Psalms 104:1-150:6 ברכי נפשׁי את יהוה יהוה אלהי גדלת מאד הוד והדר לבשׁת׃

HOT⁽ⁱ⁾ ¹ ברכי נפשׁי את יהוה יהוה אלהי גדלת מאד הוד והדר לבשׁת׃ ² עטה אור כשׂלמה נוטה שׁמים כיריעה׃ ³ המקרה במים עליותיו השׂם עבים רכובו המהלך על כנפי רוח׃ ⁴ עשׂה מלאכיו רוחות משׁרתיו אשׁ להט׃ ⁵ יסד ארץ על מכוניה בל תמוט עולם ועד׃ ⁶ תהום כלבושׁ כסיתו על הרים יעמדו מים׃ ⁷ מן גערתך ינוסון מן קול רעמך יחפזון׃ ⁸ יעלו הרים ירדו בקעות אל מקום זה יסדת להם׃ ⁹ גבול שׂמת בל יעברון בל ישׁובון לכסות הארץ׃ ¹⁰ המשׁלח מעינים בנחלים בין הרים יהלכון׃ ¹¹ ישׁקו כל חיתו שׂדי ישׁברו פראים צמאם׃ ¹² עליהם עוף השׁמים ישׁכון מבין עפאים יתנו קול׃ ¹³ משׁקה הרים מעליותיו מפרי מעשׂיך תשׂבע הארץ׃ ¹⁴ מצמיח חציר לבהמה ועשׂב לעבדת האדם להוציא לחם מן הארץ׃ ¹⁵ ויין ישׂמח לבב אנושׁ להצהיל פנים משׁמן ולחם לבב אנושׁ יסעד׃ ¹⁶ ישׂבעו עצי יהוה ארזי לבנון אשׁר נטע׃ ¹⁷ אשׁר שׁם צפרים יקננו חסידה ברושׁים ביתה׃ ¹⁸ הרים הגבהים ליעלים סלעים מחסה לשׁפנים׃ ¹⁹ עשׂה ירח למועדים שׁמשׁ ידע מבואו׃ ²⁰ תשׁת חשׁך ויהי לילה בו תרמשׂ כל חיתו יער׃ ²¹ הכפירים שׁאגים לטרף ולבקשׁ מאל אכלם׃ ²² תזרח השׁמשׁ יאספון ואל מעונתם ירבצון׃ ²³ יצא אדם לפעלו ולעבדתו עדי ערב׃ ²⁴ מה רבו מעשׂיך יהוה כלם בחכמה עשׂית מלאה הארץ קנינך׃ ²⁵ זה הים גדול ורחב ידים שׁם רמשׂ ואין מספר חיות קטנות עם גדלות׃ ²⁶ שׁם אניות יהלכון לויתן זה יצרת לשׂחק׃ ²⁷ כלם אליך ישׂברון לתת אכלם בעתו׃ ²⁸ תתן להם ילקטון תפתח ידך ישׂבעון טוב׃ ²⁹ תסתיר פניך יבהלון תסף רוחם יגועון ואל עפרם ישׁובון׃ ³⁰ תשׁלח רוחך יבראון ותחדשׁ פני אדמה׃ ³¹ יהי כבוד יהוה לעולם ישׂמח יהוה במעשׂיו׃ ³² המביט לארץ ותרעד יגע בהרים ויעשׁנו׃ ³³ אשׁירה ליהוה בחיי אזמרה לאלהי בעודי׃ ³⁴ יערב עליו שׂיחי אנכי אשׂמח ביהוה׃ ³⁵ יתמו חטאים מן הארץ ורשׁעים עוד אינם ברכי נפשׁי את יהוה הללו יה׃¹⁰⁵ ¹ הודו ליהוה קראו בשׁמו הודיעו בעמים עלילותיו׃ ² שׁירו לו זמרו לו שׂיחו בכל נפלאותיו׃ ³ התהללו בשׁם קדשׁו ישׂמח לב מבקשׁי יהוה׃ ⁴ דרשׁו יהוה ועזו בקשׁו פניו תמיד׃ ⁵ זכרו נפלאותיו אשׁר עשׂה מפתיו ומשׁפטי פיו׃ ⁶ זרע אברהם עבדו בני יעקב בחיריו׃ ⁷ הוא יהוה אלהינו בכל הארץ משׁפטיו׃ ⁸ זכר לעולם בריתו דבר צוה לאלף דור׃ ⁹ אשׁר כרת את אברהם ושׁבועתו לישׂחק׃ ¹⁰ ויעמידה ליעקב לחק לישׂראל ברית עולם׃ ¹¹ לאמר לך אתן את ארץ כנען חבל נחלתכם׃ ¹² בהיותם מתי מספר כמעט וגרים׃ ¹³ ויתהלכו מגוי אל גוי מממלכה אל עם אחר׃ ¹⁴ לא הניח אדם לעשׁקם ויוכח עליהם מלכים׃ ¹⁵ אל תגעו במשׁיחי ולנביאי אל תרעו׃ ¹⁶ ויקרא רעב על הארץ כל מטה לחם שׁבר׃ ¹⁷ שׁלח לפניהם אישׁ לעבד נמכר יוסף׃ ¹⁸ ענו בכבל רגליו ברזל באה נפשׁו׃ ¹⁹ עד עת בא דברו אמרת יהוה צרפתהו׃ ²⁰ שׁלח מלך ויתירהו משׁל עמים ויפתחהו׃ ²¹ שׂמו אדון לביתו ומשׁל בכל קנינו׃ ²² לאסר שׂריו בנפשׁו וזקניו יחכם׃ ²³ ויבא ישׂראל מצרים ויעקב גר בארץ חם׃ ²⁴ ויפר את עמו מאד ויעצמהו מצריו׃ ²⁵ הפך לבם לשׂנא עמו להתנכל בעבדיו׃ ²⁶ שׁלח משׁה עבדו אהרן אשׁר בחר׃ ²⁷ שׂמו בם דברי אתותיו ומפתים בארץ חם׃ ²⁸ שׁלח חשׁך ויחשׁך ולא מרו את דברוו׃ ²⁹ הפך את מימיהם לדם וימת את דגתם׃ ³⁰ שׁרץ ארצם צפרדעים בחדרי מלכיהם׃ ³¹ אמר ויבא ערב כנים בכל גבולם׃ ³² נתן גשׁמיהם ברד אשׁ להבות בארצם׃ ³³ ויך גפנם ותאנתם וישׁבר עץ גבולם׃ ³⁴ אמר ויבא ארבה וילק ואין מספר׃ ³⁵ ויאכל כל עשׂב בארצם ויאכל פרי אדמתם׃ ³⁶ ויך כל בכור בארצם ראשׁית לכל אונם׃ ³⁷ ויוציאם בכסף וזהב ואין בשׁבטיו כושׁל׃ ³⁸ שׂמח מצרים בצאתם כי נפל פחדם עליהם׃ ³⁹ פרשׂ ענן למסך ואשׁ להאיר לילה׃ ⁴⁰ שׁאל ויבא שׂלו ולחם שׁמים ישׂביעם׃ ⁴¹ פתח צור ויזובו מים הלכו בציות נהר׃ ⁴² כי זכר את דבר קדשׁו את אברהם עבדו׃ ⁴³ ויוצא עמו בשׂשׂון ברנה את בחיריו׃ ⁴⁴ ויתן להם ארצות גוים ועמל לאמים יירשׁו׃ ⁴⁵ בעבור ישׁמרו חקיו ותורתיו ינצרו הללו יה׃¹⁰⁶ ¹ הללויה הודו ליהוה כי טוב כי לעולם חסדו׃ ² מי ימלל גבורות יהוה ישׁמיע כל תהלתו׃ ³ אשׁרי שׁמרי משׁפט עשׂה צדקה בכל עת׃ ⁴ זכרני יהוה ברצון עמך פקדני בישׁועתך׃ ⁵ לראות בטובת בחיריך לשׂמח בשׂמחת גויך להתהלל עם נחלתך׃ ⁶ חטאנו עם אבותינו העוינו הרשׁענו׃ ⁷ אבותינו במצרים לא השׂכילו נפלאותיך לא זכרו את רב חסדיך וימרו על ים בים סוף׃ ⁸ ויושׁיעם למען שׁמו להודיע את גבורתו׃ ⁹ ויגער בים סוף ויחרב ויוליכם בתהמות כמדבר׃ ¹⁰ ויושׁיעם מיד שׂונא ויגאלם מיד אויב׃ ¹¹ ויכסו מים צריהם אחד מהם לא נותר׃ ¹² ויאמינו בדבריו ישׁירו תהלתו׃ ¹³ מהרו שׁכחו מעשׂיו לא חכו לעצתו׃ ¹⁴ ויתאוו תאוה במדבר וינסו אל בישׁימון׃ ¹⁵ ויתן להם שׁאלתם וישׁלח רזון בנפשׁם׃ ¹⁶ ויקנאו למשׁה במחנה לאהרן קדושׁ יהוה׃ ¹⁷ תפתח ארץ ותבלע דתן ותכס על עדת אבירם׃ ¹⁸ ותבער אשׁ בעדתם להבה תלהט רשׁעים׃ ¹⁹ יעשׂו עגל בחרב וישׁתחוו למסכה׃ ²⁰ וימירו את כבודם בתבנית שׁור אכל עשׂב׃ ²¹ שׁכחו אל מושׁיעם עשׂה גדלות במצרים׃ ²² נפלאות בארץ חם נוראות על ים סוף׃ ²³ ויאמר להשׁמידם לולי משׁה בחירו עמד בפרץ לפניו להשׁיב חמתו מהשׁחית׃ ²⁴ וימאסו בארץ חמדה לא האמינו לדברו׃ ²⁵ וירגנו באהליהם לא שׁמעו בקול יהוה׃ ²⁶ וישׂא ידו להם להפיל אותם במדבר׃ ²⁷ ולהפיל זרעם בגוים ולזרותם בארצות׃ ²⁸ ויצמדו לבעל פעור ויאכלו זבחי מתים׃ ²⁹ ויכעיסו במעלליהם ותפרץ בם מגפה׃ ³⁰ ויעמד פינחס ויפלל ותעצר המגפה׃ ³¹ ותחשׁב לו לצדקה לדר ודר עד עולם׃ ³² ויקציפו על מי מריבה וירע למשׁה בעבורם׃ ³³ כי המרו את רוחו ויבטא בשׂפתיו׃ ³⁴ לא השׁמידו את העמים אשׁר אמר יהוה להם׃ ³⁵ ויתערבו בגוים וילמדו מעשׂיהם׃ ³⁶ ויעבדו את עצביהם ויהיו להם למוקשׁ׃ ³⁷ ויזבחו את בניהם ואת בנותיהם לשׁדים׃ ³⁸ וישׁפכו דם נקי דם בניהם ובנותיהם אשׁר זבחו לעצבי כנען ותחנף הארץ בדמים׃ ³⁹ ויטמאו במעשׂיהם ויזנו במעלליהם׃ ⁴⁰ ויחר אף יהוה בעמו ויתעב את נחלתו׃ ⁴¹ ויתנם ביד גוים וימשׁלו בהם שׂנאיהם׃ ⁴² וילחצום אויביהם ויכנעו תחת ידם׃ ⁴³ פעמים רבות יצילם והמה ימרו בעצתם וימכו בעונם׃ ⁴⁴ וירא בצר להם בשׁמעו את רנתם׃ ⁴⁵ ויזכר להם בריתו וינחם כרב חסדו׃ ⁴⁶ ויתן אותם לרחמים לפני כל שׁוביהם׃ ⁴⁷ הושׁיענו יהוה אלהינו וקבצנו מן הגוים להדות לשׁם קדשׁך להשׁתבח בתהלתך׃ ⁴⁸ ברוך יהוה אלהי ישׂראל מן העולם ועד העולם ואמר כל העם אמן הללו יה׃¹⁰⁷ ¹ הדו ליהוה כי טוב כי לעולם חסדו׃ ² יאמרו גאולי יהוה אשׁר גאלם מיד צר׃ ³ ומארצות קבצם ממזרח וממערב מצפון ומים׃ ⁴ תעו במדבר בישׁימון דרך עיר מושׁב לא מצאו׃ ⁵ רעבים גם צמאים נפשׁם בהם תתעטף׃ ⁶ ויצעקו אל יהוה בצר להם ממצוקותיהם יצילם׃ ⁷ וידריכם בדרך ישׁרה ללכת אל עיר מושׁב׃ ⁸ יודו ליהוה חסדו ונפלאותיו לבני אדם׃ ⁹ כי השׂביע נפשׁ שׁקקה ונפשׁ רעבה מלא טוב׃ ¹⁰ ישׁבי חשׁך וצלמות אסירי עני וברזל׃ ¹¹ כי המרו אמרי אל ועצת עליון נאצו׃ ¹² ויכנע בעמל לבם כשׁלו ואין עזר׃ ¹³ ויזעקו אל יהוה בצר להם ממצקותיהם יושׁיעם׃ ¹⁴ יוציאם מחשׁך וצלמות ומוסרותיהם ינתק׃ ¹⁵ יודו ליהוה חסדו ונפלאותיו לבני אדם׃ ¹⁶ כי שׁבר דלתות נחשׁת ובריחי ברזל גדע׃ ¹⁷ אולים מדרך פשׁעם ומעונתיהם יתענו׃ ¹⁸ כל אכל תתעב נפשׁם ויגיעו עד שׁערי מות׃ ¹⁹ ויזעקו אל יהוה בצר להם ממצקותיהם יושׁיעם׃ ²⁰ ישׁלח דברו וירפאם וימלט משׁחיתותם׃ ²¹ יודו ליהוה חסדו ונפלאותיו לבני אדם׃ ²² ויזבחו זבחי תודה ויספרו מעשׂיו ברנה׃ ²³ יורדי הים באניות עשׂי מלאכה במים רבים׃ ²⁴ המה ראו מעשׂי יהוה ונפלאותיו במצולה׃ ²⁵ ויאמר ויעמד רוח סערה ותרומם גליו׃ ²⁶ יעלו שׁמים ירדו תהומות נפשׁם ברעה תתמוגג׃ ²⁷ יחוגו וינועו כשׁכור וכל חכמתם תתבלע׃ ²⁸ ויצעקו אל יהוה בצר להם וממצוקתיהם יוציאם׃ ²⁹ יקם סערה לדממה ויחשׁו גליהם׃ ³⁰ וישׂמחו כי ישׁתקו וינחם אל מחוז חפצם׃ ³¹ יודו ליהוה חסדו ונפלאותיו לבני אדם׃ ³² וירממוהו בקהל עם ובמושׁב זקנים יהללוהו׃ ³³ ישׂם נהרות למדבר ומצאי מים לצמאון׃ ³⁴ ארץ פרי למלחה מרעת ישׁבי׃ ³⁵ ישׂם מדבר לאגם מים וארץ ציה למצאי מים׃ ³⁶ ויושׁב שׁם רעבים ויכוננו עיר מושׁב׃ ³⁷ ויזרעו שׂדות ויטעו כרמים ויעשׂו פרי תבואה׃ ³⁸ ויברכם וירבו מאד ובהמתם לא ימעיט׃ ³⁹ וימעטו וישׁחו מעצר רעה ויגון׃ ⁴⁰ שׁפך בוז על נדיבים ויתעם בתהו לא דרך׃ ⁴¹ וישׂגב אביון מעוני וישׂם כצאן משׁפחות׃ ⁴² יראו ישׁרים וישׂמחו וכל עולה קפצה פיה׃ ⁴³ מי חכם וישׁמר אלה ויתבוננו חסדי יהוה׃¹⁰⁸ ¹ שׁיר מזמור לדוד׃ (108:2) נכון לבי אלהים אשׁירה ואזמרה אף כבודי׃ ² (108:3) עורה הנבל וכנור אעירה שׁחר׃ ³ (108:4) אודך בעמים יהוה ואזמרך בל אמים׃ ⁴ (108:5) כי גדול מעל שׁמים חסדך ועד שׁחקים אמתך׃ ⁵ (108:6) רומה על שׁמים אלהים ועל כל הארץ כבודך׃ ⁶ (108:7) למען יחלצון ידידיך הושׁיעה ימינך וענני׃ ⁷ (108:8) אלהים דבר בקדשׁו אעלזה אחלקה שׁכם ועמק סכות אמדד׃ ⁸ (108:9) לי גלעד לי מנשׁה ואפרים מעוז ראשׁי יהודה מחקקי׃ ⁹ (108:10) מואב סיר רחצי על אדום אשׁליך נעלי עלי פלשׁת אתרועע׃ ¹⁰ (108:11) מי יבלני עיר מבצר מי נחני עד אדום׃ ¹¹ (108:12) הלא אלהים זנחתנו ולא תצא אלהים בצבאתינו׃ ¹² (108:13) הבה לנו עזרת מצר ושׁוא תשׁועת אדם׃ ¹³ (108:14) באלהים נעשׂה חיל והוא יבוס צרינו׃¹⁰⁹ ¹ למנצח לדוד מזמור אלהי תהלתי אל תחרשׁ׃ ² כי פי רשׁע ופי מרמה עלי פתחו דברו אתי לשׁון שׁקר׃ ³ ודברי שׂנאה סבבוני וילחמוני חנם׃ ⁴ תחת אהבתי ישׂטנוני ואני תפלה׃ ⁵ וישׂימו עלי רעה תחת טובה ושׂנאה תחת אהבתי׃ ⁶ הפקד עליו רשׁע ושׂטן יעמד על ימינו׃ ⁷ בהשׁפטו יצא רשׁע ותפלתו תהיה לחטאה׃ ⁸ יהיו ימיו מעטים פקדתו יקח אחר׃ ⁹ יהיו בניו יתומים ואשׁתו אלמנה׃ ¹⁰ ונוע ינועו בניו ושׁאלו ודרשׁו מחרבותיהם׃ ¹¹ ינקשׁ נושׁה לכל אשׁר לו ויבזו זרים יגיעו׃ ¹² אל יהי לו משׁך חסד ואל יהי חונן ליתומיו׃ ¹³ יהי אחריתו להכרית בדור אחר ימח שׁמם׃ ¹⁴ יזכר עון אבתיו אל יהוה וחטאת אמו אל תמח׃ ¹⁵ יהיו נגד יהוה תמיד ויכרת מארץ זכרם׃ ¹⁶ יען אשׁר לא זכר עשׂות חסד וירדף אישׁ עני ואביון ונכאה לבב למותת׃ ¹⁷ ויאהב קללה ותבואהו ולא חפץ בברכה ותרחק ממנו׃ ¹⁸ וילבשׁ קללה כמדו ותבא כמים בקרבו וכשׁמן בעצמותיו׃ ¹⁹ תהי לו כבגד יעטה ולמזח תמיד יחגרה׃ ²⁰ זאת פעלת שׂטני מאת יהוה והדברים רע על נפשׁי׃ ²¹ ואתה יהוה אדני עשׂה אתי למען שׁמך כי טוב חסדך הצילני׃ ²² כי עני ואביון אנכי ולבי חלל בקרבי׃ ²³ כצל כנטותו נהלכתי