HOT(i)
1 הללו יה שׁירו ליהוה שׁיר חדשׁ תהלתו בקהל חסידים׃ 2 ישׂמח ישׂראל בעשׂיו בני ציון יגילו במלכם׃ 3 יהללו שׁמו במחול בתף וכנור יזמרו׃ 4 כי רוצה יהוה בעמו יפאר ענוים בישׁועה׃ 5 יעלזו חסידים בכבוד ירננו על משׁכבותם׃ 6 רוממות אל בגרונם וחרב פיפיות בידם׃ 7 לעשׂות נקמה בגוים תוכחת בל אמים׃ 8 לאסר מלכיהם בזקים ונכבדיהם בכבלי ברזל׃ 9 לעשׂות בהם משׁפט כתוב הדר הוא לכל חסידיו הללו יה׃150 1 הללו יה הללו אל בקדשׁו הללוהו ברקיע עזו׃ 2 הללוהו בגבורתיו הללוהו כרב גדלו׃ 3 הללוהו בתקע שׁופר הללוהו בנבל וכנור׃ 4 הללוהו בתף ומחול הללוהו במנים ועוגב׃ 5 הללוהו בצלצלי שׁמע הללוהו בצלצלי תרועה׃ 6 כל הנשׁמה תהלל יה הללו יה׃