Psalms 138:1-150:6 לדוד אודך בכל לבי נגד אלהים אזמרך׃

HOT⁽ⁱ⁾ ¹ לדוד אודך בכל לבי נגד אלהים אזמרך׃ ² אשׁתחוה אל היכל קדשׁך ואודה את שׁמך על חסדך ועל אמתך כי הגדלת על כל שׁמך אמרתך׃ ³ ביום קראתי ותענני תרהבני בנפשׁי עז׃ ⁴ יודוך יהוה כל מלכי ארץ כי שׁמעו אמרי פיך׃ ⁵ וישׁירו בדרכי יהוה כי גדול כבוד יהוה׃ ⁶ כי רם יהוה ושׁפל יראה וגבה ממרחק יידע׃ ⁷ אם אלך בקרב צרה תחיני על אף איבי תשׁלח ידך ותושׁיעני ימינך׃ ⁸ יהוה יגמר בעדי יהוה חסדך לעולם מעשׂי ידיך אל תרף׃¹³⁹ ¹ למנצח לדוד מזמור יהוה חקרתני ותדע׃ ² אתה ידעת שׁבתי וקומי בנתה לרעי מרחוק׃ ³ ארחי ורבעי זרית וכל דרכי הסכנתה׃ ⁴ כי אין מלה בלשׁוני הן יהוה ידעת כלה׃ ⁵ אחור וקדם צרתני ותשׁת עלי כפכה׃ ⁶ פלאיה דעת ממני נשׂגבה לא אוכל׃ ⁷ אנה אלך מרוחך ואנה מפניך אברח׃ ⁸ אם אסק שׁמים שׁם אתה ואציעה שׁאול הנך׃ ⁹ אשׂא כנפי שׁחר אשׁכנה באחרית ים׃ ¹⁰ גם שׁם ידך תנחני ותאחזני ימינך׃ ¹¹ ואמר אך חשׁך ישׁופני ולילה אור בעדני׃ ¹² גם חשׁך לא יחשׁיך ממך ולילה כיום יאיר כחשׁיכה כאורה׃ ¹³ כי אתה קנית כליתי תסכני בבטן אמי׃ ¹⁴ אודך על כי נוראות נפליתי נפלאים מעשׂיך ונפשׁי ידעת מאד׃ ¹⁵ לא נכחד עצמי ממך אשׁר עשׂיתי בסתר רקמתי בתחתיות ארץ׃ ¹⁶ גלמי ראו עיניך ועל ספרך כלם יכתבו ימים יצרו ולא אחד׃ ¹⁷ ולי מה יקרו רעיך אל מה עצמו ראשׁיהם׃ ¹⁸ אספרם מחול ירבון הקיצתי ועודי עמך׃ ¹⁹ אם תקטל אלוה רשׁע ואנשׁי דמים סורו מני׃ ²⁰ אשׁר יאמרך למזמה נשׂא לשׁוא עריך׃ ²¹ הלוא משׂנאיך יהוה אשׂנא ובתקוממיך אתקוטט׃ ²² תכלית שׂנאה שׂנאתים לאויבים היו׃ ²³ חקרני אל ודע לבבי בחנני ודע שׂרעפי׃ ²⁴ וראה אם דרך עצב בי ונחני בדרך עולם׃¹⁴⁰ ¹ למנצח מזמור לדוד׃ (140:2) חלצני יהוה מאדם רע מאישׁ חמסים תנצרני׃ ² (140:3) אשׁר חשׁבו רעות בלב כל יום יגורו מלחמות׃ ³ (140:4) שׁננו לשׁונם כמו נחשׁ חמת עכשׁוב תחת שׂפתימו סלה׃ ⁴ (140:5) שׁמרני יהוה מידי רשׁע מאישׁ חמסים תנצרני אשׁר חשׁבו לדחות פעמי׃ ⁵ (140:6) טמנו גאים פח לי וחבלים פרשׂו רשׁת ליד מעגל מקשׁים שׁתו לי סלה׃ ⁶ (140:7) אמרתי ליהוה אלי אתה האזינה יהוה קול תחנוני׃ ⁷ (140:8) יהוה אדני עז ישׁועתי סכתה לראשׁי ביום נשׁק׃ ⁸ (140:9) אל תתן יהוה מאויי רשׁע זממו אל תפק ירומו סלה׃ ⁹ (140:10) ראשׁ מסבי עמל שׂפתימו יכסומו׃ ¹⁰ (140:11) ימיטו