Isaiah 34:1-17 קרבו גוים לשׁמע ולאמים הקשׁיבו תשׁמע הארץ ומלאה תבל וכל צאצאיה׃

HOT⁽ⁱ⁾ ¹ קרבו גוים לשׁמע ולאמים הקשׁיבו תשׁמע הארץ ומלאה תבל וכל צאצאיה׃ ² כי קצף ליהוה על כל הגוים וחמה על כל צבאם החרימם נתנם לטבח׃ ³ וחלליהם ישׁלכו ופגריהם יעלה באשׁם ונמסו הרים מדמם׃ ⁴ ונמקו כל צבא השׁמים ונגלו כספר השׁמים וכל צבאם יבול כנבל עלה מגפן וכנבלת מתאנה׃ ⁵ כי רותה בשׁמים חרבי הנה על אדום תרד ועל עם חרמי למשׁפט׃ ⁶ חרב ליהוה מלאה דם הדשׁנה מחלב מדם כרים ועתודים מחלב כליות אילים כי זבח ליהוה בבצרה וטבח גדול בארץ אדום׃ ⁷ וירדו ראמים עמם ופרים עם אבירים ורותה ארצם מדם ועפרם מחלב ידשׁן׃ ⁸ כי יום נקם ליהוה שׁנת שׁלומים לריב ציון׃ ⁹ ונהפכו נחליה לזפת ועפרה לגפרית והיתה ארצה לזפת בערה׃ ¹⁰ לילה ויומם לא תכבה לעולם יעלה עשׁנה מדור לדור תחרב לנצח נצחים אין עבר׃ ¹¹ וירשׁוה קאת וקפוד וינשׁוף וערב ישׁכנו בה ונטה עליה קו תהו ואבני בהו׃ ¹² חריה ואין שׁם מלוכה יקראו וכל שׂריה יהיו אפס׃ ¹³ ועלתה ארמנתיה סירים קמושׂ וחוח במבצריה והיתה נוה תנים חציר לבנות יענה׃ ¹⁴ ופגשׁו ציים את איים ושׂעיר על רעהו יקרא אך שׁם הרגיעה לילית ומצאה לה מנוח׃ ¹⁵ שׁמה קננה קפוז ותמלט ובקעה ודגרה בצלה אך שׁם נקבצו דיות אשׁה רעותה׃ ¹⁶ דרשׁו מעל ספר יהוה וקראו אחת מהנה לא נעדרה אשׁה רעותה לא פקדו כי פי הוא צוה ורוחו הוא קבצן׃ ¹⁷ והוא הפיל להן גורל וידו חלקתה להם בקו עד עולם יירשׁוה לדור ודור ישׁכנו׃