John 2

WestSaxon1175(i) 1 [Note: Nuptie facte sunt in chana galilëë. ] On þam þriddan daige wæren gyfte ge ge-wordene (sic) on chana galilëë. ænd þas halendes moder wæs þær. 2 Soðlice se halend ænd hys leorning-cnihtes wæren ge-laðode to þam gyftan. 3 & þa þæt win ge-trukede þa cwæð þas hælendes moder to hym hyo nabbeð win. 4 Þa cwæð se halend to hire. la wif. hwæt ys me & þe; gyt min time ne com. 5 Ða cwæð þas halendes moder to þam þenum; doð swa hwæt swa he eow segge. 6 Ðær wæren soðlice a-set syx stenene water-fate. æfter iudea ge-clensunge. ælc wæs on twere sestra ge-mette. oððe on þreora. 7 Ða bead se halend þæt hyo þa fate mid watere ge-fyldon. & hyo ge-felden þa odð (sic) þanne brerd. 8 Ða cwæð se halend. hladeð nu. & berað þare drihte ealdre & hy naman. 9 Ða se drihte ealder þæs wines on-byrgde. þe of þam wætere ge-worðan wæs; he nyste hwanen hyt com. þa þenas soðlice wisten þe þæt water hloden. Se drihte ealdor clipende (sic) þanne bridgumen 10 & cwæð to hym; ælc man sylð ærest god win. & þonne hyo drunkene beoð. þæt þe wyrse beoð. Ðu þe ge-heolde þæt gode win oð þys. 11 Ðis wæs þæt forme taken þe se halend worhte on chana a-galilëë & ge-sutelode his wuldor & hys leorning-cnihtes ge-lyfdon on hine. 12 Æfter þisen he and hys moder & hys ge-broðra & hys leorning-cnihtes foron to capharnaum & wuneden þær feawan dagen. 13 Ænd hyt wæs neah iudea eastron & se halend for to ierusalem 14 & ge-mette on þam temple þa þe sealdan oxan. & scep ænd culfran. & sittende meneteres. 15 & he worhte swipan of strengen & hyo ealle of þam temple adraf ge sceap. ge oxan. & he ageat þare menetera feoh & to-warp heoræ mysan. 16 & sægde þam þe þa culfran cypton doð þas þyng henon. ne wyrce ge mines fæder hus to mangun-huse. 17 Ða ge-mundon hys leorning-cnihtes þæt ðe awriten is. þines huses ände me ëtt. 18 Ða answeredon hym þa iudeas & cwæðen. hwilc taken atewest þu üs for þam þe þu þas þing dest. 19 Se halend heom andswerede & cwæð. to-weorpeð þis tempel & ic hyt arere binnen þreom dagum. 20 Ða iudeas cwæðen to hym. þis tempel wæs ge-tymbred on six & feortigon wintren. & arerst þu hit on ðrim dagum. 21 Soðlice he hyt cwæð be hys lichamen temple. 22 Ða he of deaðe aras; þa ge-mundon hys leorning-cnihtes þæt he hyt be hym selfum cwæð. Ænd hyo ge-lyfdon halegum write & þare spræce þe se halend spræc. 23 Ða he wæs on ierusalem on eastron on freols-daige. manege ge-lyfdon on hys naman. þa hyo ge-seawan ða tacne þe he worhtu (sic). 24 Se halend ne ge-swutelode hyne sylfne heom. for-þam he cuþe hyo ealle. 25 & for-þam hym næs nan þearf þt aning (sic) man sæde witnysse be men. he wiste witodlice hwæt wæs on men.