HOT(i)
1 למנצח מזמור לדוד׃ (64:2) שׁמע אלהים קולי בשׂיחי מפחד אויב תצר חיי׃ 2 (64:3) תסתירני מסוד מרעים מרגשׁת פעלי און׃ 3 (64:4) אשׁר שׁננו כחרב לשׁונם דרכו חצם דבר מר׃ 4 (64:5) לירות במסתרים תם פתאם ירהו ולא ייראו׃ 5 (64:6) יחזקו למו דבר רע יספרו לטמון מוקשׁים אמרו מי יראה׃ 6 (64:7) יחפשׂו עולת תמנו חפשׂ מחפשׂ וקרב אישׁ ולב עמק׃ 7 (64:8) וירם אלהים חץ פתאום היו מכותם׃ 8 (64:9) ויכשׁילוהו עלימו לשׁונם יתנדדו כל ראה׃ 9 (64:10) וייראו כל אדם ויגידו פעל אלהים ומעשׂהו השׂכילו׃ 10 (64:11) ישׂמח צדיק ביהוה וחסה בו ויתהללו כל ישׁרי לב׃