ננערתי כארבה׃ ²⁴ ברכי כשׁלו מצום ובשׂרי כחשׁ משׁמן׃ ²⁵ ואני הייתי חרפה להם יראוני יניעון ראשׁם׃ ²⁶ עזרני יהוה אלהי הושׁיעני כחסדך׃ ²⁷ וידעו כי ידך זאת אתה יהוה עשׂיתה׃ ²⁸ יקללו המה ואתה תברך קמו ויבשׁו ועבדך ישׂמח׃ ²⁹ ילבשׁו שׂוטני כלמה ויעטו כמעיל בשׁתם׃ ³⁰ אודה יהוה מאד בפי ובתוך רבים אהללנו׃ ³¹ כי יעמד לימין אביון להושׁיע משׁפטי נפשׁו׃¹¹⁰ ¹ לדוד מזמור נאם יהוה לאדני שׁב לימיני עד אשׁית איביך הדם לרגליך׃ ² מטה עזך ישׁלח יהוה מציון רדה בקרב איביך׃ ³ עמך נדבת ביום חילך בהדרי קדשׁ מרחם משׁחר לך טל ילדתיך׃ ⁴ נשׁבע יהוה ולא ינחם אתה כהן לעולם על דברתי מלכי צדק׃ ⁵ אדני על ימינך מחץ ביום אפו מלכים׃ ⁶ ידין בגוים מלא גויות מחץ ראשׁ על ארץ רבה׃ ⁷ מנחל בדרך ישׁתה על כן ירים ראשׁ׃¹¹¹ ¹ הללו יה אודה יהוה בכל לבב בסוד ישׁרים ועדה׃ ² גדלים מעשׂי יהוה דרושׁים לכל חפציהם׃ ³ הוד והדר פעלו וצדקתו עמדת לעד׃ ⁴ זכר עשׂה לנפלאתיו חנון ורחום יהוה׃ ⁵ טרף נתן ליראיו יזכר לעולם בריתו׃ ⁶ כח מעשׂיו הגיד לעמו לתת להם נחלת גוים׃ ⁷ מעשׂי ידיו אמת ומשׁפט נאמנים כל פקודיו׃ ⁸ סמוכים לעד לעולם עשׂוים באמת וישׁר׃ ⁹ פדות שׁלח לעמו צוה לעולם בריתו קדושׁ ונורא שׁמו׃ ¹⁰ ראשׁית חכמה יראת יהוה שׂכל טוב לכל עשׂיהם תהלתו עמדת לעד׃¹¹² ¹ הללו יה אשׁרי אישׁ ירא את יהוה במצותיו חפץ מאד׃ ² גבור בארץ יהיה זרעו דור ישׁרים יברך׃ ³ הון ועשׁר בביתו וצדקתו עמדת לעד׃ ⁴ זרח בחשׁך אור לישׁרים חנון ורחום וצדיק׃ ⁵ טוב אישׁ חונן ומלוה יכלכל דבריו במשׁפט׃ ⁶ כי לעולם לא ימוט לזכר עולם יהיה צדיק׃ ⁷ משׁמועה רעה לא יירא נכון לבו בטח ביהוה׃ ⁸ סמוך לבו לא יירא עד אשׁר יראה בצריו׃ ⁹ פזר נתן לאביונים צדקתו עמדת לעד קרנו תרום בכבוד׃ ¹⁰ רשׁע יראה וכעס שׁניו יחרק ונמס תאות רשׁעים תאבד׃¹¹³ ¹ הללו יה הללו עבדי יהוה הללו את שׁם יהוה׃ ² יהי שׁם יהוה מברך מעתה ועד עולם׃ ³ ממזרח שׁמשׁ עד מבואו מהלל שׁם יהוה׃ ⁴ רם על כל גוים יהוה על השׁמים כבודו׃ ⁵ מי כיהוה אלהינו המגביהי לשׁבת׃ ⁶ המשׁפילי לראות בשׁמים ובארץ׃ ⁷ מקימי מעפר דל מאשׁפת ירים אביון׃ ⁸ להושׁיבי עם נדיבים עם נדיבי עמו׃ ⁹ מושׁיבי עקרת הבית אם הבנים שׂמחה הללו יה׃¹¹⁴ ¹ בצאת ישׂראל ממצרים בית יעקב מעם לעז׃ ² היתה יהודה לקדשׁו ישׂראל ממשׁלותיו׃ ³ הים ראה וינס הירדן יסב לאחור׃ ⁴ ההרים רקדו כאילים גבעות כבני צאן׃ ⁵ מה לך הים כי תנוס הירדן תסב לאחור׃ ⁶ ההרים תרקדו כאילים גבעות כבני צאן׃ ⁷ מלפני אדון חולי ארץ מלפני אלוה יעקב׃ ⁸ ההפכי הצור אגם מים חלמישׁ למעינו מים׃¹¹⁵ ¹ לא לנו יהוה לא לנו כי לשׁמך תן כבוד על חסדך על אמתך׃ ² למה יאמרו הגוים איה נא אלהיהם׃ ³ ואלהינו בשׁמים כל אשׁר חפץ עשׂה׃ ⁴ עצביהם כסף וזהב מעשׂה ידי אדם׃ ⁵ פה להם ולא ידברו עינים להם ולא יראו׃ ⁶ אזנים להם ולא ישׁמעו אף להם ולא יריחון׃ ⁷ ידיהם ולא ימישׁון רגליהם ולא יהלכו לא יהגו בגרונם׃ ⁸ כמוהם יהיו עשׂיהם כל אשׁר בטח׃ ⁹ ישׂראל בטח ביהוה עזרם ומגנם הוא׃ ¹⁰ בית אהרן בטחו ביהוה עזרם ומגנם הוא׃ ¹¹ יראי יהוה בטחו ביהוה עזרם ומגנם הוא׃ ¹² יהוה זכרנו יברך יברך את בית ישׂראל יברך את בית אהרן׃ ¹³ יברך יראי יהוה הקטנים עם הגדלים׃ ¹⁴ יסף יהוה עליכם עליכם ועל בניכם׃ ¹⁵ ברוכים אתם ליהוה עשׂה שׁמים וארץ׃ ¹⁶ השׁמים שׁמים ליהוה והארץ נתן לבני אדם׃ ¹⁷ לא המתים יהללו יה ולא כל ירדי דומה׃ ¹⁸ ואנחנו נברך יה מעתה ועד עולם הללו יה׃¹¹⁶ ¹ אהבתי כי ישׁמע יהוה את קולי תחנוני׃ ² כי הטה אזנו לי ובימי אקרא׃ ³ אפפוני חבלי מות ומצרי שׁאול מצאוני צרה ויגון אמצא׃ ⁴ ובשׁם יהוה אקרא אנה יהוה מלטה נפשׁי׃ ⁵ חנון יהוה וצדיק ואלהינו מרחם׃ ⁶ שׁמר פתאים יהוה דלותי ולי יהושׁיע׃ ⁷ שׁובי נפשׁי למנוחיכי כי יהוה גמל עליכי׃ ⁸ כי חלצת נפשׁי ממות את עיני מן דמעה את רגלי מדחי׃ ⁹ אתהלך לפני יהוה בארצות החיים׃ ¹⁰ האמנתי כי אדבר אני עניתי מאד׃ ¹¹ אני אמרתי בחפזי כל האדם כזב׃ ¹² מה אשׁיב ליהוה כל תגמולוהי עלי׃ ¹³ כוס ישׁועות אשׂא ובשׁם יהוה אקרא׃ ¹⁴ נדרי ליהוה אשׁלם נגדה נא לכל עמו׃ ¹⁵ יקר בעיני יהוה המותה לחסידיו׃ ¹⁶ אנה יהוה כי אני עבדך אני עבדך בן אמתך פתחת למוסרי׃ ¹⁷ לך אזבח זבח תודה ובשׁם יהוה אקרא׃ ¹⁸ נדרי ליהוה אשׁלם נגדה נא לכל עמו׃ ¹⁹ בחצרות בית יהוה בתוככי ירושׁלם הללו יה׃¹¹⁷ ¹ הללו את יהוה כל גוים שׁבחוהו כל האמים׃ ² כי גבר עלינו חסדו ואמת יהוה לעולם הללו יה׃¹¹⁸ ¹ הודו ליהוה כי טוב כי לעולם חסדו׃ ² יאמר נא ישׂראל כי לעולם חסדו׃ ³ יאמרו נא בית אהרן כי לעולם חסדו׃ ⁴ יאמרו נא יראי יהוה כי לעולם חסדו׃ ⁵ מן המצר קראתי יה ענני במרחב יה׃ ⁶ יהוה לי לא אירא מה יעשׂה לי אדם׃ ⁷ יהוה לי בעזרי ואני אראה בשׂנאי׃ ⁸ טוב לחסות ביהוה מבטח באדם׃ ⁹ טוב לחסות ביהוה מבטח בנדיבים׃ ¹⁰ כל גוים סבבוני בשׁם יהוה כי אמילם׃ ¹¹ סבוני גם סבבוני בשׁם יהוה כי אמילם׃ ¹² סבוני כדבורים דעכו כאשׁ קוצים בשׁם יהוה כי אמילם׃ ¹³ דחה דחיתני לנפל ויהוה עזרני׃ ¹⁴ עזי וזמרת יה ויהי לי לישׁועה׃ ¹⁵ קול רנה וישׁועה באהלי צדיקים ימין יהוה עשׂה חיל׃ ¹⁶ ימין יהוה רוממה ימין יהוה עשׂה חיל׃ ¹⁷ לא אמות כי אחיה ואספר