HOT(i)
1 לכל זמן ועת לכל חפץ תחת השׁמים׃ 2 עת ללדת ועת למות עת לטעת ועת לעקור נטוע׃ 3 עת להרוג ועת לרפוא עת לפרוץ ועת לבנות׃ 4 עת לבכות ועת לשׂחוק עת ספוד ועת רקוד׃ 5 עת להשׁליך אבנים ועת כנוס אבנים עת לחבוק ועת לרחק מחבק׃ 6 עת לבקשׁ ועת לאבד עת לשׁמור ועת להשׁליך׃ 7 עת לקרוע ועת לתפור עת לחשׁות ועת לדבר׃ 8 עת לאהב ועת לשׂנא עת מלחמה ועת שׁלום׃ 9 מה יתרון העושׂה באשׁר הוא עמל׃ 10 ראיתי את הענין אשׁר נתן אלהים לבני האדם לענות׃ 11 את הכל עשׂה יפה בעתו גם את העלם נתן בלבם מבלי אשׁר לא ימצא האדם את המעשׂה אשׁר עשׂה האלהים מראשׁ ועד סוף׃