתם תהיו לי לעם׃¹³ אני יהוה אלהיכם אשׁר הוצאתי אתכם מארץ מצרים מהית להם עבדים ואשׁבר מטת עלכם ואולך אתכם קוממיות׃

Deuteronomy 7:9

⁹ וידעת כי יהוה אלהיך הוא האלהים האל הנאמן שׁמר הברית והחסד לאהביו ולשׁמרי מצותו לאלף דור׃

Deuteronomy 28:1-14

¹ והיה אם שׁמוע תשׁמע בקול יהוה אלהיך לשׁמר לעשׂות את כל מצותיו אשׁר אנכי מצוך היום ונתנך יהוה אלהיך עליון על כל גויי הארץ׃² ובאו עליך כל הברכות האלה והשׂיגך כי תשׁמע בקול יהוה אלהיך׃³ ברוך אתה בעיר וברוך אתה בשׂדה׃⁴ ברוך פרי בטנך ופרי אדמתך ופרי בהמתך שׁגר אלפיך ועשׁתרות צאנך׃⁵ ברוך טנאך ומשׁארתך׃⁶ ברוך אתה בבאך וברוך אתה בצאתך׃⁷ יתן יהוה את איביך הקמים עליך נגפים לפניך בדרך אחד יצאו אליך ובשׁבעה דרכים ינוסו לפניך׃⁸ יצו יהוה אתך את הברכה באסמיך ובכל משׁלח ידך וברכך בארץ אשׁר יהוה אלהיך נתן׃⁹ יקימך יהוה לו לעם קדושׁ כאשׁר נשׁבע לך כי תשׁמר את מצות יהוה אלהיך והלכת בדרכיו׃¹⁰ וראו כל עמי הארץ כי שׁם יהוה נקרא עליך ויראו ממך׃¹¹ והותרך יהוה לטובה בפרי בטנך ובפרי בהמתך ובפרי אדמתך על האדמה אשׁר נשׁבע יהוה לאבתיך לתת׃¹² יפתח יהוה לך את אוצרו הטוב את השׁמים לתת מטר ארצך בעתו ולברך את כל מעשׂה ידך והלוית גוים רבים ואתה לא תלוה׃¹³ ונתנך יהוה לראשׁ ולא לזנב והיית רק למעלה ולא תהיה למטה כי תשׁמע אל מצות יהוה אלהיך אשׁר אנכי מצוך היום לשׁמר ולעשׂות׃¹⁴ ולא תסור מכל הדברים אשׁר אנכי מצוה אתכם היום ימין ושׂמאול ללכת אחרי אלהים אחרים לעבדם׃

Psalms 105:8-10

⁸ זכר לעולם בריתו דבר צוה לאלף דור׃⁹ אשׁר כרת את אברהם ושׁבועתו לישׂחק׃¹⁰ ויעמידה ליעקב לחק לישׂראל ברית עולם׃

Micah 7:20

²⁰ תתן אמת ליעקב חסד לאברהם אשׁר נשׁבעת לאבתינו מימי קדם׃