2 Chronicles 36:14 Cross References - HOT

¹⁴ גם כל שׂרי הכהנים והעם הרבו למעול מעל ככל תעבות הגוים ויטמאו את בית יהוה אשׁר הקדישׁ בירושׁלם׃

2 Kings 16:10-16

¹⁰ וילך המלך אחז לקראת תגלת פלאסר מלך אשׁור דומשׂק וירא את המזבח אשׁר בדמשׂק וישׁלח המלך אחז אל אוריה הכהן את דמות המזבח ואת תבניתו לכל מעשׂהו׃¹¹ ויבן אוריה הכהן את המזבח ככל אשׁר שׁלח המלך אחז מדמשׂק כן עשׂה אוריה הכהן עד בוא המלך אחז מדמשׂק׃¹² ויבא המלך מדמשׂק וירא המלך את המזבח ויקרב המלך על המזבח ויעל עליו׃¹³ ויקטר את עלתו ואת מנחתו ויסך את נסכו ויזרק את דם השׁלמים אשׁר לו על המזבח׃¹⁴ ואת המזבח הנחשׁת אשׁר לפני יהוה ויקרב מאת פני הבית מבין המזבח ומבין בית יהוה ויתן אתו על ירך המזבח צפונה׃¹⁵ ויצוהו המלך אחז את אוריה הכהן לאמר על המזבח הגדול הקטר את עלת הבקר ואת מנחת הערב ואת עלת המלך ואת מנחתו ואת עלת כל עם הארץ ומנחתם ונסכיהם וכל דם עלה וכל דם זבח עליו תזרק ומזבח הנחשׁת יהיה לי לבקר׃¹⁶ ויעשׂ אוריה הכהן ככל אשׁר צוה המלך אחז׃

2 Chronicles 28:3

³ והוא הקטיר בגיא בן הנם ויבער את בניו באשׁ כתעבות הגוים אשׁר הרישׁ יהוה מפני בני ישׂראל׃

2 Chronicles 33:4-7

⁴ ובנה מזבחות בבית יהוה אשׁר אמר יהוה בירושׁלם יהיה שׁמי לעולם׃⁵ ויבן מזבחות לכל צבא השׁמים בשׁתי חצרות בית יהוה׃⁶ והוא העביר את בניו באשׁ בגי בן הנם ועונן ונחשׁ וכשׁף ועשׂה אוב וידעוני הרבה לעשׂות הרע בעיני יהוה להכעיסו׃⁷ וישׂם את פסל הסמל אשׁר עשׂה בבית האלהים אשׁר אמר אלהים אל דויד ואל שׁלמה בנו בבית הזה ובירושׁלם אשׁר בחרתי מכל שׁבטי ישׂראל אשׂים את שׁמי לעילום׃

2 Chronicles 33:9

⁹ ויתע מנשׁה את יהודה וישׁבי ירושׁלם לעשׂות רע מן הגוים אשׁר השׁמיד יהוה מפני בני ישׂראל׃

Ezra 9:7

⁷ מימי אבתינו אנחנו באשׁמה גדלה עד היום הזה ובעונתינו נתנו אנחנו מלכינו כהנינו ביד מלכי הארצות בחרב בשׁבי ובבזה ובבשׁת פנים כהיום הזה׃

Jeremiah 5:5

⁵ אלכה לי אל הגדלים ואדברה אותם כי המה ידעו דרך יהוה משׁפט אלהיהם אך המה יחדו שׁברו על נתקו מוסרות׃

Jeremiah 37:13-15

¹³ ויהי הוא בשׁער בנימן ושׁם בעל פקדת ושׁמו יראייה בן שׁלמיה בן חנניה ויתפשׂ את ירמיהו הנביא לאמר אל הכשׂדים אתה נפל׃¹⁴ ויאמר ירמיהו שׁקר אינני נפל על הכשׂדים ולא שׁמע אליו ויתפשׂ יראייה בירמיהו ויבאהו אל השׂרים׃¹⁵ ויקצפו השׂרים על ירמיהו והכו אתו ונתנו אותו בית האסור בית יהונתן הספר כי אתו עשׂו לבית הכלא׃