מעשׂי יה׃ ¹⁸ יסר יסרני יה ולמות לא נתנני׃ ¹⁹ פתחו לי שׁערי צדק אבא בם אודה יה׃ ²⁰ זה השׁער ליהוה צדיקים יבאו׃ ²¹ אודך כי עניתני ותהי לי לישׁועה׃ ²² אבן מאסו הבונים היתה לראשׁ פנה׃ ²³ מאת יהוה היתה זאת היא נפלאת בעינינו׃ ²⁴ זה היום עשׂה יהוה נגילה ונשׂמחה׃ ²⁵ אנא יהוה הושׁיעה נא אנא יהוה הצליחה נא׃ ²⁶ ברוך הבא בשׁם יהוה ברכנוכם מבית יהוה׃ ²⁷ אל יהוה ויאר לנו אסרו חג בעבתים עד קרנות המזבח׃ ²⁸ אלי אתה ואודך אלהי ארוממך׃ ²⁹ הודו ליהוה כי טוב כי לעולם חסדו׃¹¹⁹ ¹ אשׁרי תמימי דרך ההלכים בתורת יהוה׃ ² אשׁרי נצרי עדתיו בכל לב ידרשׁוהו׃ ³ אף לא פעלו עולה בדרכיו הלכו׃ ⁴ אתה צויתה פקדיך לשׁמר מאד׃ ⁵ אחלי יכנו דרכי לשׁמר חקיך׃ ⁶ אז לא אבושׁ בהביטי אל כל מצותיך׃ ⁷ אודך בישׁר לבב בלמדי משׁפטי צדקך׃ ⁸ את חקיך אשׁמר אל תעזבני עד מאד׃ ⁹ במה יזכה נער את ארחו לשׁמר כדברך׃ ¹⁰ בכל לבי דרשׁתיך אל תשׁגני ממצותיך׃ ¹¹ בלבי צפנתי אמרתך למען לא אחטא׃ ¹² ברוך אתה יהוה למדני חקיך׃ ¹³ בשׂפתי ספרתי כל משׁפטי פיך׃ ¹⁴ בדרך עדותיך שׂשׂתי כעל כל הון׃ ¹⁵ בפקדיך אשׂיחה ואביטה ארחתיך׃ ¹⁶ בחקתיך אשׁתעשׁע לא אשׁכח דברך׃ ¹⁷ גמל על עבדך אחיה ואשׁמרה דברך׃ ¹⁸ גל עיני ואביטה נפלאות מתורתך׃ ¹⁹ גר אנכי בארץ אל תסתר ממני מצותיך׃ ²⁰ גרסה נפשׁי לתאבה אל משׁפטיך בכל עת׃ ²¹ גערת זדים ארורים השׁגים ממצותיך׃ ²² גל מעלי חרפה ובוז כי עדתיך נצרתי׃ ²³ גם ישׁבו שׂרים בי נדברו עבדך ישׂיח בחקיך׃ ²⁴ גם עדתיך שׁעשׁעי אנשׁי עצתי׃ ²⁵ דבקה לעפר נפשׁי חיני כדברך׃ ²⁶ דרכי ספרתי ותענני למדני חקיך׃ ²⁷ דרך פקודיך הבינני ואשׂיחה בנפלאותיך׃ ²⁸ דלפה נפשׁי מתוגה קימני כדברך׃ ²⁹ דרך שׁקר הסר ממני ותורתך חנני׃ ³⁰ דרך אמונה בחרתי משׁפטיך שׁויתי׃ ³¹ דבקתי בעדותיך יהוה אל תבישׁני׃ ³² דרך מצותיך ארוץ כי תרחיב לבי׃ ³³ הורני יהוה דרך חקיך ואצרנה עקב׃ ³⁴ הבינני ואצרה תורתך ואשׁמרנה בכל לב׃ ³⁵ הדריכני בנתיב מצותיך כי בו חפצתי׃ ³⁶ הט לבי אל עדותיך ואל אל בצע׃ ³⁷ העבר עיני מראות שׁוא בדרכך חיני׃ ³⁸ הקם לעבדך אמרתך אשׁר ליראתך׃ ³⁹ העבר חרפתי אשׁר יגרתי כי משׁפטיך טובים׃ ⁴⁰ הנה תאבתי לפקדיך בצדקתך חיני׃ ⁴¹ ויבאני חסדך יהוה תשׁועתך כאמרתך׃ ⁴² ואענה חרפי דבר כי בטחתי בדברך׃ ⁴³ ואל תצל מפי דבר אמת עד מאד כי למשׁפטך יחלתי׃ ⁴⁴ ואשׁמרה תורתך תמיד לעולם ועד׃ ⁴⁵ ואתהלכה ברחבה כי פקדיך דרשׁתי׃ ⁴⁶ ואדברה בעדתיך נגד מלכים ולא אבושׁ׃ ⁴⁷ ואשׁתעשׁע במצותיך אשׁר אהבתי׃ ⁴⁸ ואשׂא כפי אל מצותיך אשׁר אהבתי ואשׂיחה בחקיך׃ ⁴⁹ זכר דבר לעבדך על אשׁר יחלתני׃ ⁵⁰ זאת נחמתי בעניי כי אמרתך חיתני׃ ⁵¹ זדים הליצני עד מאד מתורתך לא נטיתי׃ ⁵² זכרתי משׁפטיך מעולם יהוה ואתנחם׃ ⁵³ זלעפה אחזתני מרשׁעים עזבי תורתך׃ ⁵⁴ זמרות היו לי חקיך בבית מגורי׃ ⁵⁵ זכרתי בלילה שׁמך יהוה ואשׁמרה תורתך׃ ⁵⁶ זאת היתה לי כי פקדיך נצרתי׃ ⁵⁷ חלקי יהוה אמרתי לשׁמר דבריך׃ ⁵⁸ חליתי פניך בכל לב חנני כאמרתך׃ ⁵⁹ חשׁבתי דרכי ואשׁיבה רגלי אל עדתיך׃ ⁶⁰ חשׁתי ולא התמהמהתי לשׁמר מצותיך׃ ⁶¹ חבלי רשׁעים עודני תורתך לא שׁכחתי׃ ⁶² חצות לילה אקום להודות לך על משׁפטי צדקך׃ ⁶³ חבר אני לכל אשׁר יראוך ולשׁמרי פקודיך׃ ⁶⁴ חסדך יהוה מלאה הארץ חקיך למדני׃ ⁶⁵ טוב עשׂית עם עבדך יהוה כדברך׃ ⁶⁶ טוב טעם ודעת למדני כי במצותיך האמנתי׃ ⁶⁷ טרם אענה אני שׁגג ועתה אמרתך שׁמרתי׃ ⁶⁸ טוב אתה ומטיב למדני חקיך׃ ⁶⁹ טפלו עלי שׁקר זדים אני בכל לב אצר פקודיך׃ ⁷⁰ טפשׁ כחלב לבם אני תורתך שׁעשׁעתי׃ ⁷¹ טוב לי כי עניתי למען אלמד חקיך׃ ⁷² טוב לי תורת פיך מאלפי זהב וכסף׃ ⁷³ ידיך עשׂוני ויכוננוני הבינני ואלמדה מצותיך׃ ⁷⁴ יראיך יראוני וישׂמחו כי לדברך יחלתי׃ ⁷⁵ ידעתי יהוה כי צדק משׁפטיך ואמונה עניתני׃ ⁷⁶ יהי נא חסדך לנחמני כאמרתך לעבדך׃ ⁷⁷ יבאוני רחמיך ואחיה כי תורתך שׁעשׁעי׃ ⁷⁸ יבשׁו זדים כי שׁקר עותוני אני אשׂיח בפקודיך׃ ⁷⁹ ישׁובו לי יראיך וידעו עדתיך׃ ⁸⁰ יהי לבי תמים בחקיך למען לא אבושׁ׃ ⁸¹ כלתה לתשׁועתך נפשׁי לדברך יחלתי׃ ⁸² כלו עיני לאמרתך לאמר מתי תנחמני׃ ⁸³ כי הייתי כנאד בקיטור חקיך לא שׁכחתי׃ ⁸⁴ כמה ימי עבדך מתי תעשׂה ברדפי משׁפט׃ ⁸⁵ כרו לי זדים שׁיחות אשׁר לא כתורתך׃ ⁸⁶ כל מצותיך אמונה שׁקר רדפוני עזרני׃ ⁸⁷ כמעט כלוני בארץ ואני לא עזבתי פקודיך׃ ⁸⁸ כחסדך חיני ואשׁמרה עדות פיך׃ ⁸⁹ לעולם יהוה דברך נצב בשׁמים׃ ⁹⁰ לדר ודר אמונתך כוננת ארץ ותעמד׃ ⁹¹ למשׁפטיך עמדו היום כי הכל עבדיך׃ ⁹² לולי תורתך שׁעשׁעי אז אבדתי בעניי׃ ⁹³ לעולם לא אשׁכח פקודיך כי בם חייתני׃ ⁹⁴ לך אני הושׁיעני כי פקודיך דרשׁתי׃ ⁹⁵ לי קוו רשׁעים לאבדני עדתיך אתבונן׃ ⁹⁶ לכל תכלה ראיתי קץ רחבה מצותך מאד׃ ⁹⁷ מה אהבתי תורתך כל היום היא שׂיחתי׃ ⁹⁸ מאיבי תחכמני מצותך כי לעולם היא׃ ⁹⁹ מכל מלמדי השׂכלתי כי עדותיך שׂיחה׃ ¹⁰⁰ מזקנים אתבונן כי פקודיך נצרתי׃ ¹⁰¹ מכל ארח רע כלאתי רגלי למען אשׁמר דברך׃ ¹⁰² ממשׁפטיך לא סרתי כי אתה הורתני׃ ¹⁰³ מה נמלצו לחכי אמרתך מדבשׁ לפי׃ ¹⁰⁴ מפקודיך אתבונן על כן שׂנאתי כל ארח שׁקר׃ ¹⁰⁵ נר לרגלי דברך ואור לנתיבתי׃ ¹⁰⁶ נשׁבעתי ואקימה לשׁמר משׁפטי צדקך׃ ¹⁰⁷ נעניתי עד מאד יהוה חיני