Bible verses about "unforgiveness" | WestSaxon1175

²¹ Ða ge-nehlahte petrus to hym & cwæð. drihten gyf min broðer synegað wið me mot ic hit hym for-gyfan oððet seofe syþan. ²² Ða cwæð se hælend. ne segge ic þe oððe seofan siðas. ac oððe seofen hund-seofentig siðan. ²³ For-þam ys heofene riche an-lich þam kyninge þe his þeowas ge-gaderede. ²⁴ & þa he þt ge-rad sette. hym wæs an broht se him scolde teon þusend punde. ²⁵ & þa he næfde hwær-mid he hyt agulde. hym het his hlaford ge-syllan & his wif & his chyld. & eall þæt he ahte. ²⁶ Ða strehte se þeow hine. & cwæð. Hlaford hafe ge-þyld on me. & ich hit þe eall agylde. ²⁷ Þa ge-miltsede se hlaford hym & for-gef hym eall þanne gylt. ²⁸ Ða se þeowe ut-eode he ge-mette hys efen-þeowan. se hym scolde an hund panegan. & he nam hine þa & for-þresmede hine. & cwæð. Agyf þæt þu me scelt. ²⁹ Ænd þa astrehte hys efen-þeowa hine. & bæd hine. and þus cwæð. Ge-þyldiga. & ic hit þe all agyfe. ³⁰ He þa nolde ac ferde & warp hine on cwærterne oððe þt he him eall agulde & gyfe. ³¹ Ða ge-seagen his efen (sic) þæt. þa wæren hyo swiðe ge-unrotsode. and coman & sægden heore hlaforde ealle þa dæden. ³² Ða cleopede hys hlaford hine & cwæð to hym. Eala þu leðra þeowa ealne þinne gelt ic þe for-gef for-þam þe þu me bæde. ³³ Hu ne ge-berede þe ge-myltsian þine efen-þeowan. swa swa ich þe gemyltsede. ³⁴ Ða wæs se hlaford eorre. & sealde hine þam wicneren (sic). oð ðæt he eall agulde. ³⁵ Swa doð min se heofenlice fæder gyf ge of eowren heorten eowren broðren ne for-gyfað.

¹² & forgyf us ure geltas swa swa we forgyfeð ure geltenden.

¹⁴ Witodlice gyf ge forgyfeð mannan heora synnan. þonne forgyfeð eowre se heofenlice fæder eow eowre geltes. ¹⁵ Gyf ge soðlice ne for-gyfeð mannen. ne owre fæder ne for-gyfeð eow owre synna.

²⁵ And þanne ge standed eow to ge-byddenne. for-gyfeð gyf ge hwæt agen anigene hæbbeð. þæt eow eower senne for-gieue. eower hefenlice fæder se þe on heofene ys.