2 Chronicles 35:4 Cross References - HOT

⁴ והכונו לבית אבותיכם כמחלקותיכם בכתב דויד מלך ישׂראל ובמכתב שׁלמה בנו׃

1 Chronicles 9:10-34

¹⁰ ומן הכהנים ידעיה ויהויריב ויכין׃¹¹ ועזריה בן חלקיה בן משׁלם בן צדוק בן מריות בן אחיטוב נגיד בית האלהים׃¹² ועדיה בן ירחם בן פשׁחור בן מלכיה ומעשׂי בן עדיאל בן יחזרה בן משׁלם בן משׁלמית בן אמר׃¹³ ואחיהם ראשׁים לבית אבותם אלף ושׁבע מאות ושׁשׁים גבורי חיל מלאכת עבודת בית האלהים׃¹⁴ ומן הלוים שׁמעיה בן חשׁוב בן עזריקם בן חשׁביה מן בני מררי׃¹⁵ ובקבקר חרשׁ וגלל ומתניה בן מיכא בן זכרי בן אסף׃¹⁶ ועבדיה בן שׁמעיה בן גלל בן ידותון וברכיה בן אסא בן אלקנה היושׁב בחצרי נטופתי׃¹⁷ והשׁערים שׁלום ועקוב וטלמן ואחימן ואחיהם שׁלום הראשׁ׃¹⁸ ועד הנה בשׁער המלך מזרחה המה השׁערים למחנות בני לוי׃¹⁹ ושׁלום בן קורא בן אביסף בן קרח ואחיו לבית אביו הקרחים על מלאכת העבודה שׁמרי הספים לאהל ואבתיהם על מחנה יהוה שׁמרי המבוא׃²⁰ ופינחס בן אלעזר נגיד היה עליהם לפנים יהוה עמו׃²¹ זכריה בן משׁלמיה שׁער פתח לאהל מועד׃²² כלם הברורים לשׁערים בספים מאתים ושׁנים עשׂר המה בחצריהם התיחשׂם המה יסד דויד ושׁמואל הראה באמונתם׃²³ והם ובניהם על השׁערים לבית יהוה לבית האהל למשׁמרות׃²⁴ לארבע רוחות יהיו השׁערים מזרח ימה צפונה ונגבה׃²⁵ ואחיהם בחצריהם לבוא לשׁבעת הימים מעת אל עת עם אלה׃²⁶ כי באמונה המה ארבעת גברי השׁערים הם הלוים והיו על הלשׁכות ועל האצרות בית האלהים׃²⁷ וסביבות בית האלהים ילינו כי עליהם משׁמרת והם על המפתח ולבקר לבקר׃²⁸ ומהם על כלי העבודה כי במספר יביאום ובמספר יוציאום׃²⁹ ומהם ממנים על הכלים ועל כל כלי הקדשׁ ועל הסלת והיין והשׁמן והלבונה והבשׂמים׃³⁰ ומן בני הכהנים רקחי המרקחת לבשׂמים׃³¹ ומתתיה מן הלוים הוא הבכור לשׁלם הקרחי באמונה על מעשׂה החבתים׃³² ומן בני הקהתי מן אחיהם על לחם המערכת להכין שׁבת שׁבת׃³³ ואלה המשׁררים ראשׁי אבות ללוים בלשׁכת פטירים כי יומם ולילה עליהם במלאכה׃³⁴ אלה ראשׁי האבות ללוים לתלדותם ראשׁים אלה ישׁבו בירושׁלם׃

