WestSaxon990(i)
1 [Note:Ðys sceal on wodnes-dæg on þære þryddan lencten wucan. A. B. Accesserunt ad ihesum. A.] Þa comon to him pharisei & sume boceras cumende fram hierusalem.
2 & þa hi ge-sawon sume of his leorning-cnihton besmitenum handum þt is ünþwogenum handum etan. hi tældon hi & cwædon;
3 Pharisei & ealle iudeas ne etað buton hi hyra handa gelomlice þwean. healdende hyra yldrena gesetnessa.
4 & on stræte hi ne etað buton hi geþwegene beon. & manega oþre synd þe him gesette synt. þt is calicea frymða. & ceaca. & ärfata. & mæstlinga;
5 And þa axodon hine pharisei & þa boceras. hwi ne gað þine leorning-cnihtas æfter ure yldrena gesetnysse. ac besmitenum handum hyra hlaf þicgað;
6 Ða andswarode he him; Wel witegod isaias be eow licceterum swa hit awriten is; Þis folc me mid welerum wurðað. soðlice hyra heorte is feor fram me.
7 on idel hi me wurðiað. & manna läre & bebodu lærað;
8 Soþlice ge forlætað godes bebod. & healdað manna laga. þweala ceaca & calica. & manega oþre þylce ðing ge doð;
9 Ða sæde he him. wel ge on idel dydon godes bebod þt ge eower laga healdon;
10 Moyses cwæð. wurða þinne fæder & þine modor. & se ðe wyrigþ his fæder & his modor. swelte se deaþe;
11 Soðlice ge cweþað. gif hwa segð his fæder & meder corbän þt is on ure geðeode gyfu. gif hwylc is of me þe fremað.
12 & ofer þt ge ne lætað hine ænig þing dön his fæder oððe meder
13 toslitende godes bebod. for eower stüntan lage þe ge gesetton. & manega oþre þing ðysum gelice ge doð;
14 And eft þa menegu he him toclypode & cwæð; Ge-hyraþ me ealle & ongytað;
15 Nis nän þing of þam men on hine gangende þt hine besmïtan mæge; Ac þa ðing þe of ðam men forð-gað. þa hine besmitað.
16 gif hwa earan hæbbe gehlyste me;
17 And þa se hælend fram þære menegu eode his leorning-cnihtas hine än big-spell ahsodon;
18 Þa cwæð he. & synt ge þus ungleawe ne on-gyte ge. þt eall þæt utan cymð on þone man gangende. ne mæg hine besmitan.
19 forþam hit ne gæð on his heortan. ac on his innoð. & on forð-gang gewïteð ealle mettas clænsigende;
20 Ða sæde he him þt ða þing ðe of þam men gað. þa hine besmitað;
21 Innan of manna heortan. yfele geþancas cumað. unriht-hæmedu. & forligeru. manslihtas.
22 [stala.] gytsung. män. facnu. sceamleast. yfel gesihð. dysinessa. ofer-modignessa. stuntscipe.
23 & ealle þas yfelu of þam innoðe cumað & þone man besmitað;