WestSaxon1175(i)
1 Ða comen to hym farisej & sume bokeres cumende fram ierusalem.
2 & þa hyo ge-seagen sume of his leorning-cnihten be-smitene handen þt is un-þwogenen handen æten. hyo telden hyo & cwæðen.
3 Farisej & ealle iudeas ne æteð buton hyo heore hande ge-lomlice þwean healdende heora yldre ge-setnysse.
4 & on stræte hi ne ætað. buton hyo geþwegen beon. & manege oðre synde þe heom ge-sette synde. þt is calice frymþa & ceaca. & apfata & manslage. (sic).
5 Ac þa axode hine farisej & þa boceres hwi ne gad þine leorning-cnihtes æfter ure yldrena ge-setnysse. ac be-smitenen handen heora hlaf þiggieð.
6 Ða andswerede he heom. Wel witegede ysaias be eow liceteren swa hit awriten is. Ðis folc me mid weleren wurðed. soðlice heore heorten his feor fram me.
7 on ydel hyo me wurðiað. & manna lare & bebode læred.
8 Soðlice ge for-læteð godes bebod. & healded manna lage. þweala ceaca & calica. & manege oðre þellice þing ge doð.
9 Þa sæde he heom. wel ge on ydel dyden godes be-bod. þt ge eower lage healden.
10 Moyses cwæð wurðe þinne fæder & þine moder. & se þe wergeð his fader & his moder swelte se deaðe.
11 Soðlice ge cweðad. gyf hwa sægd his fader & his moder corban. þæt is on ure þeode gyfu. gyf hwilc is of me þe fremeð.
12 & ofer þæt ge ne læteð hine anig þing. þanne his fæder odðe his moder
13 to-slitende godes be-bod for eower stunten lage. þe ge ge-sætten. & manege oðre þing þise gelice ge doð.
14 And eft þa manige he him to-clepede & cwæð. Ge-herað me ealle & ongetað.
15 Nis nan þing of þam menn on hine gangende þt hine be-smiten mage. Ac þa þing þe of þam men forð gæð. þa hine be-smiteð.
16 gyf hwa earan hæfð hleste me.
17 End þa se hælend fram þare manigeo eode his leorning-cnihtes hine on bispellen axoden.
18 Ða cwæð he. & sende ge swa ungleawe ne on-geate ge. þt eall þt utan cymð on þane mann gangende. ne maig hine be-smiten.
19 for þan hit ne gæð on his heorten. ac on his innoð. & on forðgang ge-witeð ealle metas clænsiende.
20 Ða saigde he heom. þt þa þing þe of þam men gað. þa hine besmiteð.
21 in-nen of manne heorten yfele geþances cumæð. unriht-hameðe. & forleigre. manslihte.
22 stale. gytsunge. man facnu. scamelest. yfel ge-sihðe. desynysse. ofer-modignessa. stunt-scipe.
23 ealle þas yfele of þan innoðe cumeð. & þane man be-smiteð.