כדברך׃ ¹⁰⁸ נדבות פי רצה נא יהוה ומשׁפטיך למדני׃ ¹⁰⁹ נפשׁי בכפי תמיד ותורתך לא שׁכחתי׃ ¹¹⁰ נתנו רשׁעים פח לי ומפקודיך לא תעיתי׃ ¹¹¹ נחלתי עדותיך לעולם כי שׂשׂון לבי המה׃ ¹¹² נטיתי לבי לעשׂות חקיך לעולם עקב׃ ¹¹³ סעפים שׂנאתי ותורתך אהבתי׃ ¹¹⁴ סתרי ומגני אתה לדברך יחלתי׃ ¹¹⁵ סורו ממני מרעים ואצרה מצות אלהי׃ ¹¹⁶ סמכני כאמרתך ואחיה ואל תבישׁני משׂברי׃ ¹¹⁷ סעדני ואושׁעה ואשׁעה בחקיך תמיד׃ ¹¹⁸ סלית כל שׁוגים מחקיך כי שׁקר תרמיתם׃ ¹¹⁹ סגים השׁבת כל רשׁעי ארץ לכן אהבתי עדתיך׃ ¹²⁰ סמר מפחדך בשׂרי וממשׁפטיך יראתי׃ ¹²¹ עשׂיתי משׁפט וצדק בל תניחני לעשׁקי׃ ¹²² ערב עבדך לטוב אל יעשׁקני זדים׃ ¹²³ עיני כלו לישׁועתך ולאמרת צדקך׃ ¹²⁴ עשׂה עם עבדך כחסדך וחקיך למדני׃ ¹²⁵ עבדך אני הבינני ואדעה עדתיך׃ ¹²⁶ עת לעשׂות ליהוה הפרו תורתך׃ ¹²⁷ על כן אהבתי מצותיך מזהב ומפז׃ ¹²⁸ על כן כל פקודי כל ישׁרתי כל ארח שׁקר שׂנאתי׃ ¹²⁹ פלאות עדותיך על כן נצרתם נפשׁי׃ ¹³⁰ פתח דבריך יאיר מבין פתיים׃ ¹³¹ פי פערתי ואשׁאפה כי למצותיך יאבתי׃ ¹³² פנה אלי וחנני כמשׁפט לאהבי שׁמך׃ ¹³³ פעמי הכן באמרתך ואל תשׁלט בי כל און׃ ¹³⁴ פדני מעשׁק אדם ואשׁמרה פקודיך׃ ¹³⁵ פניך האר בעבדך ולמדני את חקיך׃ ¹³⁶ פלגי מים ירדו עיני על לא שׁמרו תורתך׃ ¹³⁷ צדיק אתה יהוה וישׁר משׁפטיך׃ ¹³⁸ צוית צדק עדתיך ואמונה מאד׃ ¹³⁹ צמתתני קנאתי כי שׁכחו דבריך צרי׃ ¹⁴⁰ צרופה אמרתך מאד ועבדך אהבה׃ ¹⁴¹ צעיר אנכי ונבזה פקדיך לא שׁכחתי׃ ¹⁴² צדקתך צדק לעולם ותורתך אמת׃ ¹⁴³ צר ומצוק מצאוני מצותיך שׁעשׁעי׃ ¹⁴⁴ צדק עדותיך לעולם הבינני ואחיה׃ ¹⁴⁵ קראתי בכל לב ענני יהוה חקיך אצרה׃ ¹⁴⁶ קראתיך הושׁיעני ואשׁמרה עדתיך׃ ¹⁴⁷ קדמתי בנשׁף ואשׁועה לדבריך יחלתי׃ ¹⁴⁸ קדמו עיני אשׁמרות לשׂיח באמרתך׃ ¹⁴⁹ קולי שׁמעה כחסדך יהוה כמשׁפטך חיני׃ ¹⁵⁰ קרבו רדפי זמה מתורתך רחקו׃ ¹⁵¹ קרוב אתה יהוה וכל מצותיך אמת׃ ¹⁵² קדם ידעתי מעדתיך כי לעולם יסדתם׃ ¹⁵³ ראה עניי וחלצני כי תורתך לא שׁכחתי׃ ¹⁵⁴ ריבה ריבי וגאלני לאמרתך חיני׃ ¹⁵⁵ רחוק מרשׁעים ישׁועה כי חקיך לא דרשׁו׃ ¹⁵⁶ רחמיך רבים יהוה כמשׁפטיך חיני׃ ¹⁵⁷ רבים רדפי וצרי מעדותיך לא נטיתי׃ ¹⁵⁸ ראיתי בגדים ואתקוטטה אשׁר אמרתך לא שׁמרו׃ ¹⁵⁹ ראה כי פקודיך אהבתי יהוה כחסדך חיני׃ ¹⁶⁰ ראשׁ דברך אמת ולעולם כל משׁפט צדקך׃ ¹⁶¹ שׂרים רדפוני חנם ומדבריך פחד לבי׃ ¹⁶² שׂשׂ אנכי על אמרתך כמוצא שׁלל רב׃ ¹⁶³ שׁקר שׂנאתי ואתעבה תורתך אהבתי׃ ¹⁶⁴ שׁבע ביום הללתיך על משׁפטי צדקך׃ ¹⁶⁵ שׁלום רב לאהבי תורתך ואין למו מכשׁול׃ ¹⁶⁶ שׂברתי לישׁועתך יהוה ומצותיך עשׂיתי׃ ¹⁶⁷ שׁמרה נפשׁי עדתיך ואהבם מאד׃ ¹⁶⁸ שׁמרתי פקודיך ועדתיך כי כל דרכי נגדך׃ ¹⁶⁹ תקרב רנתי לפניך יהוה כדברך הבינני׃ ¹⁷⁰ תבוא תחנתי לפניך כאמרתך הצילני׃ ¹⁷¹ תבענה שׂפתי תהלה כי תלמדני חקיך׃ ¹⁷² תען לשׁוני אמרתך כי כל מצותיך צדק׃ ¹⁷³ תהי ידך לעזרני כי פקודיך בחרתי׃ ¹⁷⁴ תאבתי לישׁועתך יהוה ותורתך שׁעשׁעי׃ ¹⁷⁵ תחי נפשׁי ותהללך ומשׁפטך יעזרני׃ ¹⁷⁶ תעיתי כשׂה אבד בקשׁ עבדך כי מצותיך לא שׁכחתי׃¹²⁰ ¹ שׁיר המעלות אל יהוה בצרתה לי קראתי ויענני׃ ² יהוה הצילה נפשׁי משׂפת שׁקר מלשׁון רמיה׃ ³ מה יתן לך ומה יסיף לך לשׁון רמיה׃ ⁴ חצי גבור שׁנונים עם גחלי רתמים׃ ⁵ אויה לי כי גרתי משׁך שׁכנתי עם אהלי קדר׃ ⁶ רבת שׁכנה לה נפשׁי עם שׂונא שׁלום׃ ⁷ אני שׁלום וכי אדבר המה למלחמה׃¹²¹ ¹ שׁיר למעלות אשׂא עיני אל ההרים מאין יבא עזרי׃ ² עזרי מעם יהוה עשׂה שׁמים וארץ׃ ³ אל יתן למוט רגלך אל ינום שׁמרך׃ ⁴ הנה לא ינום ולא יישׁן שׁומר ישׂראל׃ ⁵ יהוה שׁמרך יהוה צלך על יד ימינך׃ ⁶ יומם השׁמשׁ לא יככה וירח בלילה׃ ⁷ יהוה ישׁמרך מכל רע ישׁמר את נפשׁך׃ ⁸ יהוה ישׁמר צאתך ובואך מעתה ועד עולם׃¹²² ¹ שׁיר המעלות לדוד שׂמחתי באמרים לי בית יהוה נלך׃ ² עמדות היו רגלינו בשׁעריך ירושׁלם׃ ³ ירושׁלם הבנויה כעיר שׁחברה לה יחדו׃ ⁴ שׁשׁם עלו שׁבטים שׁבטי יה עדות לישׂראל להדות לשׁם יהוה׃ ⁵ כי שׁמה ישׁבו כסאות למשׁפט כסאות לבית דויד׃ ⁶ שׁאלו שׁלום ירושׁלם ישׁליו אהביך׃ ⁷ יהי שׁלום בחילך שׁלוה בארמנותיך׃ ⁸ למען אחי ורעי אדברה נא שׁלום׃ ⁹ למען בית יהוה אלהינו אבקשׁה טוב׃¹²³ ¹ שׁיר המעלות אליך נשׂאתי את עיני הישׁבי בשׁמים׃ ² הנה כעיני עבדים אל יד אדוניהם כעיני שׁפחה אל יד גברתה כן עינינו אל יהוה אלהינו עד שׁיחננו׃ ³ חננו יהוה חננו כי רב שׂבענו בוז׃ ⁴ רבת שׂבעה לה נפשׁנו הלעג השׁאננים הבוז לגאיונים׃¹²⁴ ¹ שׁיר המעלות לדוד לולי יהוה שׁהיה לנו יאמר נא ישׂראל׃ ² לולי יהוה שׁהיה לנו בקום עלינו אדם׃ ³ אזי חיים בלעונו בחרות אפם׃ ⁴ אזי המים שׁטפונו נחלה עבר על נפשׁנו׃ ⁵ אזי עבר על נפשׁנו המים הזידונים׃ ⁶ ברוך יהוה שׁלא נתננו טרף לשׁניהם׃ ⁷ נפשׁנו כצפור נמלטה מפח יוקשׁים הפח נשׁבר ואנחנו נמלטנו׃ ⁸ עזרנו בשׁם יהוה עשׂה שׁמים וארץ׃¹²⁵ ¹ שׁיר המעלות הבטחים ביהוה כהר ציון לא ימוט לעולם ישׁב׃ ² ירושׁלם הרים סביב לה ויהוה סביב לעמו מעתה ועד עולם׃ ³ כי לא ינוח שׁבט הרשׁע על גורל הצדיקים למען לא ישׁלחו הצדיקים בעולתה ידיהם׃ ⁴ היטיבה יהוה לטובים ולישׁרים בלבותם׃ ⁵ והמטים עקלקלותם