Bible verses about "cleanliness" | WestSaxon990

² & þa hi ge-sawon sume of his leorning-cnihton besmitenum handum þt is ünþwogenum handum etan. hi tældon hi & cwædon; ³ Pharisei & ealle iudeas ne etað buton hi hyra handa gelomlice þwean. healdende hyra yldrena gesetnessa. ⁴ & on stræte hi ne etað buton hi geþwegene beon. & manega oþre synd þe him gesette synt. þt is calicea frymða. & ceaca. & ärfata. & mæstlinga; ⁵ And þa axodon hine pharisei & þa boceras. hwi ne gað þine leorning-cnihtas æfter ure yldrena gesetnysse. ac besmitenum handum hyra hlaf þicgað; ⁶ Ða andswarode he him; Wel witegod isaias be eow licceterum swa hit awriten is; Þis folc me mid welerum wurðað. soðlice hyra heorte is feor fram me. ⁷ on idel hi me wurðiað. & manna läre & bebodu lærað; ⁸ Soþlice ge forlætað godes bebod. & healdað manna laga. þweala ceaca & calica. & manega oþre þylce ðing ge doð; ⁹ Ða sæde he him. wel ge on idel dydon godes bebod þt ge eower laga healdon; ¹⁰ Moyses cwæð. wurða þinne fæder & þine modor. & se ðe wyrigþ his fæder & his modor. swelte se deaþe; ¹¹ Soðlice ge cweþað. gif hwa segð his fæder & meder corbän þt is on ure geðeode gyfu. gif hwylc is of me þe fremað. ¹² & ofer þt ge ne lætað hine ænig þing dön his fæder oððe meder ¹³ toslitende godes bebod. for eower stüntan lage þe ge gesetton. & manega oþre þing ðysum gelice ge doð; ¹⁴ And eft þa menegu he him toclypode & cwæð; Ge-hyraþ me ealle & ongytað; ¹⁵ Nis nän þing of þam men on hine gangende þt hine besmïtan mæge; Ac þa ðing þe of ðam men forð-gað. þa hine besmitað. ¹⁶ gif hwa earan hæbbe gehlyste me; ¹⁷ And þa se hælend fram þære menegu eode his leorning-cnihtas hine än big-spell ahsodon; ¹⁸ Þa cwæð he. & synt ge þus ungleawe ne on-gyte ge. þt eall þæt utan cymð on þone man gangende. ne mæg hine besmitan. ¹⁹ forþam hit ne gæð on his heortan. ac on his innoð. & on forð-gang gewïteð ealle mettas clænsigende; ²⁰ Ða sæde he him þt ða þing ðe of þam men gað. þa hine besmitað; ²¹ Innan of manna heortan. yfele geþancas cumað. unriht-hæmedu. & forligeru. manslihtas. ²² [stala.] gytsung. män. facnu. sceamleast. yfel gesihð. dysinessa. ofer-modignessa. stuntscipe. ²³ & ealle þas yfelu of þam innoðe cumað & þone man besmitað; ²⁴ ne deme ge be ansyne ac demað rihtne dom;

²⁶ Eala þu blinda phariseus. clænsa æryst þt wið-innan ys calicys & discys þt hyt si clæne þt wið-utan ys;

⁸ Eadige synt þa clæn-heortan. for-þam þe hï god ge-seoð;