HOT(i)
12 ואלי דבר יגנב ותקח אזני שׁמץ מנהו׃ 13 בשׂעפים מחזינות לילה בנפל תרדמה על אנשׁים׃ 14 פחד קראני ורעדה ורב עצמותי הפחיד׃ 15 ורוח על פני יחלף תסמר שׂערת בשׂרי׃ 16 יעמד ולא אכיר מראהו תמונה לנגד עיני דממה וקול אשׁמע׃ 17 האנושׁ מאלוה יצדק אם מעשׂהו יטהר גבר׃ 18 הן בעבדיו לא יאמין ובמלאכיו ישׂים תהלה׃ 19 אף שׁכני בתי חמר אשׁר בעפר יסודם ידכאום לפני עשׁ׃ 20 מבקר לערב יכתו מבלי משׂים לנצח יאבדו׃ 21 הלא נסע יתרם בם ימותו ולא בחכמה׃