Proverbs 3:13 Cross References - HOT

13 אשׁרי אדם מצא חכמה ואדם יפיק תבונה׃

1 Kings 10:1-9

1 ומלכת שׁבא שׁמעת את שׁמע שׁלמה לשׁם יהוה ותבא לנסתו בחידות׃2 ותבא ירושׁלמה בחיל כבד מאד גמלים נשׂאים בשׂמים וזהב רב מאד ואבן יקרה ותבא אל שׁלמה ותדבר אליו את כל אשׁר היה עם לבבה׃3 ויגד לה שׁלמה את כל דבריה לא היה דבר נעלם מן המלך אשׁר לא הגיד׃4 ותרא מלכת שׁבא את כל חכמת שׁלמה והבית אשׁר בנה׃5 ומאכל שׁלחנו ומושׁב עבדיו ומעמד משׁרתו ומלבשׁיהם ומשׁקיו ועלתו אשׁר יעלה בית יהוה ולא היה בה עוד רוח׃6 ותאמר אל המלך אמת היה הדבר אשׁר שׁמעתי בארצי על דבריך ועל חכמתך׃7 ולא האמנתי לדברים עד אשׁר באתי ותראינה עיני והנה לא הגד לי החצי הוספת חכמה וטוב אל השׁמועה אשׁר שׁמעתי׃8 אשׁרי אנשׁיך אשׁרי עבדיך אלה העמדים לפניך תמיד השׁמעים את חכמתך׃9 יהי יהוה אלהיך ברוך אשׁר חפץ בך לתתך על כסא ישׂראל באהבת יהוה את ישׂראל לעלם וישׂימך למלך לעשׂות משׁפט וצדקה׃

1 Kings 10:23-24

23 ויגדל המלך שׁלמה מכל מלכי הארץ לעשׁר ולחכמה׃24 וכל הארץ מבקשׁים את פני שׁלמה לשׁמע את חכמתו אשׁר נתן אלהים בלבו׃

Proverbs 2:4

4 אם תבקשׁנה ככסף וכמטמונים תחפשׂנה׃

Proverbs 4:5-9

5 קנה חכמה קנה בינה אל תשׁכח ואל תט מאמרי פי׃6 אל תעזבה ותשׁמרך אהבה ותצרך׃7 ראשׁית חכמה קנה חכמה ובכל קנינך קנה בינה׃8 סלסלה ותרוממך תכבדך כי תחבקנה׃9 תתן לראשׁך לוית חן עטרת תפארת תמגנך׃

Proverbs 8:32-35

32 ועתה בנים שׁמעו לי ואשׁרי דרכי ישׁמרו׃33 שׁמעו מוסר וחכמו ואל תפרעו׃34 אשׁרי אדם שׁמע לי לשׁקד על דלתתי יום יום לשׁמר מזוזת פתחי׃35 כי מצאי מצאי חיים ויפק רצון מיהוה׃

Proverbs 18:1

1 לתאוה יבקשׁ נפרד בכל תושׁיה יתגלע׃

Ecclesiastes 9:15-18

15 ומצא בה אישׁ מסכן חכם ומלט הוא את העיר בחכמתו ואדם לא זכר את האישׁ המסכן ההוא׃16 ואמרתי אני טובה חכמה מגבורה וחכמת המסכן בזויה ודבריו אינם נשׁמעים׃17 דברי חכמים בנחת נשׁמעים מזעקת מושׁל בכסילים׃18 טובה חכמה מכלי קרב וחוטא אחד יאבד טובה הרבה׃

Cross Reference data is from OpenBible.info, retrieved June 28, 2010, and licensed under a Creative Commons Attribution License.