Exodus 40 וידבר יהוה אל משׁה לאמר׃

HOT⁽ⁱ⁾ ¹ וידבר יהוה אל משׁה לאמר׃ ² ביום החדשׁ הראשׁון באחד לחדשׁ תקים את משׁכן אהל מועד׃ ³ ושׂמת שׁם את ארון העדות וסכת על הארן את הפרכת׃ ⁴ והבאת את השׁלחן וערכת את ערכו והבאת את המנרה והעלית את נרתיה׃ ⁵ ונתתה את מזבח הזהב לקטרת לפני ארון העדת ושׂמת את מסך הפתח למשׁכן׃ ⁶ ונתתה את מזבח העלה לפני פתח משׁכן אהל מועד׃ ⁷ ונתת את הכיר בין אהל מועד ובין המזבח ונתת שׁם מים׃ ⁸ ושׂמת את החצר סביב ונתת את מסך שׁער החצר׃ ⁹ ולקחת את שׁמן המשׁחה ומשׁחת את המשׁכן ואת כל אשׁר בו וקדשׁת אתו ואת כל כליו והיה קדשׁ׃ ¹⁰ ומשׁחת את מזבח העלה ואת כל כליו וקדשׁת את המזבח והיה המזבח קדשׁ קדשׁים׃ ¹¹ ומשׁחת את הכיר ואת כנו וקדשׁת אתו׃ ¹² והקרבת את אהרן ואת בניו אל פתח אהל מועד ורחצת אתם במים׃ ¹³ והלבשׁת את אהרן את בגדי הקדשׁ ומשׁחת אתו וקדשׁת אתו וכהן׃ ¹⁴ ואת בניו תקריב והלבשׁת אתם כתנת׃ ¹⁵ ומשׁחת אתם כאשׁר משׁחת את אביהם וכהנו לי והיתה להית להם משׁחתם לכהנת עולם לדרתם׃ ¹⁶ ויעשׂ משׁה ככל אשׁר צוה יהוה אתו כן עשׂה׃ ¹⁷ ויהי בחדשׁ הראשׁון בשׁנה השׁנית באחד לחדשׁ הוקם המשׁכן׃ ¹⁸ ויקם משׁה את המשׁכן ויתן את אדניו וישׂם את קרשׁיו ויתן את בריחיו ויקם את עמודיו׃ ¹⁹ ויפרשׂ את האהל על המשׁכן וישׂם את מכסה האהל עליו מלמעלה כאשׁר צוה יהוה את משׁה׃ ²⁰ ויקח ויתן את העדת אל הארן וישׂם את הבדים על הארן ויתן את הכפרת על הארן מלמעלה׃ ²¹ ויבא את הארן אל המשׁכן וישׂם את פרכת המסך ויסך על ארון העדות כאשׁר צוה יהוה את משׁה׃ ²² ויתן את השׁלחן באהל מועד על ירך המשׁכן צפנה מחוץ לפרכת׃ ²³ ויערך עליו ערך לחם לפני יהוה כאשׁר צוה יהוה את משׁה׃ ²⁴ וישׂם את המנרה באהל מועד נכח השׁלחן על ירך המשׁכן נגבה׃ ²⁵ ויעל הנרת לפני יהוה כאשׁר צוה יהוה את משׁה׃ ²⁶ וישׂם את מזבח הזהב באהל מועד לפני הפרכת׃ ²⁷ ויקטר עליו קטרת סמים כאשׁר צוה יהוה את משׁה׃ ²⁸ וישׂם את מסך הפתח למשׁכן׃ ²⁹ ואת מזבח העלה שׂם פתח משׁכן אהל מועד ויעל עליו את העלה ואת המנחה כאשׁר צוה יהוה את משׁה׃ ³⁰ וישׂם את הכיר בין אהל מועד ובין המזבח ויתן שׁמה מים לרחצה׃ ³¹ ורחצו ממנו משׁה ואהרן ובניו את ידיהם ואת רגליהם׃ ³² בבאם אל אהל מועד ובקרבתם אל המזבח ירחצו כאשׁר צוה יהוה את משׁה׃ ³³ ויקם את החצר סביב למשׁכן ולמזבח ויתן את מסך שׁער החצר ויכל משׁה את המלאכה׃ ³⁴ ויכס הענן את אהל מועד וכבוד יהוה מלא את המשׁכן׃ ³⁵ ולא יכל משׁה לבוא אל אהל מועד כי שׁכן עליו הענן וכבוד יהוה מלא את המשׁכן׃ ³⁶ ובהעלות הענן מעל המשׁכן יסעו בני ישׂראל בכל מסעיהם׃ ³⁷ ואם לא יעלה הענן ולא יסעו עד יום העלתו׃ ³⁸ כי ענן יהוה על המשׁכן יומם ואשׁ תהיה לילה בו לעיני כל בית ישׂראל בכל מסעיהם׃