Jeremiah 38:4

⁴ ויאמרו השׂרים אל המלך יומת נא את האישׁ הזה כי על כן הוא מרפא את ידי אנשׁי המלחמה הנשׁארים בעיר הזאת ואת ידי כל העם לדבר אליהם כדברים האלה כי האישׁ הזה איננו דרשׁ לשׁלום לעם הזה כי אם לרעה׃

Ezekiel 8:5-16

⁵ ויאמר אלי בן אדם שׂא נא עיניך דרך צפונה ואשׂא עיני דרך צפונה והנה מצפון לשׁער המזבח סמל הקנאה הזה בבאה׃⁶ ויאמר אלי בן אדם הראה אתה מהם עשׂים תועבות גדלות אשׁר בית ישׂראל עשׂים פה לרחקה מעל מקדשׁי ועוד תשׁוב תראה תועבות גדלות׃⁷ ויבא אתי אל פתח החצר ואראה והנה חר אחד בקיר׃⁸ ויאמר אלי בן אדם חתר נא בקיר ואחתר בקיר והנה פתח אחד׃⁹ ויאמר אלי בא וראה את התועבות הרעות אשׁר הם עשׂים פה׃¹⁰ ואבוא ואראה והנה כל תבנית רמשׂ ובהמה שׁקץ וכל גלולי בית ישׂראל מחקה על הקיר סביב סביב׃¹¹ ושׁבעים אישׁ מזקני בית ישׂראל ויאזניהו בן שׁפן עמד בתוכם עמדים לפניהם ואישׁ מקטרתו בידו ועתר ענן הקטרת עלה׃¹² ויאמר אלי הראית בן אדם אשׁר זקני בית ישׂראל עשׂים בחשׁך אישׁ בחדרי משׂכיתו כי אמרים אין יהוה ראה אתנו עזב יהוה את הארץ׃¹³ ויאמר אלי עוד תשׁוב תראה תועבות גדלות אשׁר המה עשׂים׃¹⁴ ויבא אתי אל פתח שׁער בית יהוה אשׁר אל הצפונה והנה שׁם הנשׁים ישׁבות מבכות את התמוז׃¹⁵ ויאמר אלי הראית בן אדם עוד תשׁוב תראה תועבות גדלות מאלה׃¹⁶ ויבא אתי אל חצר בית יהוה הפנימית והנה פתח היכל יהוה בין האולם ובין המזבח כעשׂרים וחמשׁה אישׁ אחריהם אל היכל יהוה ופניהם קדמה והמה משׁתחויתם קדמה לשׁמשׁ׃

Ezekiel 22:6

⁶ הנה נשׂיאי ישׂראל אישׁ לזרעו היו בך למען שׁפך דם׃

Ezekiel 22:26-28

²⁶ כהניה חמסו תורתי ויחללו קדשׁי בין קדשׁ לחל לא הבדילו ובין הטמא לטהור לא הודיעו ומשׁבתותי העלימו עיניהם ואחל בתוכם׃²⁷ שׂריה בקרבה כזאבים טרפי טרף לשׁפך דם לאבד נפשׁות למען בצע בצע׃²⁸ ונביאיה טחו להם תפל חזים שׁוא וקסמים להם כזב אמרים כה אמר אדני יהוה ויהוה לא דבר׃

Daniel 9:6

⁶ ולא שׁמענו אל עבדיך הנביאים אשׁר דברו בשׁמך אל מלכינו שׂרינו ואבתינו ואל כל עם הארץ׃

Daniel 9:8

⁸ יהוה לנו בשׁת הפנים למלכינו לשׂרינו ולאבתינו אשׁר חטאנו׃

Micah 3:1-4

¹ ואמר שׁמעו נא ראשׁי יעקב וקציני בית ישׂראל הלוא לכם לדעת את המשׁפט׃² שׂנאי טוב ואהבי רעה גזלי עורם מעליהם ושׁארם מעל עצמותם׃³ ואשׁר אכלו שׁאר עמי ועורם מעליהם הפשׁיטו ואת עצמתיהם פצחו ופרשׂו כאשׁר בסיר וכבשׂר בתוך קלחת׃⁴ אז יזעקו אל יהוה ולא יענה אותם ויסתר פניו מהם בעת ההיא כאשׁר הרעו מעלליהם׃