Bible verses about "control" | WestSaxon1175

⁵² Þa cwæð se hælend to hym. Do þin sweord on his scæðe. Witodlice ealle þa þe sweord nymað. mid sweorde hyo forwurðeð. ⁵³ Wenst þu þæt ic ne mihte byddan minne fæder þt he sende me nu ma þanne twelf eorde ængle. ⁵⁴ hu magen beon gefylde þa halgen gewrite. þe be me awritene synde. for-ðan þus hit byrað to beonne.

¹ Ða comen to hym farisej & sume bokeres cumende fram ierusalem. ² & þa hyo ge-seagen sume of his leorning-cnihten be-smitene handen þt is un-þwogenen handen æten. hyo telden hyo & cwæðen. ³ Farisej & ealle iudeas ne æteð buton hyo heore hande ge-lomlice þwean healdende heora yldre ge-setnysse. ⁴ & on stræte hi ne ætað. buton hyo geþwegen beon. & manege oðre synde þe heom ge-sette synde. þt is calice frymþa & ceaca. & apfata & manslage. (sic). ⁵ Ac þa axode hine farisej & þa boceres hwi ne gad þine leorning-cnihtes æfter ure yldrena ge-setnysse. ac be-smitenen handen heora hlaf þiggieð. ⁶ Ða andswerede he heom. Wel witegede ysaias be eow liceteren swa hit awriten is. Ðis folc me mid weleren wurðed. soðlice heore heorten his feor fram me. ⁷ on ydel hyo me wurðiað. & manna lare & bebode læred. ⁸ Soðlice ge for-læteð godes bebod. & healded manna lage. þweala ceaca & calica. & manege oðre þellice þing ge doð. ⁹ Þa sæde he heom. wel ge on ydel dyden godes be-bod. þt ge eower lage healden. ¹⁰ Moyses cwæð wurðe þinne fæder & þine moder. & se þe wergeð his fader & his moder swelte se deaðe. ¹¹ Soðlice ge cweðad. gyf hwa sægd his fader & his moder corban. þæt is on ure þeode gyfu. gyf hwilc is of me þe fremeð. ¹² & ofer þæt ge ne læteð hine anig þing. þanne his fæder odðe his moder ¹³ to-slitende godes be-bod for eower stunten lage. þe ge ge-sætten. & manege oðre þing þise gelice ge doð. ¹⁴ And eft þa manige he him to-clepede & cwæð. Ge-herað me ealle & ongetað. ¹⁵ Nis nan þing of þam menn on hine gangende þt hine be-smiten mage. Ac þa þing þe of þam men forð gæð. þa hine be-smiteð. ¹⁶ gyf hwa earan hæfð hleste me. ¹⁷ End þa se hælend fram þare manigeo eode his leorning-cnihtes hine on bispellen axoden. ¹⁸ Ða cwæð he. & sende ge swa ungleawe ne on-geate ge. þt eall þt utan cymð on þane mann gangende. ne maig hine be-smiten. ¹⁹ for þan hit ne gæð on his heorten. ac on his innoð. & on forðgang ge-witeð ealle metas clænsiende. ²⁰ Ða saigde he heom. þt þa þing þe of þam men gað. þa hine besmiteð. ²¹ in-nen of manne heorten yfele geþances cumæð. unriht-hameðe. & forleigre. manslihte. ²² stale. gytsunge. man facnu. scamelest. yfel ge-sihðe. desynysse. ofer-modignessa. stunt-scipe. ²³ ealle þas yfele of þan innoðe cumeð. & þane man be-smiteð. ²⁴ Þa ferde he þanen on þa ændes tyri & sidonis. & he in-agan on þæt hus. he nolde þt hit anig wiste. & he ne mihte hit be-miðan. ²⁵ Sona þa an wif be him ge-hirde. þare dohter hæfde un-clæne gast. hyo in eode & to his foten hyo astrehte. ²⁶ Soðlice þt wif wæs hæðene sye-rofeniscas cynnes. & bæd hine. þæt he þane deofel of hire dohter adrife. ²⁷ Ða saigde he hire. Læt ærest þa bearn beo ge-fylled. Nis na göd þt man neme þare bearne hlaf. & hunden weorpe. ²⁸ Þa andswerede hyo. & [quoth]. Drihten þt is soð. Witodlice ða hwelpes æted under þare mysan; of þare cyldrene crumen. ²⁹ Þa saide he hire for þare spæce. Ga. nu se deofel of þinre dohter ge-wit. ³⁰ And þa hyo on hire us eode. hyo ge-mette þt maigden on hire bedde liggende. & þane deofel ut-agan. ³¹ Ænd eft he eode of tyrum ge-mæren & com þurh sydonem to þare galileiscan sæ. be-tweox mid ændes decapoleos. ³² & hyo lædden him ænne deafne & dumbne. & hine bæden. þt he his hand on him asette. ³³ Ða nam he hine asundre of þare manige. & his fingre on his earen dyde. & spættende his tunge on-hran. ³⁴ & on þanne heofen be-healdende. ge-morede. & cwæð. Effeta. þt is on ure ge-þeode syo þu untyned. ³⁵ Ænd sone wurðan his earen ge-openede. & his tunge bend warð un-slyped & he rihte spæc. ³⁶ & he be-bead heom þt hyo hit nanen menn ne säigden. Soðlice swa he heom swidre be-bead. swa hyo swidere bodeden. ³⁷ & þas þe ma wundredon. & cwæðen. ealle þing he wel dyde. & he dyde þt deafe ge-hyrden. & dumbe spræcan.

