Bible verses about "recovery" | WestSaxon1175

²⁰ Ða cwæð se hælend beo-seonde to hys leorning-cnihton. Eadige synde ge þearfen on gaste. for þan þe godes rïce is eower. ²¹ Eadige synde ge þe hingrieð nu. for þam ge beoð ge-fyllede. Eadige synde ge þe nu wepad; for þam ge hlyhað.

¹² Þa cwæð he to þam þe hine in laðede. Þanne þu dest wyste oððe ferme. ne cleope þu þine freond ne þine broðre. ne þine cuðan. ne þine welegen. nehhebures. þe-læs hyo þe agen laðian & þu hæbbe edlean. ¹³ Ac þanne þu beorscype do; cleope þearfen & wanhæften & healte & blinde. ¹⁴ þanne beost þu eadig. for-þan þe hyo næbbed hwanen hyo hit þe folgeldon (sic). Soðlice hit beoð þe for-golden on riht-wisra ariste.

⁷ Ne wundre þu for þan þe ic segge þe. eow ge-bered þæt ge beon akende eadniwan. ⁸ Gast or-eðað þær he wile. & þu ge-hyrst hys stefne. & þu nast hwanen he cymð. ne hwyder he geð. swa ys ælc þe akenned is of gaste. ⁹ Ða andswerede Nichodemus & cwæð. hu magen þas þing þus ge-wurðon. ¹⁰ Se hælend answerede & cwæð to hym. Ðu eart lareow israele folke & þu nast þas þïng. ¹¹ Soð ic þe segge þæt we sprecað þt we witeð. & we keðeð þæt we ge-sawon. & ge ne under-foð ure cyðnisse. ¹² Gif ic eow eordlice þïng sægde & ge ne lifeð. Hu-mæte ge-lefe ge gif ic eow hefenlice þing segge. ¹³ & nan man nastigð to heofene buten se þe nyðer com of heofene. Mannes sunu se þe com of heofonum ¹⁴ ænd swa swa moyses þa neddre up ä-hof on þam westene. swa ge-bereð þæt mannes sunu beo up a-hafen. ¹⁵ þæt nan þare ne for-wurðe þe on hine ge-lefð ac habbe þæt eche lyf. ¹⁶ God lufede middan-eard swa þæt he sealde hys akennedan sune þæt nan ne for-wurðe þe on hine ge-lefð. Ac habbe þt eche lyf. ¹⁷ Ne sende god hys sune on middan-earde þæt he demde midden-earde. ac þt middan-eard sy ge-haled þurh hyne. ¹⁸ ne byð þam ge-demed þe on hym ge-lyfð. Se þe ge ne lyfð (sic) hym. byð ge-demed. for-þan þe he ne lyfde on þanne namen þas akennedan godes sunu.

¹⁶ Ða com he to nazareth. þær he afed wæs. & he eode on reste-däige on þa ge-samnenge æfter his ge-wunen. & he aras þt he rædde. ¹⁷ & hym wæs ge-seald ysaias boc þas witegan. & sona swa he þa boc unfeld þa funde he þær awriten; ¹⁸ drihtnes gast is ofer me for þan he smerede me. He sende me þærfen bodian. & ge-hæften alysendnysse. & blinden ge-sihðe. for-brokene ge-hælen. ¹⁹ & bodian drihtnes anfenge gear & edleanes daig. ²⁰ And þa he þa boc be-feold he hye þam þeigne sealde & agef & sæt. & ealre hire eagen on þare samnunge wæren on hine be-healdende. ²¹ Ða on-gan he heom to cwædene. Soðlice to daig ys þis writ on eowren earen ge-fylled.