עליהם גחלים באשׁ יפלם במהמרות בל יקומו׃ ¹¹ (140:12) אישׁ לשׁון בל יכון בארץ אישׁ חמס רע יצודנו למדחפת׃ ¹² (140:13) ידעת כי יעשׂה יהוה דין עני משׁפט אבינים׃ ¹³ (140:14) אך צדיקים יודו לשׁמך ישׁבו ישׁרים את פניך׃¹⁴¹ ¹ מזמור לדוד יהוה קראתיך חושׁה לי האזינה קולי בקראי׃ ² תכון תפלתי קטרת לפניך משׂאת כפי מנחת ערב׃ ³ שׁיתה יהוה שׁמרה לפי נצרה על דל שׂפתי׃ ⁴ אל תט לבי לדבר רע להתעולל עללות ברשׁע את אישׁים פעלי און ובל אלחם במנעמיהם׃ ⁵ יהלמני צדיק חסד ויוכיחני שׁמן ראשׁ אל יני ראשׁי כי עוד ותפלתי ברעותיהם׃ ⁶ נשׁמטו בידי סלע שׁפטיהם ושׁמעו אמרי כי נעמו׃ ⁷ כמו פלח ובקע בארץ נפזרו עצמינו לפי שׁאול׃ ⁸ כי אליך יהוה אדני עיני בכה חסיתי אל תער נפשׁי׃ ⁹ שׁמרני מידי פח יקשׁו לי ומקשׁות פעלי און׃ ¹⁰ יפלו במכמריו רשׁעים יחד אנכי עד אעבור׃¹⁴² ¹ משׂכיל לדוד בהיותו במערה תפלה׃ (142:2) קולי אל יהוה אזעק קולי אל יהוה אתחנן׃ ² (142:3) אשׁפך לפניו שׂיחי צרתי לפניו אגיד׃ ³ (142:4) בהתעטף עלי רוחי ואתה ידעת נתיבתי בארח זו אהלך טמנו פח׃ ⁴ (142:5) הביט ימין וראה ואין לי מכיר אבד מנוס ממני אין דורשׁ לנפשׁי׃ ⁵ (142:6) זעקתי אליך יהוה אמרתי אתה מחסי חלקי בארץ החיים׃ ⁶ (142:7) הקשׁיבה אל רנתי כי דלותי מאד הצילני מרדפי כי אמצו ממני׃ ⁷ (142:8) הוציאה ממסגר נפשׁי להודות את שׁמך בי יכתרו צדיקים כי תגמל עלי׃¹⁴³ ¹ מזמור לדוד יהוה שׁמע תפלתי האזינה אל תחנוני באמנתך ענני בצדקתך׃ ² ואל תבוא במשׁפט את עבדך כי לא יצדק לפניך כל חי׃ ³ כי רדף אויב נפשׁי דכא לארץ חיתי הושׁיבני במחשׁכים כמתי עולם׃ ⁴ ותתעטף עלי רוחי בתוכי ישׁתומם לבי׃ ⁵ זכרתי ימים מקדם הגיתי בכל פעלך במעשׂה ידיך אשׂוחח׃ ⁶ פרשׂתי ידי אליך נפשׁי כארץ עיפה לך סלה׃ ⁷ מהר ענני יהוה כלתה רוחי אל תסתר פניך ממני ונמשׁלתי עם ירדי בור׃ ⁸ השׁמיעני בבקר חסדך כי בך בטחתי הודיעני דרך זו אלך כי אליך נשׂאתי נפשׁי׃ ⁹ הצילני מאיבי יהוה אליך כסתי׃ ¹⁰ למדני לעשׂות רצונך כי אתה אלוהי רוחך טובה תנחני בארץ מישׁור׃ ¹¹ למען שׁמך יהוה תחיני בצדקתך תוציא מצרה נפשׁי׃ ¹² ובחסדך תצמית איבי והאבדת כל צררי נפשׁי כי אני עבדך׃¹⁴⁴ ¹ לדוד ברוך יהוה צורי המלמד ידי לקרב אצבעותי למלחמה׃ ² חסדי ומצודתי משׂגבי ומפלטי לי מגני ובו חסיתי הרודד עמי תחתי׃ ³ יהוה מה אדם ותדעהו בן אנושׁ ותחשׁבהו׃ ⁴ אדם להבל דמה ימיו כצל עובר׃ ⁵ יהוה הט שׁמיך ותרד גע בהרים ויעשׁנו׃ ⁶ ברוק ברק ותפיצם שׁלח חציך ותהמם׃ ⁷ שׁלח ידיך ממרום פצני והצילני ממים רבים מיד בני נכר׃ ⁸ אשׁר פיהם דבר שׁוא וימינם ימין שׁקר׃ ⁹ אלהים שׁיר חדשׁ אשׁירה לך בנבל עשׂור אזמרה׃ ¹⁰ הנותן תשׁועה למלכים הפוצה את דוד עבדו מחרב רעה׃ ¹¹ פצני והצילני מיד בני נכר אשׁר פיהם דבר שׁוא וימינם ימין שׁקר׃ ¹² אשׁר בנינו כנטעים מגדלים בנעוריהם בנותינו כזוית מחטבות תבנית היכל׃ ¹³ מזוינו מלאים מפיקים מזן אל זן צאוננו מאליפות מרבבות בחוצותינו׃ ¹⁴ אלופינו מסבלים אין פרץ ואין יוצאת ואין צוחה ברחבתינו׃ ¹⁵ אשׁרי העם שׁככה לו אשׁרי העם שׁיהוה אלהיו׃¹⁴⁵ ¹ תהלה לדוד ארוממך אלוהי המלך ואברכה שׁמך לעולם ועד׃ ² בכל יום אברכך ואהללה שׁמך לעולם ועד׃ ³ גדול יהוה ומהלל מאד ולגדלתו אין חקר׃ ⁴ דור לדור ישׁבח מעשׂיך וגבורתיך יגידו׃ ⁵ הדר כבוד הודך ודברי נפלאותיך אשׂיחה׃ ⁶ ועזוז נוראתיך יאמרו וגדולתיך אספרנה׃ ⁷ זכר רב טובך יביעו וצדקתך ירננו׃ ⁸ חנון ורחום יהוה ארך אפים וגדל חסד׃ ⁹ טוב יהוה לכל ורחמיו על כל מעשׂיו׃ ¹⁰ יודוך יהוה כל מעשׂיך וחסידיך יברכוכה׃ ¹¹ כבוד מלכותך יאמרו וגבורתך ידברו׃ ¹² להודיע לבני האדם גבורתיו וכבוד הדר מלכותו׃ ¹³ מלכותך מלכות כל עלמים וממשׁלתך בכל דור ודור׃ ¹⁴ סומך יהוה לכל הנפלים וזוקף לכל הכפופים׃ ¹⁵ עיני כל אליך ישׂברו ואתה נותן להם את אכלם בעתו׃ ¹⁶ פותח את ידך ומשׂביע לכל חי רצון׃ ¹⁷ צדיק יהוה בכל דרכיו וחסיד בכל מעשׂיו׃ ¹⁸ קרוב יהוה לכל קראיו לכל אשׁר יקראהו באמת׃ ¹⁹ רצון יראיו יעשׂה ואת שׁועתם ישׁמע ויושׁיעם׃ ²⁰ שׁומר יהוה את כל אהביו ואת כל הרשׁעים ישׁמיד׃ ²¹ תהלת יהוה ידבר פי ויברך כל בשׂר שׁם קדשׁו לעולם ועד׃¹⁴⁶ ¹ הללו יה הללי נפשׁי את יהוה׃ ² אהללה יהוה בחיי אזמרה לאלהי בעודי׃ ³ אל תבטחו בנדיבים בבן אדם שׁאין לו תשׁועה׃ ⁴ תצא רוחו ישׁב לאדמתו ביום ההוא אבדו עשׁתנתיו׃ ⁵ אשׁרי שׁאל יעקב בעזרו שׂברו על יהוה אלהיו׃ ⁶ עשׂה שׁמים וארץ את הים ואת כל אשׁר בם השׁמר אמת לעולם׃ ⁷ עשׂה משׁפט לעשׁוקים נתן לחם לרעבים יהוה מתיר אסורים׃ ⁸ יהוה פקח עורים יהוה זקף כפופים יהוה אהב צדיקים׃ ⁹ יהוה שׁמר את גרים יתום ואלמנה יעודד ודרך רשׁעים יעות׃ ¹⁰ ימלך יהוה לעולם אלהיך ציון לדר ודר הללו יה׃¹⁴⁷ ¹ הללו יה כי טוב זמרה אלהינו