יוליכם יהוה את פעלי האון שׁלום על ישׂראל׃¹²⁶ ¹ שׁיר המעלות בשׁוב יהוה את שׁיבת ציון היינו כחלמים׃ ² אז ימלא שׂחוק פינו ולשׁוננו רנה אז יאמרו בגוים הגדיל יהוה לעשׂות עם אלה׃ ³ הגדיל יהוה לעשׂות עמנו היינו שׂמחים׃ ⁴ שׁובה יהוה את שׁבותנו כאפיקים בנגב׃ ⁵ הזרעים בדמעה ברנה יקצרו׃ ⁶ הלוך ילך ובכה נשׂא משׁך הזרע בא יבוא ברנה נשׂא אלמתיו׃¹²⁷ ¹ שׁיר המעלות לשׁלמה אם יהוה לא יבנה בית שׁוא עמלו בוניו בו אם יהוה לא ישׁמר עיר שׁוא שׁקד שׁומר׃ ² שׁוא לכם משׁכימי קום מאחרי שׁבת אכלי לחם העצבים כן יתן לידידו שׁנא׃ ³ הנה נחלת יהוה בנים שׂכר פרי הבטן׃ ⁴ כחצים ביד גבור כן בני הנעורים׃ ⁵ אשׁרי הגבר אשׁר מלא את אשׁפתו מהם לא יבשׁו כי ידברו את אויבים בשׁער׃¹²⁸ ¹ שׁיר המעלות אשׁרי כל ירא יהוה ההלך בדרכיו׃ ² יגיע כפיך כי תאכל אשׁריך וטוב׃ ³ אשׁתך כגפן פריה בירכתי ביתך בניך כשׁתלי זיתים סביב לשׁלחנך׃ ⁴ הנה כי כן יברך גבר ירא יהוה׃ ⁵ יברכך יהוה מציון וראה בטוב ירושׁלם כל ימי חייך׃ ⁶ וראה בנים לבניך שׁלום על ישׂראל׃¹²⁹ ¹ שׁיר המעלות רבת צררוני מנעורי יאמר נא ישׂראל׃ ² רבת צררוני מנעורי גם לא יכלו׃ ³ על גבי חרשׁו חרשׁים האריכו למענותם׃ ⁴ יהוה צדיק קצץ עבות רשׁעים׃ ⁵ יבשׁו ויסגו אחור כל שׂנאי ציון׃ ⁶ יהיו כחציר גגות שׁקדמת שׁלף יבשׁ׃ ⁷ שׁלא מלא כפו קוצר וחצנו מעמר׃ ⁸ ולא אמרו העברים ברכת יהוה אליכם ברכנו אתכם בשׁם יהוה׃¹³⁰ ¹ שׁיר המעלות ממעמקים קראתיך יהוה׃ ² אדני שׁמעה בקולי תהיינה אזניך קשׁבות לקול תחנוני׃ ³ אם עונות תשׁמר יה אדני מי יעמד׃ ⁴ כי עמך הסליחה למען תורא׃ ⁵ קויתי יהוה קותה נפשׁי ולדברו הוחלתי׃ ⁶ נפשׁי לאדני משׁמרים לבקר שׁמרים לבקר׃ ⁷ יחל ישׂראל אל יהוה כי עם יהוה החסד והרבה עמו פדות׃ ⁸ והוא יפדה את ישׂראל מכל עונתיו׃¹³¹ ¹ שׁיר המעלות לדוד יהוה לא גבה לבי ולא רמו עיני ולא הלכתי בגדלות ובנפלאות ממני׃ ² אם לא שׁויתי ודוממתי נפשׁי כגמל עלי אמו כגמל עלי נפשׁי׃ ³ יחל ישׂראל אל יהוה מעתה ועד עולם׃¹³² ¹ שׁיר המעלות זכור יהוה לדוד את כל ענותו׃ ² אשׁר נשׁבע ליהוה נדר לאביר יעקב׃ ³ אם אבא באהל ביתי אם אעלה על ערשׂ יצועי׃ ⁴ אם אתן שׁנת לעיני לעפעפי תנומה׃ ⁵ עד אמצא מקום ליהוה משׁכנות לאביר יעקב׃ ⁶ הנה שׁמענוה באפרתה מצאנוה בשׂדי יער׃ ⁷ נבואה למשׁכנותיו נשׁתחוה להדם רגליו׃ ⁸ קומה יהוה למנוחתך אתה וארון עזך׃ ⁹ כהניך ילבשׁו צדק וחסידיך ירננו׃ ¹⁰ בעבור דוד עבדך אל תשׁב פני משׁיחך׃ ¹¹ נשׁבע יהוה לדוד אמת לא ישׁוב ממנה מפרי בטנך אשׁית לכסא׃ ¹² אם ישׁמרו בניך בריתי ועדתי זו אלמדם גם בניהם עדי עד ישׁבו לכסא׃ ¹³ כי בחר יהוה בציון אוה למושׁב׃ ¹⁴ זאת מנוחתי עדי עד פה אשׁב כי אותיה׃ ¹⁵ צידה ברך אברך אביוניה אשׂביע לחם׃ ¹⁶ וכהניה אלבישׁ ישׁע וחסידיה רנן ירננו׃ ¹⁷ שׁם אצמיח קרן לדוד ערכתי נר למשׁיחי׃ ¹⁸ אויביו אלבישׁ בשׁת ועליו יציץ נזרו׃¹³³ ¹ שׁיר המעלות לדוד הנה מה טוב ומה נעים שׁבת אחים גם יחד׃ ² כשׁמן הטוב על הראשׁ ירד על הזקן זקן אהרן שׁירד על פי מדותיו׃ ³ כטל חרמון שׁירד על הררי ציון כי שׁם צוה יהוה את הברכה חיים עד העולם׃¹³⁴ ¹ שׁיר המעלות הנה ברכו את יהוה כל עבדי יהוה העמדים בבית יהוה בלילות׃ ² שׂאו ידכם קדשׁ וברכו את יהוה׃ ³ יברכך יהוה מציון עשׂה שׁמים וארץ׃¹³⁵ ¹ הללו יה הללו את שׁם יהוה הללו עבדי יהוה׃ ² שׁעמדים בבית יהוה בחצרות בית אלהינו׃ ³ הללו יה כי טוב יהוה זמרו לשׁמו כי נעים׃ ⁴ כי יעקב בחר לו יה ישׂראל לסגלתו׃ ⁵ כי אני ידעתי כי גדול יהוה ואדנינו מכל אלהים׃ ⁶ כל אשׁר חפץ יהוה עשׂה בשׁמים ובארץ בימים וכל תהומות׃ ⁷ מעלה נשׂאים מקצה הארץ ברקים למטר עשׂה מוצא רוח מאוצרותיו׃ ⁸ שׁהכה בכורי מצרים מאדם עד בהמה׃ ⁹ שׁלח אתות ומפתים בתוככי מצרים בפרעה ובכל עבדיו׃ ¹⁰ שׁהכה גוים רבים והרג מלכים עצומים׃ ¹¹ לסיחון מלך האמרי ולעוג מלך הבשׁן ולכל ממלכות כנען׃ ¹² ונתן ארצם נחלה נחלה לישׂראל עמו׃ ¹³ יהוה שׁמך לעולם יהוה זכרך לדר ודר׃ ¹⁴ כי ידין יהוה עמו ועל עבדיו יתנחם׃ ¹⁵ עצבי הגוים כסף וזהב מעשׂה ידי אדם׃ ¹⁶ פה להם ולא ידברו עינים להם ולא יראו׃ ¹⁷ אזנים להם ולא יאזינו אף אין ישׁ רוח בפיהם׃ ¹⁸ כמוהם יהיו עשׂיהם כל אשׁר בטח׃ ¹⁹ בית ישׂראל ברכו את יהוה בית אהרן ברכו את יהוה׃ ²⁰ בית הלוי ברכו את יהוה יראי יהוה ברכו את יהוה׃ ²¹ ברוך יהוה מציון שׁכן ירושׁלם הללו יה׃¹³⁶ ¹ הודו ליהוה כי טוב כי לעולם חסדו׃ ² הודו לאלהי האלהים כי לעולם חסדו׃ ³ הודו לאדני האדנים כי לעולם חסדו׃ ⁴ לעשׂה נפלאות גדלות לבדו כי לעולם חסדו׃ ⁵ לעשׂה השׁמים בתבונה כי לעולם חסדו׃ ⁶ לרקע הארץ על המים כי לעולם חסדו׃ ⁷ לעשׂה אורים גדלים כי לעולם חסדו׃ ⁸ את השׁמשׁ לממשׁלת ביום כי לעולם חסדו׃ ⁹ את הירח וכוכבים לממשׁלות בלילה כי לעולם חסדו׃ ¹⁰ למכה מצרים בבכוריהם כי לעולם חסדו׃ ¹¹ ויוצא ישׂראל מתוכם כי לעולם חסדו׃ ¹² ביד חזקה ובזרוע נטויה כי לעולם חסדו׃ ¹³ לגזר ים סוף לגזרים כי לעולם חסדו׃ ¹⁴ והעביר ישׂראל בתוכו כי לעולם חסדו׃ ¹⁵ ונער פרעה וחילו בים סוף כי לעולם חסדו׃ ¹⁶ למוליך עמו במדבר כי לעולם חסדו׃ ¹⁷ למכה מלכים גדלים כי לעולם חסדו׃ ¹⁸ ויהרג