Psalms 19:7 Cross References - HOT

7 (19:8) תורת יהוה תמימה משׁיבת נפשׁ עדות יהוה נאמנה מחכימת פתי׃

Deuteronomy 6:6-9

6 והיו הדברים האלה אשׁר אנכי מצוך היום על לבבך׃7 ושׁננתם לבניך ודברת בם בשׁבתך בביתך ובלכתך בדרך ובשׁכבך ובקומך׃8 וקשׁרתם לאות על ידך והיו לטטפת בין עיניך׃9 וכתבתם על מזזות ביתך ובשׁעריך׃

Deuteronomy 17:18-20

18 והיה כשׁבתו על כסא ממלכתו וכתב לו את משׁנה התורה הזאת על ספר מלפני הכהנים הלוים׃19 והיתה עמו וקרא בו כל ימי חייו למען ילמד ליראה את יהוה אלהיו לשׁמר את כל דברי התורה הזאת ואת החקים האלה לעשׂתם׃20 לבלתי רום לבבו מאחיו ולבלתי סור מן המצוה ימין ושׂמאול למען יאריך ימים על ממלכתו הוא ובניו בקרב ישׂראל׃

Deuteronomy 32:4

4 הצור תמים פעלו כי כל דרכיו משׁפט אל אמונה ואין עול צדיק וישׁר הוא׃

Joshua 1:8

8 לא ימושׁ ספר התורה הזה מפיך והגית בו יומם ולילה למען תשׁמר לעשׂות ככל הכתוב בו כי אז תצליח את דרכך ואז תשׂכיל׃

2 Samuel 23:5

5 כי לא כן ביתי עם אל כי ברית עולם שׂם לי ערוכה בכל ושׁמרה כי כל ישׁעי וכל חפץ כי לא יצמיח׃

Job 23:12

12 מצות שׂפתיו ולא אמישׁ מחקי צפנתי אמרי פיו׃

Psalms 18:30

30 (18:31) האל תמים דרכו אמרת יהוה צרופה מגן הוא לכל החסים׃

Psalms 23:3

3 נפשׁי ישׁובב ינחני במעגלי צדק למען שׁמו׃

Psalms 78:1-7

1 משׂכיל לאסף האזינה עמי תורתי הטו אזנכם לאמרי פי׃2 אפתחה במשׁל פי אביעה חידות מני קדם׃3 אשׁר שׁמענו ונדעם ואבותינו ספרו׃4 לא נכחד מבניהם לדור אחרון מספרים תהלות יהוה ועזוזו ונפלאותיו אשׁר עשׂה׃5 ויקם עדות ביעקב ותורה שׂם בישׂראל אשׁר צוה את אבותינו להודיעם לבניהם׃6 למען ידעו דור אחרון בנים יולדו יקמו ויספרו לבניהם׃7 וישׂימו באלהים כסלם ולא ישׁכחו מעללי אל ומצותיו ינצרו׃

Psalms 93:5

5 עדתיך נאמנו מאד לביתך נאוה קדשׁ יהוה לארך ימים׃

Psalms 111:7

7 מעשׂי ידיו אמת ומשׁפט נאמנים כל פקודיו׃

Psalms 119:9

9 במה יזכה נער את ארחו לשׁמר כדברך׃

Psalms 119:14

14 בדרך עדותיך שׂשׂתי כעל כל הון׃

Psalms 119:24

24 גם עדתיך שׁעשׁעי אנשׁי עצתי׃

Psalms 119:72

72 טוב לי תורת פיך מאלפי זהב וכסף׃

Psalms 119:96-100

96 לכל תכלה ראיתי קץ רחבה מצותך מאד׃97 מה אהבתי תורתך כל היום היא שׂיחתי׃98 מאיבי תחכמני מצותך כי לעולם היא׃99 מכל מלמדי השׂכלתי כי עדותיך שׂיחה׃100 מזקנים אתבונן כי פקודיך נצרתי׃

Psalms 119:105

105 נר לרגלי דברך ואור לנתיבתי׃

Psalms 119:111

111 נחלתי עדותיך לעולם כי שׂשׂון לבי המה׃

Psalms 119:127-128

127 על כן אהבתי מצותיך מזהב ומפז׃128 על כן כל פקודי כל ישׁרתי כל ארח שׁקר שׂנאתי׃

Psalms 119:130

130 פתח דבריך יאיר מבין פתיים׃

Psalms 119:152

152 קדם ידעתי מעדתיך כי לעולם יסדתם׃

Psalms 147:19-20

19 מגיד דברו ליעקב חקיו ומשׁפטיו לישׂראל׃20 לא עשׂה כן לכל גוי ומשׁפטים בל ידעום הללו יה׃

Proverbs 1:4

4 לתת לפתאים ערמה לנער דעת ומזמה׃

Proverbs 1:22-23

22 עד מתי פתים תאהבו פתי ולצים לצון חמדו להם וכסילים ישׂנאו דעת׃23 תשׁובו לתוכחתי הנה אביעה לכם רוחי אודיעה דברי אתכם׃

Isaiah 8:16

16 צור תעודה חתום תורה בלמדי׃

Isaiah 8:20

20 לתורה ולתעודה אם לא יאמרו כדבר הזה אשׁר אין לו שׁחר׃

Cross Reference data is from OpenBible.info, retrieved June 28, 2010, and licensed under a Creative Commons Attribution License.