Romans 11:1-36 Therfor Y seie, Whether God hath put awei his puple? God forbede. For Y am an Israelite, of the seed of Abraham, of the lynage of Beniamyn.

Wycliffe⁽ⁱ⁾ ¹ Therfor Y seie, Whether God hath put awei his puple? God forbede. For Y am an Israelite, of the seed of Abraham, of the lynage of Beniamyn. ² God hath not put awei his puple, which he bifor knew. Whether ye witen not, what the scripture seith in Elie? Hou he preieth God ayens Israel, ³ Lord, thei han slayn thi prophetis, thei han vndurdoluun thin auteris, and Y am lefte aloone, and thei seken my lijf. ⁴ But what seith Goddis answere to hym? Y haue left to me seuene thousyndes of men, that han not bowid her knees bifore Baal. ⁵ So therfor also in this tyme, the relifs ben maad saaf, bi the chesyng of the grace of God. ⁶ And if it be bi the grace of God, it is not now of werkis; ellis grace is not now grace. ⁷ What thanne? Israel hath not getun this that he souyte, but eleccioun hath getun; and the othere ben blyndid. ⁸ As it is writun, God yaf to hem a spirit of compunccioun, iyen that thei se not, and eeris, that thei here not, in to this dai. ⁹ And Dauith seith, Be the boord of hem maad in to a gryn bifor hem, and in to catchyng, and in to sclaundre, and in to yeldyng to hem. ¹⁰ Be the iyen of hem maad derk, that thei se not; and bowe thou doun algatis the bak of hem. ¹¹ Therfor Y seie, Whether thei offendiden so, that thei schulden falle doun? God forbede. But bi the gilt of hem helthe is maad to hethene men, that thei sue hem. ¹² That if the gilt of hem ben richessis of the world, and the makyng lesse of hem ben richessis of hethene men, hou myche more the plente of hem? ¹³ But Y seie to you, hethene men, for as longe as Y am apostle of hethene men, Y schal onoure my mynysterie, ¹⁴ if in ony maner Y stire my fleisch for to folowe, and that Y make summe of hem saaf. ¹⁵ For if the loss of hem is the recouncelyng of the world, what is the takyng vp, but lijf of deede men? ¹⁶ For if a litil part of that that is tastid be hooli, the hool gobet is hooli; and if the roote is hooli, also the braunchis. ¹⁷ What if ony of the braunchis ben brokun, whanne thou were a wielde olyue tre, art graffid among hem, and art maad felowe of the roote, and of the fatnesse of the olyue tre, ¹⁸ nyle thou haue glorie ayens the braunchis. For if thou gloriest, thou berist not the roote, but the roote thee. ¹⁹ Therfor thou seist, The braunchis ben brokun, that Y be graffid in. ²⁰ Wel, for vnbileue the braunchis ben brokun; but thou stondist bi feith. Nyle thou sauere hiye thing, ²¹ but drede thou, for if God sparide not the kyndli braunchis, lest perauenture he spare not thee. ²² Therfor se the goodnesse, and the fersnesse of God; yhe, the feersnesse in to hem that felden doun, but the goodnesse of God in to thee, if thou dwellist in goodnesse, ellis also thou schalt be kit doun. ²³ Yhe, and thei schulen be set yn, if thei dwellen not in vnbileue. For God is myyti, to sette hem in eftsoone. ²⁴ For if thou art kit doun of the kyndeli wielde olyue tre, and ayens kynd art set in to a good olyue tre, hou myche more thei that ben bi kynde, schulen be set in her olyue tree? ²⁵ But, britheren, Y wole not that ye vnknowen this mysterie, that ye be not wise to you silf; for blyndenesse hath feld a parti in Israel, til that the plente of hethene men entride, ²⁶ and so al Israel schulde be maad saaf. As it is writun, He schal come of Syon, that schal delyuere, and turne awei the wickidnesse of Jacob. ²⁷ And this testament to hem of me, whanne Y schal do awei her synnes. ²⁸ Aftir the gospel thei ben enemyes for you, but thei ben moost dereworthe bi the eleccioun for the fadris. ²⁹ And the yiftis and the cleping of God ben with outen forthenkyng. ³⁰ And as sum tyme also ye bileueden not to God, but now ye han gete mercy for the vnbileue of hem; ³¹ so and these now bileueden not in to youre merci, that also thei geten merci. ³² For God closide alle thingis togidere in vnbileue, that he haue mercy on alle. ³³ O! the heiynesse of the ritchessis of the wisdom and of the kunnyng of God; hou incomprehensible ben hise domes, and hise weies ben vnserchable. ³⁴ For whi who knew the wit of the Lord, or who was his counselour? or who formere yaf to hym, ³⁵ and it schal be quyt to hym? ³⁶ For of hym, and bi hym, and in hym ben alle thingis. To hym be glorie in to worldis. Amen.