Joshua 22 אז יקרא יהושׁע לראובני ולגדי ולחצי מטה מנשׁה׃

HOT⁽ⁱ⁾ ¹ אז יקרא יהושׁע לראובני ולגדי ולחצי מטה מנשׁה׃ ² ויאמר אליהם אתם שׁמרתם את כל אשׁר צוה אתכם משׁה עבד יהוה ותשׁמעו בקולי לכל אשׁר צויתי אתכם׃ ³ לא עזבתם את אחיכם זה ימים רבים עד היום הזה ושׁמרתם את משׁמרת מצות יהוה אלהיכם׃ ⁴ ועתה הניח יהוה אלהיכם לאחיכם כאשׁר דבר להם ועתה פנו ולכו לכם לאהליכם אל ארץ אחזתכם אשׁר נתן לכם משׁה עבד יהוה בעבר הירדן׃ ⁵ רק שׁמרו מאד לעשׂות את המצוה ואת התורה אשׁר צוה אתכם משׁה עבד יהוה לאהבה את יהוה אלהיכם וללכת בכל דרכיו ולשׁמר מצותיו ולדבקה בו ולעבדו בכל לבבכם ובכל נפשׁכם׃ ⁶ ויברכם יהושׁע וישׁלחם וילכו אל אהליהם׃ ⁷ ולחצי שׁבט המנשׁה נתן משׁה בבשׁן ולחציו נתן יהושׁע עם אחיהם מעבר הירדן ימה וגם כי שׁלחם יהושׁע אל אהליהם ויברכם׃ ⁸ ויאמר אליהם לאמר בנכסים רבים שׁובו אל אהליכם ובמקנה רב מאד בכסף ובזהב ובנחשׁת ובברזל ובשׂלמות הרבה מאד חלקו שׁלל איביכם עם אחיכם׃ ⁹ וישׁבו וילכו בני ראובן ובני גד וחצי שׁבט המנשׁה מאת בני ישׂראל משׁלה אשׁר בארץ כנען ללכת אל ארץ הגלעד אל ארץ אחזתם אשׁר נאחזו בה על פי יהוה ביד משׁה׃ ¹⁰ ויבאו אל גלילות הירדן אשׁר בארץ כנען ויבנו בני ראובן ובני גד וחצי שׁבט המנשׁה שׁם מזבח על הירדן מזבח גדול למראה׃ ¹¹ וישׁמעו בני ישׂראל לאמר הנה בנו בני ראובן ובני גד וחצי שׁבט המנשׁה את המזבח אל מול ארץ כנען אל גלילות הירדן אל עבר בני ישׂראל׃ ¹² וישׁמעו בני ישׂראל ויקהלו כל עדת בני ישׂראל שׁלה לעלות עליהם לצבא׃ ¹³ וישׁלחו בני ישׂראל אל בני ראובן ואל בני גד ואל חצי שׁבט מנשׁה אל ארץ הגלעד את פינחס בן אלעזר הכהן׃ ¹⁴ ועשׂרה נשׂאים עמו נשׂיא אחד נשׂיא אחד לבית אב לכל מטות ישׂראל ואישׁ ראשׁ בית אבותם המה לאלפי ישׂראל׃ ¹⁵ ויבאו אל בני ראובן ואל בני גד ואל חצי שׁבט מנשׁה אל ארץ הגלעד וידברו אתם לאמר׃ ¹⁶ כה אמרו כל עדת יהוה מה המעל הזה אשׁר מעלתם באלהי ישׂראל לשׁוב היום מאחרי יהוה בבנותכם לכם מזבח למרדכם היום ביהוה׃ ¹⁷ המעט לנו את עון פעור אשׁר לא הטהרנו ממנו עד היום הזה ויהי הנגף בעדת יהוה׃ ¹⁸ ואתם תשׁבו היום מאחרי יהוה והיה אתם תמרדו היום ביהוה ומחר אל כל עדת ישׂראל יקצף׃ ¹⁹ ואך אם טמאה ארץ אחזתכם עברו לכם אל ארץ אחזת יהוה אשׁר שׁכן שׁם משׁכן יהוה והאחזו בתוכנו וביהוה אל תמרדו ואתנו אל תמרדו בבנתכם לכם מזבח מבלעדי מזבח יהוה אלהינו׃ ²⁰ הלוא עכן בן זרח מעל מעל בחרם ועל כל עדת ישׂראל היה קצף והוא אישׁ אחד לא גוע בעונו׃ ²¹ ויענו בני ראובן ובני גד וחצי שׁבט המנשׁה וידברו את ראשׁי אלפי ישׂראל׃ ²² אל אלהים יהוה אל אלהים יהוה הוא ידע וישׂראל הוא ידע אם במרד ואם במעל ביהוה אל תושׁיענו היום הזה׃ ²³ לבנות לנו מזבח לשׁוב מאחרי יהוה ואם להעלות עליו עולה ומנחה ואם לעשׂות עליו זבחי שׁלמים יהוה הוא יבקשׁ׃ ²⁴ ואם לא מדאגה מדבר עשׂינו את זאת לאמר מחר יאמרו בניכם לבנינו לאמר מה לכם וליהוה אלהי ישׂראל׃ ²⁵ וגבול נתן יהוה ביננו וביניכם בני ראובן ובני גד את הירדן אין לכם חלק ביהוה והשׁביתו בניכם את בנינו לבלתי ירא את יהוה׃ ²⁶ ונאמר נעשׂה נא לנו לבנות את המזבח לא לעולה ולא לזבח׃ ²⁷ כי עד הוא בינינו וביניכם ובין דרותינו אחרינו לעבד את עבדת יהוה לפניו בעלותינו ובזבחינו ובשׁלמינו ולא יאמרו בניכם מחר לבנינו אין לכם חלק ביהוה׃ ²⁸ ונאמר והיה כי יאמרו אלינו ואל דרתינו מחר ואמרנו ראו את תבנית מזבח יהוה אשׁר עשׂו אבותינו לא לעולה ולא לזבח כי עד הוא בינינו וביניכם׃ ²⁹ חלילה לנו ממנו למרד ביהוה ולשׁוב היום מאחרי יהוה לבנות מזבח לעלה למנחה ולזבח מלבד מזבח יהוה אלהינו אשׁר לפני משׁכנו׃ ³⁰ וישׁמע פינחס הכהן ונשׂיאי העדה וראשׁי אלפי ישׂראל אשׁר אתו את הדברים אשׁר דברו בני ראובן ובני גד ובני מנשׁה וייטב בעיניהם׃ ³¹ ויאמר פינחס בן אלעזר הכהן אל בני ראובן ואל בני גד ואל בני מנשׁה היום ידענו כי בתוכנו יהוה אשׁר לא מעלתם ביהוה המעל הזה אז הצלתם את בני ישׂראל מיד יהוה׃ ³² וישׁב פינחס בן אלעזר הכהן והנשׂיאים מאת בני ראובן ומאת בני גד מארץ הגלעד אל ארץ כנען אל בני ישׂראל וישׁבו אותם דבר׃ ³³ וייטב הדבר בעיני בני ישׂראל ויברכו אלהים בני ישׂראל ולא אמרו לעלות עליהם לצבא לשׁחת את הארץ אשׁר בני ראובן ובני גד ישׁבים׃ ³⁴ ויקראו בני ראובן ובני גד למזבח כי עד הוא בינתינו כי יהוה האלהים׃