Proverbs 22:14 Cross References - HOT

¹⁴ שׁוחה עמקה פי זרות זעום יהוה יפול שׁם׃

Judges 16:20-21

²⁰ ותאמר פלשׁתים עליך שׁמשׁון ויקץ משׁנתו ויאמר אצא כפעם בפעם ואנער והוא לא ידע כי יהוה סר מעליו׃²¹ ויאחזוהו פלשׁתים וינקרו את עיניו ויורידו אותו עזתה ויאסרוהו בנחשׁתים ויהי טוחן בבית האסירים׃

Nehemiah 13:26

²⁶ הלוא על אלה חטא שׁלמה מלך ישׂראל ובגוים הרבים לא היה מלך כמהו ואהוב לאלהיו היה ויתנהו אלהים מלך על כל ישׂראל גם אותו החטיאו הנשׁים הנכריות׃

Psalms 81:12

¹² (81:13) ואשׁלחהו בשׁרירות לבם ילכו במועצותיהם׃

Proverbs 2:16-19

¹⁶ להצילך מאשׁה זרה מנכריה אמריה החליקה׃¹⁷ העזבת אלוף נעוריה ואת ברית אלהיה שׁכחה׃¹⁸ כי שׁחה אל מות ביתה ואל רפאים מעגלתיה׃¹⁹ כל באיה לא ישׁובון ולא ישׂיגו ארחות חיים׃

³ כי נפת תטפנה שׂפתי זרה וחלק משׁמן חכה׃⁴ ואחריתה מרה כלענה חדה כחרב פיות׃⁵ רגליה ירדות מות שׁאול צעדיה יתמכו׃⁶ ארח חיים פן תפלס נעו מעגלתיה לא תדע׃⁷ ועתה בנים שׁמעו לי ואל תסורו מאמרי פי׃⁸ הרחק מעליה דרכך ואל תקרב אל פתח ביתה׃⁹ פן תתן לאחרים הודך ושׁנתיך לאכזרי׃¹⁰ פן ישׂבעו זרים כחך ועצביך בבית נכרי׃¹¹ ונהמת באחריתך בכלות בשׂרך ושׁארך׃¹² ואמרת איך שׂנאתי מוסר ותוכחת נאץ לבי׃¹³ ולא שׁמעתי בקול מורי ולמלמדי לא הטיתי אזני׃¹⁴ כמעט הייתי בכל רע בתוך קהל ועדה׃¹⁵ שׁתה מים מבורך ונזלים מתוך בארך׃¹⁶ יפוצו מעינתיך חוצה ברחבות פלגי מים׃¹⁷ יהיו לך לבדך ואין לזרים אתך׃¹⁸ יהי מקורך ברוך ושׂמח מאשׁת נעורך׃¹⁹ אילת אהבים ויעלת חן דדיה ירוך בכל עת באהבתה תשׁגה תמיד׃²⁰ ולמה תשׁגה בני בזרה ותחבק חק נכריה׃²¹ כי נכח עיני יהוה דרכי אישׁ וכל מעגלתיו מפלס׃²² עוונותיו ילכדנו את הרשׁע ובחבלי חטאתו יתמך׃²³ הוא ימות באין מוסר וברב אולתו ישׁגה׃

Proverbs 6:24-29

²⁴ לשׁמרך מאשׁת רע מחלקת לשׁון נכריה׃²⁵ אל תחמד יפיה בלבבך ואל תקחך בעפעפיה׃²⁶ כי בעד אשׁה זונה עד ככר לחם ואשׁת אישׁ נפשׁ יקרה תצוד׃²⁷ היחתה אישׁ אשׁ בחיקו ובגדיו לא תשׂרפנה׃²⁸ אם יהלך אישׁ על הגחלים ורגליו לא תכוינה׃²⁹ כן הבא אל אשׁת רעהו לא ינקה כל הנגע׃

Proverbs 7:5-27

⁵ לשׁמרך מאשׁה זרה מנכריה אמריה החליקה׃⁶ כי בחלון ביתי בעד אשׁנבי נשׁקפתי׃⁷ וארא בפתאים אבינה בבנים נער חסר לב׃⁸ עבר בשׁוק אצל פנה ודרך ביתה יצעד׃⁹ בנשׁף בערב יום באישׁון לילה ואפלה׃¹⁰ והנה אשׁה לקראתו שׁית זונה ונצרת לב׃¹¹ המיה היא וסררת בביתה לא ישׁכנו רגליה׃¹² פעם בחוץ פעם ברחבות ואצל כל פנה תארב׃¹³ והחזיקה בו ונשׁקה לו העזה פניה ותאמר׃¹⁴ זבחי שׁלמים עלי היום שׁלמתי נדרי׃¹⁵ על כן יצאתי לקראתך לשׁחר פניך ואמצאך׃¹⁶ מרבדים רבדתי ערשׂי חטבות אטון מצרים׃¹⁷ נפתי משׁכבי מר אהלים וקנמון׃¹⁸ לכה נרוה דדים עד הבקר נתעלסה באהבים׃¹⁹ כי אין האישׁ בביתו הלך בדרך מרחוק׃²⁰ צרור הכסף לקח בידו ליום הכסא יבא ביתו׃²¹ הטתו ברב לקחה בחלק שׂפתיה תדיחנו׃²² הולך אחריה פתאם כשׁור אל טבח יבוא וכעכס אל מוסר אויל׃²³ עד יפלח חץ כבדו כמהר צפור אל פח ולא ידע כי בנפשׁו הוא׃²⁴ ועתה בנים שׁמעו לי והקשׁיבו לאמרי פי׃²⁵ אל ישׂט אל דרכיה לבך אל תתע בנתיבותיה׃²⁶ כי רבים חללים הפילה ועצמים כל הרגיה׃²⁷ דרכי שׁאול ביתה ירדות אל חדרי מות׃

Proverbs 23:27

²⁷ כי שׁוחה עמקה זונה ובאר צרה נכריה׃

Ecclesiastes 7:26

²⁶ ומוצא אני מר ממות את האשׁה אשׁר היא מצודים וחרמים לבה אסורים ידיה טוב לפני האלהים ימלט ממנה וחוטא ילכד׃