מלכים אדירים כי לעולם חסדו׃ ¹⁹ לסיחון מלך האמרי כי לעולם חסדו׃ ²⁰ ולעוג מלך הבשׁן כי לעולם חסדו׃ ²¹ ונתן ארצם לנחלה כי לעולם חסדו׃ ²² נחלה לישׂראל עבדו כי לעולם חסדו׃ ²³ שׁבשׁפלנו זכר לנו כי לעולם חסדו׃ ²⁴ ויפרקנו מצרינו כי לעולם חסדו׃ ²⁵ נתן לחם לכל בשׂר כי לעולם חסדו׃ ²⁶ הודו לאל השׁמים כי לעולם חסדו׃¹³⁷ ¹ על נהרות בבל שׁם ישׁבנו גם בכינו בזכרנו את ציון׃ ² על ערבים בתוכה תלינו כנרותינו׃ ³ כי שׁם שׁאלונו שׁובינו דברי שׁיר ותוללינו שׂמחה שׁירו לנו משׁיר ציון׃ ⁴ איך נשׁיר את שׁיר יהוה על אדמת נכר׃ ⁵ אם אשׁכחך ירושׁלם תשׁכח ימיני׃ ⁶ תדבק לשׁוני לחכי אם לא אזכרכי אם לא אעלה את ירושׁלם על ראשׁ שׂמחתי׃ ⁷ זכר יהוה לבני אדום את יום ירושׁלם האמרים ערו ערו עד היסוד׃ ⁸ בת בבל השׁדודה אשׁרי שׁישׁלם לך את גמולך שׁגמלת׃ ⁹ אשׁרי שׁיאחז ונפץ את עלליך אל הסלע׃¹³⁸ ¹ לדוד אודך בכל לבי נגד אלהים אזמרך׃ ² אשׁתחוה אל היכל קדשׁך ואודה את שׁמך על חסדך ועל אמתך כי הגדלת על כל שׁמך אמרתך׃ ³ ביום קראתי ותענני תרהבני בנפשׁי עז׃ ⁴ יודוך יהוה כל מלכי ארץ כי שׁמעו אמרי פיך׃ ⁵ וישׁירו בדרכי יהוה כי גדול כבוד יהוה׃ ⁶ כי רם יהוה ושׁפל יראה וגבה ממרחק יידע׃ ⁷ אם אלך בקרב צרה תחיני על אף איבי תשׁלח ידך ותושׁיעני ימינך׃ ⁸ יהוה יגמר בעדי יהוה חסדך לעולם מעשׂי ידיך אל תרף׃¹³⁹ ¹ למנצח לדוד מזמור יהוה חקרתני ותדע׃ ² אתה ידעת שׁבתי וקומי בנתה לרעי מרחוק׃ ³ ארחי ורבעי זרית וכל דרכי הסכנתה׃ ⁴ כי אין מלה בלשׁוני הן יהוה ידעת כלה׃ ⁵ אחור וקדם צרתני ותשׁת עלי כפכה׃ ⁶ פלאיה דעת ממני נשׂגבה לא אוכל׃ ⁷ אנה אלך מרוחך ואנה מפניך אברח׃ ⁸ אם אסק שׁמים שׁם אתה ואציעה שׁאול הנך׃ ⁹ אשׂא כנפי שׁחר אשׁכנה באחרית ים׃ ¹⁰ גם שׁם ידך תנחני ותאחזני ימינך׃ ¹¹ ואמר אך חשׁך ישׁופני ולילה אור בעדני׃ ¹² גם חשׁך לא יחשׁיך ממך ולילה כיום יאיר כחשׁיכה כאורה׃ ¹³ כי אתה קנית כליתי תסכני בבטן אמי׃ ¹⁴ אודך על כי נוראות נפליתי נפלאים מעשׂיך ונפשׁי ידעת מאד׃ ¹⁵ לא נכחד עצמי ממך אשׁר עשׂיתי בסתר רקמתי בתחתיות ארץ׃ ¹⁶ גלמי ראו עיניך ועל ספרך כלם יכתבו ימים יצרו ולא אחד׃ ¹⁷ ולי מה יקרו רעיך אל מה עצמו ראשׁיהם׃ ¹⁸ אספרם מחול ירבון הקיצתי ועודי עמך׃ ¹⁹ אם תקטל אלוה רשׁע ואנשׁי דמים סורו מני׃ ²⁰ אשׁר יאמרך למזמה נשׂא לשׁוא עריך׃ ²¹ הלוא משׂנאיך יהוה אשׂנא ובתקוממיך אתקוטט׃ ²² תכלית שׂנאה שׂנאתים לאויבים היו׃ ²³ חקרני אל ודע לבבי בחנני ודע שׂרעפי׃ ²⁴ וראה אם דרך עצב בי ונחני בדרך עולם׃¹⁴⁰ ¹ למנצח מזמור לדוד׃ (140:2) חלצני יהוה מאדם רע מאישׁ חמסים תנצרני׃ ² (140:3) אשׁר חשׁבו רעות בלב כל יום יגורו מלחמות׃ ³ (140:4) שׁננו לשׁונם כמו נחשׁ חמת עכשׁוב תחת שׂפתימו סלה׃ ⁴ (140:5) שׁמרני יהוה מידי רשׁע מאישׁ חמסים תנצרני אשׁר חשׁבו לדחות פעמי׃ ⁵ (140:6) טמנו גאים פח לי וחבלים פרשׂו רשׁת ליד מעגל מקשׁים שׁתו לי סלה׃ ⁶ (140:7) אמרתי ליהוה אלי אתה האזינה יהוה קול תחנוני׃ ⁷ (140:8) יהוה אדני עז ישׁועתי סכתה לראשׁי ביום נשׁק׃ ⁸ (140:9) אל תתן יהוה מאויי רשׁע זממו אל תפק ירומו סלה׃ ⁹ (140:10) ראשׁ מסבי עמל שׂפתימו יכסומו׃ ¹⁰ (140:11) ימיטו עליהם גחלים באשׁ יפלם במהמרות בל יקומו׃ ¹¹ (140:12) אישׁ לשׁון בל יכון בארץ אישׁ חמס רע יצודנו למדחפת׃ ¹² (140:13) ידעת כי יעשׂה יהוה דין עני משׁפט אבינים׃ ¹³ (140:14) אך צדיקים יודו לשׁמך ישׁבו ישׁרים את פניך׃¹⁴¹ ¹ מזמור לדוד יהוה קראתיך חושׁה לי האזינה קולי בקראי׃ ² תכון תפלתי קטרת לפניך משׂאת כפי מנחת ערב׃ ³ שׁיתה יהוה שׁמרה לפי נצרה על דל שׂפתי׃ ⁴ אל תט לבי לדבר רע להתעולל עללות ברשׁע את אישׁים פעלי און ובל אלחם במנעמיהם׃ ⁵ יהלמני צדיק חסד ויוכיחני שׁמן ראשׁ אל יני ראשׁי כי עוד ותפלתי ברעותיהם׃ ⁶ נשׁמטו בידי סלע שׁפטיהם ושׁמעו אמרי כי נעמו׃ ⁷ כמו פלח ובקע בארץ נפזרו עצמינו לפי שׁאול׃ ⁸ כי אליך יהוה אדני עיני בכה חסיתי אל תער נפשׁי׃ ⁹ שׁמרני מידי פח יקשׁו לי ומקשׁות פעלי און׃ ¹⁰ יפלו במכמריו רשׁעים יחד אנכי עד אעבור׃¹⁴² ¹ משׂכיל לדוד בהיותו במערה תפלה׃ (142:2) קולי אל יהוה אזעק קולי אל יהוה אתחנן׃ ² (142:3) אשׁפך לפניו שׂיחי צרתי לפניו אגיד׃ ³ (142:4) בהתעטף עלי רוחי ואתה ידעת נתיבתי בארח זו אהלך טמנו פח׃ ⁴ (142:5) הביט ימין וראה ואין לי מכיר אבד מנוס ממני אין דורשׁ לנפשׁי׃ ⁵ (142:6) זעקתי אליך יהוה אמרתי אתה מחסי חלקי בארץ החיים׃ ⁶ (142:7) הקשׁיבה אל רנתי כי דלותי מאד הצילני מרדפי כי אמצו ממני׃ ⁷ (142:8) הוציאה ממסגר נפשׁי להודות את שׁמך בי יכתרו צדיקים כי תגמל עלי׃¹⁴³ ¹ מזמור לדוד יהוה שׁמע תפלתי האזינה אל תחנוני באמנתך ענני בצדקתך׃ ² ואל תבוא במשׁפט את עבדך כי לא יצדק לפניך כל חי׃ ³ כי רדף אויב נפשׁי דכא לארץ חיתי הושׁיבני במחשׁכים כמתי עולם׃ ⁴ ותתעטף עלי רוחי בתוכי ישׁתומם לבי׃ ⁵ זכרתי ימים מקדם הגיתי בכל פעלך במעשׂה ידיך אשׂוחח׃ ⁶ פרשׂתי ידי אליך נפשׁי כארץ עיפה לך סלה׃ ⁷ מהר ענני יהוה כלתה רוחי אל תסתר פניך ממני ונמשׁלתי עם ירדי בור׃ ⁸ השׁמיעני בבקר חסדך כי בך בטחתי הודיעני דרך זו אלך כי אליך נשׂאתי נפשׁי׃ ⁹ הצילני