¹ [Note: Ductus est iesus in desertum a spiritu ut temptaretur á diabolo. H. R. ] Þa wæs se hælend gelæd fram gaste on westen. þæt he wære fram deofle gecostned. ² & þa þa he feste feortig dæges & feortig nihta. þa ongan hym syððan hingrian. ³ And þa geneahleahte se costnigend. & cwæð. Gyf þu godes sune syo. cwæð þæt þas stanes syen to hlafe gewordan. ⁴ Ða andswerede se hælend. Hit ys awriten. ne leofað se man be hlafe anum. ac be ælce worden þe of godes muðe gæð. ⁵ Þa gebrohte se deofel hine on þa halgan ceastre. & asette hine ofer þas temples heahnysse. ⁶ & cwæð to him. Gyf þu godes sune ert. asend þe þanne niðer. Soðlice hit ys awritan þæt he his englen bebead be ðe. þæt hyo þe on heora hande bæren. þe læs þe þin fot æt stane æt-sperne. ⁷ Þa cwæð se hælend eft to him. Hit is awriten. ne costne þu drihten þinne god. ⁸ Eft se deofel hine nam. & ledde hine on swiðe heagene munt. & ateowede hym ealne midden-eardes riche. & hire wuldor. ⁹ & cwæð to him. Ealle þas ic gyfe þe. gif þu feallende. to me ge-eadmedst. ¹⁰ Ða cwæð se hælend to him. Gang þu succa on-bæc. Soðlice hit is awriten. to drihtne þine gode þu þe ge-eadmestð (sic). & him ane þeowast. ¹¹ Ða for-let se deofel hine. & ængles geneahlacten & him þegneden. ¹² Soðlice þa se hælend gehyrde þæt Iohannes belæwed wæs. þa ferde he to galilea ¹³ & forlætenre þare cheastre nazareht. he com & eardode on capharnaum on þam se-gemærum on ende zabulon & neptalim ¹⁴ þaet wære gefylled þæt þe gecwæðen wæs þurh isaiam þanne witegan. ¹⁵ [Note: Ver. 15 is omitted.] ¹⁶ Ðeode folc þe on þeostrum sæt geseah mychel leoht. & sittende on eorðe deaðes scede ys leoht up a-sprungan. ¹⁷ Seoððan ongan se hælend bodian & cweðen. doð dead-bote soðlice heofene rice geneahlæcheð. ¹⁸ [Note: Ambulans iesus íuxta mare galiléé uidit petrum et andream fratrem eius. H. R. ] Ða se hælend eode wið þa galileissan sæ. he geseah twegen gebroðren symonem se wæs nemned petrus & andreas hys broðer. sendende heora nett on þa sæ. Soðlice hyo wæren fissceres. ¹⁹ & he sægde heom. Cumeð æfter me. & ic do þæt gyt beoð manna fisceras. ²⁰ & hyo þær-rihte forlæten heora nyt & hym felgdon. ²¹ & þa he þanen eode he seah twegen oðre gebroðrum iacobum zebedei & iohannem his broðrer (sic). on scype mid heora fæder zebedeo. reniende heora nett. & he cleopede hyo. ²² Hyo þa sona forleten heore net. & heora fader. & him felgdon. ²³ And þa beferde se hælend eall galilëë. lærende on heora somnunge. & he wæs bodiende godspell. þas rices. & hælende ælche adle. & ælce untrumnysse on þam folce. ²⁴ & þa ferde his hlise into alle syriam. & hyo brohton to hym ealle yfel-hæbbende mistlichen adlen. & on tintregon gegripene. & þa þe deofel-seocnysse hæfdon. & moneðseoke. & lamen. & he þa gehælde. ²⁵ & hym felgdon mycele menige fram galilea. & fram decapoli. & fram ierusalem. & fram iudea. & fram begeonden iordanen.

²⁶ Se halge frofre gast þe se fæder sent on minan naman eow lærð ealle þing. & he lærð eow ealle þa þing. þe ic eow segge.