HOT(i)
19 מעי מעי אחולה קירות לבי המה לי לבי לא אחרישׁ כי קול שׁופר שׁמעתי נפשׁי תרועת מלחמה׃ 20 שׁבר על שׁבר נקרא כי שׁדדה כל הארץ פתאם שׁדדו אהלי רגע יריעתי׃ 21 עד מתי אראה נס אשׁמעה קול שׁופר׃ 22 כי אויל עמי אותי לא ידעו בנים סכלים המה ולא נבונים המה חכמים המה להרע ולהיטיב לא ידעו׃ 23 ראיתי את הארץ והנה תהו ובהו ואל השׁמים ואין אורם׃ 24 ראיתי ההרים והנה רעשׁים וכל הגבעות התקלקלו׃ 25 ראיתי והנה אין האדם וכל עוף השׁמים נדדו׃ 26 ראיתי והנה הכרמל המדבר וכל עריו נתצו מפני יהוה מפני חרון אפו׃