כי נעים נאוה תהלה׃ ² בונה ירושׁלם יהוה נדחי ישׂראל יכנס׃ ³ הרפא לשׁבורי לב ומחבשׁ לעצבותם׃ ⁴ מונה מספר לכוכבים לכלם שׁמות יקרא׃ ⁵ גדול אדונינו ורב כח לתבונתו אין מספר׃ ⁶ מעודד ענוים יהוה משׁפיל רשׁעים עדי ארץ׃ ⁷ ענו ליהוה בתודה זמרו לאלהינו בכנור׃ ⁸ המכסה שׁמים בעבים המכין לארץ מטר המצמיח הרים חציר׃ ⁹ נותן לבהמה לחמה לבני ערב אשׁר יקראו׃ ¹⁰ לא בגבורת הסוס יחפץ לא בשׁוקי האישׁ ירצה׃ ¹¹ רוצה יהוה את יראיו את המיחלים לחסדו׃ ¹² שׁבחי ירושׁלם את יהוה הללי אלהיך ציון׃ ¹³ כי חזק בריחי שׁעריך ברך בניך בקרבך׃ ¹⁴ השׂם גבולך שׁלום חלב חטים ישׂביעך׃ ¹⁵ השׁלח אמרתו ארץ עד מהרה ירוץ דברו׃ ¹⁶ הנתן שׁלג כצמר כפור כאפר יפזר׃ ¹⁷ משׁליך קרחו כפתים לפני קרתו מי יעמד׃ ¹⁸ ישׁלח דברו וימסם ישׁב רוחו יזלו מים׃ ¹⁹ מגיד דברו ליעקב חקיו ומשׁפטיו לישׂראל׃ ²⁰ לא עשׂה כן לכל גוי ומשׁפטים בל ידעום הללו יה׃¹⁴⁸ ¹ הללו יה הללו את יהוה מן השׁמים הללוהו במרומים׃ ² הללוהו כל מלאכיו הללוהו כל צבאו׃ ³ הללוהו שׁמשׁ וירח הללוהו כל כוכבי אור׃ ⁴ הללוהו שׁמי השׁמים והמים אשׁר מעל השׁמים׃ ⁵ יהללו את שׁם יהוה כי הוא צוה ונבראו׃ ⁶ ויעמידם לעד לעולם חק נתן ולא יעבור׃ ⁷ הללו את יהוה מן הארץ תנינים וכל תהמות׃ ⁸ אשׁ וברד שׁלג וקיטור רוח סערה עשׂה דברו׃ ⁹ ההרים וכל גבעות עץ פרי וכל ארזים׃ ¹⁰ החיה וכל בהמה רמשׂ וצפור כנף׃ ¹¹ מלכי ארץ וכל לאמים שׂרים וכל שׁפטי ארץ׃ ¹² בחורים וגם בתולות זקנים עם נערים׃ ¹³ יהללו את שׁם יהוה כי נשׂגב שׁמו לבדו הודו על ארץ ושׁמים׃ ¹⁴ וירם קרן לעמו תהלה לכל חסידיו לבני ישׂראל עם קרבו הללו יה׃¹⁴⁹ ¹ הללו יה שׁירו ליהוה שׁיר חדשׁ תהלתו בקהל חסידים׃ ² ישׂמח ישׂראל בעשׂיו בני ציון יגילו במלכם׃ ³ יהללו שׁמו במחול בתף וכנור יזמרו׃ ⁴ כי רוצה יהוה בעמו יפאר ענוים בישׁועה׃ ⁵ יעלזו חסידים בכבוד ירננו על משׁכבותם׃ ⁶ רוממות אל בגרונם וחרב פיפיות בידם׃ ⁷ לעשׂות נקמה בגוים תוכחת בל אמים׃ ⁸ לאסר מלכיהם בזקים ונכבדיהם בכבלי ברזל׃ ⁹ לעשׂות בהם משׁפט כתוב הדר הוא לכל חסידיו הללו יה׃¹⁵⁰ ¹ הללו יה הללו אל בקדשׁו הללוהו ברקיע עזו׃ ² הללוהו בגבורתיו הללוהו כרב גדלו׃ ³ הללוהו בתקע שׁופר הללוהו בנבל וכנור׃ ⁴ הללוהו בתף ומחול הללוהו במנים ועוגב׃ ⁵ הללוהו בצלצלי שׁמע הללוהו בצלצלי תרועה׃ ⁶ כל הנשׁמה תהלל יה הללו יה׃