1 Chronicles 23:1-26

¹ ודויד זקן ושׂבע ימים וימלך את שׁלמה בנו על ישׂראל׃² ויאסף את כל שׂרי ישׂראל והכהנים והלוים׃³ ויספרו הלוים מבן שׁלשׁים שׁנה ומעלה ויהי מספרם לגלגלתם לגברים שׁלשׁים ושׁמונה אלף׃⁴ מאלה לנצח על מלאכת בית יהוה עשׂרים וארבעה אלף ושׁטרים ושׁפטים שׁשׁת אלפים׃⁵ וארבעת אלפים שׁערים וארבעת אלפים מהללים ליהוה בכלים אשׁר עשׂיתי להלל׃⁶ ויחלקם דויד מחלקות לבני לוי לגרשׁון קהת ומררי׃⁷ לגרשׁני לעדן ושׁמעי׃⁸ בני לעדן הראשׁ יחיאל וזתם ויואל שׁלשׁה׃⁹ בני שׁמעי שׁלמות וחזיאל והרן שׁלשׁה אלה ראשׁי האבות ללעדן׃¹⁰ ובני שׁמעי יחת זינא ויעושׁ ובריעה אלה בני שׁמעי ארבעה׃¹¹ ויהי יחת הראשׁ וזיזה השׁני ויעושׁ ובריעה לא הרבו בנים ויהיו לבית אב לפקדה אחת׃¹² בני קהת עמרם יצהר חברון ועזיאל ארבעה׃¹³ בני עמרם אהרן ומשׁה ויבדל אהרן להקדישׁו קדשׁ קדשׁים הוא ובניו עד עולם להקטיר לפני יהוה לשׁרתו ולברך בשׁמו עד עולם׃¹⁴ ומשׁה אישׁ האלהים בניו יקראו על שׁבט הלוי׃¹⁵ בני משׁה גרשׁם ואליעזר׃¹⁶ בני גרשׁום שׁבואל הראשׁ׃¹⁷ ויהיו בני אליעזר רחביה הראשׁ ולא היה לאליעזר בנים אחרים ובני רחביה רבו למעלה׃¹⁸ בני יצהר שׁלמית הראשׁ׃¹⁹ בני חברון יריהו הראשׁ אמריה השׁני יחזיאל השׁלישׁי ויקמעם הרביעי׃²⁰ בני עזיאל מיכה הראשׁ וישׁיה השׁני׃²¹ בני מררי מחלי ומושׁי בני מחלי אלעזר וקישׁ׃²² וימת אלעזר ולא היו לו בנים כי אם בנות וישׂאום בני קישׁ אחיהם׃²³ בני מושׁי מחלי ועדר וירמות שׁלשׁה׃²⁴ אלה בני לוי לבית אבתיהם ראשׁי האבות לפקודיהם במספר שׁמות לגלגלתם עשׂה המלאכה לעבדת בית יהוה מבן עשׂרים שׁנה ומעלה׃²⁵ כי אמר דויד הניח יהוה אלהי ישׂראל לעמו וישׁכן בירושׁלם עד לעולם׃²⁶ וגם ללוים אין לשׂאת את המשׁכן ואת כל כליו לעבדתו׃

1 Chronicles 24:1

¹ ולבני אהרן מחלקותם בני אהרן נדב ואביהוא אלעזר ואיתמר׃

2 Chronicles 8:14

¹⁴ ויעמד כמשׁפט דויד אביו את מחלקות הכהנים על עבדתם והלוים על משׁמרותם להלל ולשׁרת נגד הכהנים לדבר יום ביומו והשׁוערים במחלקותם לשׁער ושׁער כי כן מצות דויד אישׁ האלהים׃

Nehemiah 11:10-20

¹⁰ מן הכהנים ידעיה בן יויריב יכין׃¹¹ שׂריה בן חלקיה בן משׁלם בן צדוק בן מריות בן אחיטוב נגד בית האלהים׃¹² ואחיהם עשׂי המלאכה לבית שׁמנה מאות עשׂרים ושׁנים ועדיה בן ירחם בן פלליה בן אמצי בן זכריה בן פשׁחור בן מלכיה׃¹³ ואחיו ראשׁים לאבות מאתים ארבעים ושׁנים ועמשׁסי בן עזראל בן אחזי בן משׁלמות בן אמר׃¹⁴ ואחיהם גבורי חיל מאה עשׂרים ושׁמנה ופקיד עליהם זבדיאל בן הגדולים׃¹⁵ ומן הלוים שׁמעיה בן חשׁוב בן עזריקם בן חשׁביה בן בוני׃¹⁶ ושׁבתי ויוזבד על המלאכה החיצנה לבית האלהים מראשׁי הלוים׃¹⁷ ומתניה בן מיכה בן זבדי בן אסף ראשׁ התחלה יהודה לתפלה ובקבקיה משׁנה מאחיו ועבדא בן שׁמוע בן גלל בן ידיתון׃¹⁸ כל הלוים בעיר הקדשׁ מאתים שׁמנים וארבעה׃¹⁹ והשׁוערים עקוב טלמון ואחיהם השׁמרים בשׁערים מאה שׁבעים ושׁנים׃²⁰ ושׁאר ישׂראל הכהנים הלוים בכל ערי יהודה אישׁ בנחלתו׃