WestSaxon990(i)
1 Soðlice se hælend wæs full halgum gäste & ferde fram iordane. & he wæs fram haligum gaste gelæd. on sumum westene
2 feowertig daga. & wæs fram deofle costod. & he on þam dagum nän þing ne æt; And þam dagum gefylledum hine hingrede;
3 Ða cwæð se deofol him to. gif þu sy godes sunu sege þisum stäne þt he to hlafe gewurðe;
4 Ða &swarude him se hælend; Hit is awriten þt se man ne leofaþ be hläfe anum. ac of ælcum godes wörde;
5 And þa lædde se deofol hyne. & ætywde him ealle rïcu eorðan ymbe-hwyrftes. on änre byrhm-hwïle
6 & to him cwæð; Ealne þisne anweald ic ðe sylle. & hyra wuldor. forþam þe hi me synt gesealde. & ic hi sylle þam ðe ic wylle;
7 Witodlice ealle hig beoð þine gif þu geeað-metst beforan me;
8 Þa &swarode him se hælend; Hit is awriten. drihten þinne god ðu geead-metst. & him anum þeowast;
9 Ða lædde he hyne on hierusalem & gesette hine ofer þæs temples hricg. & him to cwæð; Gyf þu sy godes sunu äsend þe heonun nyþer;
10 Soðlice hyt is awriten. þt he hys englum be þe bebyt þt hig þe gehealdon.
11 & þæt hig þe mid handum nimon. þelæs þu ðinne fot æt stäne æt-speorne;
12 Ða cwæð se hælend him &swariende; Hyt is gecweden. ne costa þu drihten þinne god;
13 & ealre þære costunge gefylledre. se deofol him sume hwile fram gewät;