מאיבי יהוה אליך כסתי׃ ¹⁰ למדני לעשׂות רצונך כי אתה אלוהי רוחך טובה תנחני בארץ מישׁור׃ ¹¹ למען שׁמך יהוה תחיני בצדקתך תוציא מצרה נפשׁי׃ ¹² ובחסדך תצמית איבי והאבדת כל צררי נפשׁי כי אני עבדך׃¹⁴⁴ ¹ לדוד ברוך יהוה צורי המלמד ידי לקרב אצבעותי למלחמה׃ ² חסדי ומצודתי משׂגבי ומפלטי לי מגני ובו חסיתי הרודד עמי תחתי׃ ³ יהוה מה אדם ותדעהו בן אנושׁ ותחשׁבהו׃ ⁴ אדם להבל דמה ימיו כצל עובר׃ ⁵ יהוה הט שׁמיך ותרד גע בהרים ויעשׁנו׃ ⁶ ברוק ברק ותפיצם שׁלח חציך ותהמם׃ ⁷ שׁלח ידיך ממרום פצני והצילני ממים רבים מיד בני נכר׃ ⁸ אשׁר פיהם דבר שׁוא וימינם ימין שׁקר׃ ⁹ אלהים שׁיר חדשׁ אשׁירה לך בנבל עשׂור אזמרה׃ ¹⁰ הנותן תשׁועה למלכים הפוצה את דוד עבדו מחרב רעה׃ ¹¹ פצני והצילני מיד בני נכר אשׁר פיהם דבר שׁוא וימינם ימין שׁקר׃ ¹² אשׁר בנינו כנטעים מגדלים בנעוריהם בנותינו כזוית מחטבות תבנית היכל׃ ¹³ מזוינו מלאים מפיקים מזן אל זן צאוננו מאליפות מרבבות בחוצותינו׃ ¹⁴ אלופינו מסבלים אין פרץ ואין יוצאת ואין צוחה ברחבתינו׃ ¹⁵ אשׁרי העם שׁככה לו אשׁרי העם שׁיהוה אלהיו׃¹⁴⁵ ¹ תהלה לדוד ארוממך אלוהי המלך ואברכה שׁמך לעולם ועד׃ ² בכל יום אברכך ואהללה שׁמך לעולם ועד׃ ³ גדול יהוה ומהלל מאד ולגדלתו אין חקר׃ ⁴ דור לדור ישׁבח מעשׂיך וגבורתיך יגידו׃ ⁵ הדר כבוד הודך ודברי נפלאותיך אשׂיחה׃ ⁶ ועזוז נוראתיך יאמרו וגדולתיך אספרנה׃ ⁷ זכר רב טובך יביעו וצדקתך ירננו׃ ⁸ חנון ורחום יהוה ארך אפים וגדל חסד׃ ⁹ טוב יהוה לכל ורחמיו על כל מעשׂיו׃ ¹⁰ יודוך יהוה כל מעשׂיך וחסידיך יברכוכה׃ ¹¹ כבוד מלכותך יאמרו וגבורתך ידברו׃ ¹² להודיע לבני האדם גבורתיו וכבוד הדר מלכותו׃ ¹³ מלכותך מלכות כל עלמים וממשׁלתך בכל דור ודור׃ ¹⁴ סומך יהוה לכל הנפלים וזוקף לכל הכפופים׃ ¹⁵ עיני כל אליך ישׂברו ואתה נותן להם את אכלם בעתו׃ ¹⁶ פותח את ידך ומשׂביע לכל חי רצון׃ ¹⁷ צדיק יהוה בכל דרכיו וחסיד בכל מעשׂיו׃ ¹⁸ קרוב יהוה לכל קראיו לכל אשׁר יקראהו באמת׃ ¹⁹ רצון יראיו יעשׂה ואת שׁועתם ישׁמע ויושׁיעם׃ ²⁰ שׁומר יהוה את כל אהביו ואת כל הרשׁעים ישׁמיד׃ ²¹ תהלת יהוה ידבר פי ויברך כל בשׂר שׁם קדשׁו לעולם ועד׃¹⁴⁶ ¹ הללו יה הללי נפשׁי את יהוה׃ ² אהללה יהוה בחיי אזמרה לאלהי בעודי׃ ³ אל תבטחו בנדיבים בבן אדם שׁאין לו תשׁועה׃ ⁴ תצא רוחו ישׁב לאדמתו ביום ההוא אבדו עשׁתנתיו׃ ⁵ אשׁרי שׁאל יעקב בעזרו שׂברו על יהוה אלהיו׃ ⁶ עשׂה שׁמים וארץ את הים ואת כל אשׁר בם השׁמר אמת לעולם׃ ⁷ עשׂה משׁפט לעשׁוקים נתן לחם לרעבים יהוה מתיר אסורים׃ ⁸ יהוה פקח עורים יהוה זקף כפופים יהוה אהב צדיקים׃ ⁹ יהוה שׁמר את גרים יתום ואלמנה יעודד ודרך רשׁעים יעות׃ ¹⁰ ימלך יהוה לעולם אלהיך ציון לדר ודר הללו יה׃¹⁴⁷ ¹ הללו יה כי טוב זמרה אלהינו כי נעים נאוה תהלה׃ ² בונה ירושׁלם יהוה נדחי ישׂראל יכנס׃ ³ הרפא לשׁבורי לב ומחבשׁ לעצבותם׃ ⁴ מונה מספר לכוכבים לכלם שׁמות יקרא׃ ⁵ גדול אדונינו ורב כח לתבונתו אין מספר׃ ⁶ מעודד ענוים יהוה משׁפיל רשׁעים עדי ארץ׃ ⁷ ענו ליהוה בתודה זמרו לאלהינו בכנור׃ ⁸ המכסה שׁמים בעבים המכין לארץ מטר המצמיח הרים חציר׃ ⁹ נותן לבהמה לחמה לבני ערב אשׁר יקראו׃ ¹⁰ לא בגבורת הסוס יחפץ לא בשׁוקי האישׁ ירצה׃ ¹¹ רוצה יהוה את יראיו את המיחלים לחסדו׃ ¹² שׁבחי ירושׁלם את יהוה הללי אלהיך ציון׃ ¹³ כי חזק בריחי שׁעריך ברך בניך בקרבך׃ ¹⁴ השׂם גבולך שׁלום חלב חטים ישׂביעך׃ ¹⁵ השׁלח אמרתו ארץ עד מהרה ירוץ דברו׃ ¹⁶ הנתן שׁלג כצמר כפור כאפר יפזר׃ ¹⁷ משׁליך קרחו כפתים לפני קרתו מי יעמד׃ ¹⁸ ישׁלח דברו וימסם ישׁב רוחו יזלו מים׃ ¹⁹ מגיד דברו ליעקב חקיו ומשׁפטיו לישׂראל׃ ²⁰ לא עשׂה כן לכל גוי ומשׁפטים בל ידעום הללו יה׃¹⁴⁸ ¹ הללו יה הללו את יהוה מן השׁמים הללוהו במרומים׃ ² הללוהו כל מלאכיו הללוהו כל צבאו׃ ³ הללוהו שׁמשׁ וירח הללוהו כל כוכבי אור׃ ⁴ הללוהו שׁמי השׁמים והמים אשׁר מעל השׁמים׃ ⁵ יהללו את שׁם יהוה כי הוא צוה ונבראו׃ ⁶ ויעמידם לעד לעולם חק נתן ולא יעבור׃ ⁷ הללו את יהוה מן הארץ תנינים וכל תהמות׃ ⁸ אשׁ וברד שׁלג וקיטור רוח סערה עשׂה דברו׃ ⁹ ההרים וכל גבעות עץ פרי וכל ארזים׃ ¹⁰ החיה וכל בהמה רמשׂ וצפור כנף׃ ¹¹ מלכי ארץ וכל לאמים שׂרים וכל שׁפטי ארץ׃ ¹² בחורים וגם בתולות זקנים עם נערים׃ ¹³ יהללו את שׁם יהוה כי נשׂגב שׁמו לבדו הודו על ארץ ושׁמים׃ ¹⁴ וירם קרן לעמו תהלה לכל חסידיו לבני ישׂראל עם קרבו הללו יה׃¹⁴⁹ ¹ הללו יה שׁירו ליהוה שׁיר חדשׁ תהלתו בקהל חסידים׃ ² ישׂמח ישׂראל בעשׂיו בני ציון יגילו במלכם׃ ³ יהללו שׁמו במחול בתף וכנור יזמרו׃ ⁴ כי רוצה יהוה בעמו יפאר ענוים בישׁועה׃ ⁵ יעלזו חסידים בכבוד ירננו על משׁכבותם׃ ⁶ רוממות אל בגרונם וחרב פיפיות בידם׃ ⁷ לעשׂות נקמה בגוים תוכחת בל אמים׃ ⁸ לאסר מלכיהם בזקים ונכבדיהם בכבלי ברזל׃ ⁹ לעשׂות בהם משׁפט כתוב הדר הוא לכל חסידיו הללו יה׃¹⁵⁰ ¹ הללו יה הללו אל בקדשׁו הללוהו ברקיע עזו׃ ² הללוהו בגבורתיו הללוהו כרב גדלו׃ ³ הללוהו בתקע שׁופר הללוהו בנבל וכנור׃ ⁴ הללוהו בתף ומחול הללוהו במנים ועוגב׃ ⁵ הללוהו בצלצלי שׁמע הללוהו בצלצלי תרועה׃ ⁶ כל הנשׁמה תהלל יה הללו יה׃