HOT(i)
16 ויאמר יהוה יען כי גבהו בנות ציון ותלכנה נטוות גרון ומשׂקרות עינים הלוך וטפף תלכנה וברגליהם תעכסנה׃ 17 ושׂפח אדני קדקד בנות ציון ויהוה פתהן יערה׃ 18 ביום ההוא יסיר אדני את תפארת העכסים והשׁביסים והשׂהרנים׃ 19 הנטיפות והשׁירות והרעלות׃ 20 הפארים והצעדות והקשׁרים ובתי הנפשׁ והלחשׁים׃ 21 הטבעות ונזמי האף׃ 22 המחלצות והמעטפות והמטפחות והחריטים׃ 23 והגלינים והסדינים והצניפות והרדידים׃ 24 והיה תחת בשׂם מק יהיה ותחת חגורה נקפה ותחת מעשׂה מקשׁה קרחה ותחת פתיגיל מחגרת שׂק כי תחת יפי׃ 25 מתיך בחרב יפלו וגבורתך במלחמה׃ 26 ואנו ואבלו פתחיה ונקתה לארץ תשׁב׃