Bible verses about "knowledge" | HOT

Proverbs 2:1-22

¹ בני אם תקח אמרי ומצותי תצפן אתך׃² להקשׁיב לחכמה אזנך תטה לבך לתבונה׃³ כי אם לבינה תקרא לתבונה תתן קולך׃⁴ אם תבקשׁנה ככסף וכמטמונים תחפשׂנה׃⁵ אז תבין יראת יהוה ודעת אלהים תמצא׃⁶ כי יהוה יתן חכמה מפיו דעת ותבונה׃⁷ וצפן לישׁרים תושׁיה מגן להלכי תם׃⁸ לנצר ארחות משׁפט ודרך חסידו ישׁמר׃⁹ אז תבין צדק ומשׁפט ומישׁרים כל מעגל טוב׃¹⁰ כי תבוא חכמה בלבך ודעת לנפשׁך ינעם׃¹¹ מזמה תשׁמר עליך תבונה תנצרכה׃¹² להצילך מדרך רע מאישׁ מדבר תהפכות׃¹³ העזבים ארחות ישׁר ללכת בדרכי חשׁך׃¹⁴ השׂמחים לעשׂות רע יגילו בתהפכות רע׃¹⁵ אשׁר ארחתיהם עקשׁים ונלוזים במעגלותם׃¹⁶ להצילך מאשׁה זרה מנכריה אמריה החליקה׃¹⁷ העזבת אלוף נעוריה ואת ברית אלהיה שׁכחה׃¹⁸ כי שׁחה אל מות ביתה ואל רפאים מעגלתיה׃¹⁹ כל באיה לא ישׁובון ולא ישׂיגו ארחות חיים׃²⁰ למען תלך בדרך טובים וארחות צדיקים תשׁמר׃²¹ כי ישׁרים ישׁכנו ארץ ותמימים יותרו׃²² ורשׁעים מארץ יכרתו ובוגדים יסחו ממנה׃

Psalms 119:66

⁶⁶ טוב טעם ודעת למדני כי במצותיך האמנתי׃

Hosea 4:6

⁶ נדמו עמי מבלי הדעת כי אתה הדעת מאסת ואמאסאך מכהן לי ותשׁכח תורת אלהיך אשׁכח בניך גם אני׃

Proverbs 3:1-35

¹ בני תורתי אל תשׁכח ומצותי יצר לבך׃² כי ארך ימים ושׁנות חיים ושׁלום יוסיפו׃³ חסד ואמת אל יעזבך קשׁרם על גרגרותיך כתבם על לוח לבך׃⁴ ומצא חן ושׂכל טוב בעיני אלהים ואדם׃⁵ בטח אל יהוה בכל לבך ואל בינתך אל תשׁען׃⁶ בכל דרכיך דעהו והוא יישׁר ארחתיך׃⁷ אל תהי חכם בעיניך ירא את יהוה וסור מרע׃⁸ רפאות תהי לשׁרך ושׁקוי לעצמותיך׃⁹ כבד את יהוה מהונך ומראשׁית כל תבואתך׃¹⁰ וימלאו אסמיך שׂבע ותירושׁ יקביך יפרצו׃¹¹ מוסר יהוה בני אל תמאס ואל תקץ בתוכחתו׃¹² כי את אשׁר יאהב יהוה יוכיח וכאב את בן ירצה׃¹³ אשׁרי אדם מצא חכמה ואדם יפיק תבונה׃¹⁴ כי טוב סחרה מסחר כסף ומחרוץ תבואתה׃¹⁵ יקרה היא מפניים וכל חפציך לא ישׁוו׃¹⁶ ארך ימים בימינה בשׂמאולה עשׁר וכבוד׃¹⁷ דרכיה דרכי נעם וכל נתיבותיה שׁלום׃¹⁸ עץ חיים היא למחזיקים בה ותמכיה מאשׁר׃¹⁹ יהוה בחכמה יסד ארץ כונן שׁמים בתבונה׃²⁰ בדעתו תהומות נבקעו ושׁחקים ירעפו טל׃²¹ בני אל ילזו מעיניך נצר תשׁיה ומזמה׃²² ויהיו חיים לנפשׁך וחן לגרגרתיך׃²³ אז תלך לבטח דרכך ורגלך לא תגוף׃²⁴ אם תשׁכב לא תפחד ושׁכבת וערבה שׁנתך׃²⁵ אל תירא מפחד פתאם ומשׁאת רשׁעים כי תבא׃²⁶ כי יהוה יהיה בכסלך ושׁמר רגלך מלכד׃²⁷ אל תמנע טוב מבעליו בהיות לאל ידיך לעשׂות׃²⁸ אל תאמר לרעיך לך ושׁוב ומחר אתן וישׁ אתך׃²⁹ אל תחרשׁ על רעך רעה והוא יושׁב לבטח אתך׃³⁰ אל תרוב עם אדם חנם אם לא גמלך רעה׃³¹ אל תקנא באישׁ חמס ואל תבחר בכל דרכיו׃³² כי תועבת יהוה נלוז ואת ישׁרים סודו׃³³ מארת יהוה בבית רשׁע ונוה צדיקים יברך׃³⁴ אם ללצים הוא יליץ ולעניים יתן חן׃³⁵ כבוד חכמים ינחלו וכסילים מרים קלון׃