HOT(i)
23 ואתה קח לך בשׂמים ראשׁ מר דרור חמשׁ מאות וקנמן בשׂם מחציתו חמשׁים ומאתים וקנה בשׂם חמשׁים ומאתים׃ 24 וקדה חמשׁ מאות בשׁקל הקדשׁ ושׁמן זית הין׃ 25 ועשׂית אתו שׁמן משׁחת קדשׁ רקח מרקחת מעשׂה רקח שׁמן משׁחת קדשׁ יהיה׃ 26 ומשׁחת בו את אהל מועד ואת ארון העדת׃ 27 ואת השׁלחן ואת כל כליו ואת המנרה ואת כליה ואת מזבח הקטרת׃ 28 ואת מזבח העלה ואת כל כליו ואת הכיר ואת כנו׃ 29 וקדשׁת אתם והיו קדשׁ קדשׁים כל הנגע בהם יקדשׁ׃ 30 ואת אהרן ואת בניו תמשׁח וקדשׁת אתם לכהן׃ 31 ואל בני ישׂראל תדבר לאמר שׁמן משׁחת קדשׁ יהיה זה לי לדרתיכם׃ 32 על בשׂר אדם לא ייסך ובמתכנתו לא תעשׂו כמהו קדשׁ הוא קדשׁ יהיה׃ 33 אישׁ אשׁר ירקח כמהו ואשׁר יתן ממנו על זר ונכרת מעמיו׃ 34 ויאמר יהוה אל משׁה קח לך סמים נטף ושׁחלת וחלבנה סמים ולבנה זכה בד בבד יהיה׃ 35 ועשׂית אתה קטרת רקח מעשׂה רוקח ממלח טהור קדשׁ׃ 36 ושׁחקת ממנה הדק ונתתה ממנה לפני העדת באהל מועד אשׁר אועד לך שׁמה קדשׁ קדשׁים תהיה׃ 37 והקטרת אשׁר תעשׂה במתכנתה לא תעשׂו לכם קדשׁ תהיה לך ליהוה׃ 38 אישׁ אשׁר יעשׂה כמוה להריח בה ונכרת מעמיו׃