Numbers 3:6 Cross References - HOT

⁶ הקרב את מטה לוי והעמדת אתו לפני אהרן הכהן ושׁרתו אתו׃

Exodus 32:26-29

²⁶ ויעמד משׁה בשׁער המחנה ויאמר מי ליהוה אלי ויאספו אליו כל בני לוי׃²⁷ ויאמר להם כה אמר יהוה אלהי ישׂראל שׂימו אישׁ חרבו על ירכו עברו ושׁובו משׁער לשׁער במחנה והרגו אישׁ את אחיו ואישׁ את רעהו ואישׁ את קרבו׃²⁸ ויעשׂו בני לוי כדבר משׁה ויפל מן העם ביום ההוא כשׁלשׁת אלפי אישׁ׃²⁹ ויאמר משׁה מלאו ידכם היום ליהוה כי אישׁ בבנו ובאחיו ולתת עליכם היום ברכה׃

Numbers 1:49-53

⁴⁹ אך את מטה לוי לא תפקד ואת ראשׁם לא תשׂא בתוך בני ישׂראל׃⁵⁰ ואתה הפקד את הלוים על משׁכן העדת ועל כל כליו ועל כל אשׁר לו המה ישׂאו את המשׁכן ואת כל כליו והם ישׁרתהו וסביב למשׁכן יחנו׃⁵¹ ובנסע המשׁכן יורידו אתו הלוים ובחנת המשׁכן יקימו אתו הלוים והזר הקרב יומת׃⁵² וחנו בני ישׂראל אישׁ על מחנהו ואישׁ על דגלו לצבאתם׃⁵³ והלוים יחנו סביב למשׁכן העדת ולא יהיה קצף על עדת בני ישׂראל ושׁמרו הלוים את משׁמרת משׁכן העדות׃

Numbers 2:17

¹⁷ ונסע אהל מועד מחנה הלוים בתוך המחנת כאשׁר יחנו כן יסעו אישׁ על ידו לדגליהם׃

Numbers 2:33

³³ והלוים לא התפקדו בתוך בני ישׂראל כאשׁר צוה יהוה את משׁה׃

Numbers 8:6-26

⁶ קח את הלוים מתוך בני ישׂראל וטהרת אתם׃⁷ וכה תעשׂה להם לטהרם הזה עליהם מי חטאת והעבירו תער על כל בשׂרם וכבסו בגדיהם והטהרו׃⁸ ולקחו פר בן בקר ומנחתו סלת בלולה בשׁמן ופר שׁני בן בקר תקח לחטאת׃⁹ והקרבת את הלוים לפני אהל מועד והקהלת את כל עדת בני ישׂראל׃¹⁰ והקרבת את הלוים לפני יהוה וסמכו בני ישׂראל את ידיהם על הלוים׃¹¹ והניף אהרן את הלוים תנופה לפני יהוה מאת בני ישׂראל והיו לעבד את עבדת יהוה׃¹² והלוים יסמכו את ידיהם על ראשׁ הפרים ועשׂה את האחד חטאת ואת האחד עלה ליהוה לכפר על הלוים׃¹³ והעמדת את הלוים לפני אהרן ולפני בניו והנפת אתם תנופה ליהוה׃¹⁴ והבדלת את הלוים מתוך בני ישׂראל והיו לי הלוים׃¹⁵ ואחרי כן יבאו הלוים לעבד את אהל מועד וטהרת אתם והנפת אתם תנופה׃¹⁶ כי נתנים נתנים המה לי מתוך בני ישׂראל תחת פטרת כל רחם בכור כל מבני ישׂראל לקחתי אתם׃¹⁷ כי לי כל בכור בבני ישׂראל באדם ובבהמה ביום הכתי כל בכור בארץ מצרים הקדשׁתי אתם׃¹⁸ ואקח את הלוים תחת כל בכור בבני ישׂראל׃¹⁹ ואתנה את הלוים נתנים לאהרן ולבניו מתוך בני ישׂראל לעבד את עבדת בני ישׂראל באהל מועד ולכפר על בני ישׂראל ולא יהיה בבני ישׂראל נגף בגשׁת בני ישׂראל אל הקדשׁ׃²⁰ ויעשׂ משׁה ואהרן וכל עדת בני ישׂראל ללוים ככל אשׁר צוה יהוה את משׁה ללוים כן עשׂו להם בני ישׂראל׃²¹ ויתחטאו הלוים ויכבסו בגדיהם וינף אהרן אתם תנופה לפני יהוה ויכפר עליהם אהרן לטהרם׃²² ואחרי כן באו הלוים לעבד את עבדתם באהל מועד לפני אהרן ולפני בניו כאשׁר צוה יהוה את משׁה על הלוים כן עשׂו׃²³ וידבר יהוה אל משׁה לאמר׃²⁴ זאת אשׁר ללוים מבן חמשׁ ועשׂרים שׁנה ומעלה יבוא לצבא צבא בעבדת אהל מועד׃²⁵ ומבן חמשׁים שׁנה ישׁוב מצבא העבדה ולא יעבד עוד׃²⁶ ושׁרת את אחיו באהל מועד לשׁמר משׁמרת ועבדה לא יעבד ככה תעשׂה ללוים במשׁמרתם׃

Numbers 16:9-11

⁹ המעט מכם כי הבדיל אלהי ישׂראל אתכם מעדת ישׂראל להקריב אתכם אליו לעבד את עבדת משׁכן יהוה ולעמד לפני העדה לשׁרתם׃¹⁰ ויקרב אתך ואת כל אחיך בני לוי אתך ובקשׁתם גם כהנה׃¹¹ לכן אתה וכל עדתך הנעדים על יהוה ואהרן מה הוא כי תלונו עליו׃

Numbers 18:1-7

¹ ויאמר יהוה אל אהרן אתה ובניך ובית אביך אתך תשׂאו את עון המקדשׁ ואתה ובניך אתך תשׂאו את עון כהנתכם׃² וגם את אחיך מטה לוי שׁבט אביך הקרב אתך וילוו עליך וישׁרתוך ואתה ובניך אתך לפני אהל העדת׃³ ושׁמרו משׁמרתך ומשׁמרת כל האהל אך אל כלי הקדשׁ ואל המזבח לא יקרבו ולא ימתו גם הם גם אתם׃⁴ ונלוו עליך ושׁמרו את משׁמרת אהל מועד לכל עבדת האהל וזר לא יקרב אליכם׃⁵ ושׁמרתם את משׁמרת הקדשׁ ואת משׁמרת המזבח ולא יהיה עוד קצף על בני ישׂראל׃⁶ ואני הנה לקחתי את אחיכם הלוים מתוך בני ישׂראל לכם מתנה נתנים ליהוה לעבד את עבדת אהל מועד׃⁷ ואתה ובניך אתך תשׁמרו את כהנתכם לכל דבר המזבח ולמבית לפרכת ועבדתם עבדת מתנה אתן את כהנתכם והזר הקרב יומת׃