2 Kings 18:1-37 ויהי בשׁנת שׁלשׁ להושׁע בן אלה מלך ישׂראל מלך חזקיה בן אחז מלך יהודה׃

HOT⁽ⁱ⁾ ¹ ויהי בשׁנת שׁלשׁ להושׁע בן אלה מלך ישׂראל מלך חזקיה בן אחז מלך יהודה׃ ² בן עשׂרים וחמשׁ שׁנה היה במלכו ועשׂרים ותשׁע שׁנה מלך בירושׁלם ושׁם אמו אבי בת זכריה׃ ³ ויעשׂ הישׁר בעיני יהוה ככל אשׁר עשׂה דוד אביו׃ ⁴ הוא הסיר את הבמות ושׁבר את המצבת וכרת את האשׁרה וכתת נחשׁ הנחשׁת אשׁר עשׂה משׁה כי עד הימים ההמה היו בני ישׂראל מקטרים לו ויקרא לו נחשׁתן׃ ⁵ ביהוה אלהי ישׂראל בטח ואחריו לא היה כמהו בכל מלכי יהודה ואשׁר היו לפניו׃ ⁶ וידבק ביהוה לא סר מאחריו וישׁמר מצותיו אשׁר צוה יהוה את משׁה׃ ⁷ והיה יהוה עמו בכל אשׁר יצא ישׂכיל וימרד במלך אשׁור ולא עבדו׃ ⁸ הוא הכה את פלשׁתים עד עזה ואת גבוליה ממגדל נוצרים עד עיר מבצר׃ ⁹ ויהי בשׁנה הרביעית למלך חזקיהו היא השׁנה השׁביעית להושׁע בן אלה מלך ישׂראל עלה שׁלמנאסר מלך אשׁור על שׁמרון ויצר עליה׃ ¹⁰ וילכדה מקצה שׁלשׁ שׁנים בשׁנת שׁשׁ לחזקיה היא שׁנת תשׁע להושׁע מלך ישׂראל נלכדה שׁמרון׃ ¹¹ ויגל מלך אשׁור את ישׂראל אשׁורה וינחם בחלח ובחבור נהר גוזן וערי מדי׃ ¹² על אשׁר לא שׁמעו בקול יהוה אלהיהם ויעברו את בריתו את כל אשׁר צוה משׁה עבד יהוה ולא שׁמעו ולא עשׂו׃ ¹³ ובארבע עשׂרה שׁנה למלך חזקיה עלה סנחריב מלך אשׁור על כל ערי יהודה הבצרות ויתפשׂם׃ ¹⁴ וישׁלח חזקיה מלך יהודה אל מלך אשׁור לכישׁה לאמר חטאתי שׁוב מעלי את אשׁר תתן עלי אשׂא וישׂם מלך אשׁור על חזקיה מלך יהודה שׁלשׁ מאות ככר כסף ושׁלשׁים ככר זהב׃ ¹⁵ ויתן חזקיה את כל הכסף הנמצא בית יהוה ובאצרות בית המלך׃ ¹⁶ בעת ההיא קצץ חזקיה את דלתות היכל יהוה ואת האמנות אשׁר צפה חזקיה מלך יהודה ויתנם למלך אשׁור׃ ¹⁷ וישׁלח מלך אשׁור את תרתן ואת רב סריס ואת רב שׁקה מן לכישׁ אל המלך חזקיהו בחיל כבד ירושׁלם ויעלו ויבאו ירושׁלם ויעלו ויבאו ויעמדו בתעלת הברכה העליונה אשׁר במסלת שׂדה כובס׃ ¹⁸ ויקראו אל המלך ויצא אלהם אליקים בן חלקיהו אשׁר על הבית ושׁבנה הספר ויואח בן אסף המזכיר׃ ¹⁹ ויאמר אלהם רב שׁקה אמרו נא אל חזקיהו כה אמר המלך הגדול מלך אשׁור מה הבטחון הזה אשׁר בטחת׃ ²⁰ אמרת אך דבר שׂפתים עצה וגבורה למלחמה עתה על מי בטחת כי מרדת׃ ²¹ עתה הנה בטחת לך על משׁענת הקנה הרצוץ הזה על מצרים אשׁר יסמך אישׁ עליו ובא בכפו ונקבה כן פרעה מלך מצרים לכל הבטחים עליו׃ ²² וכי תאמרון אלי אל יהוה אלהינו בטחנו הלוא הוא אשׁר הסיר חזקיהו את במתיו ואת מזבחתיו ויאמר ליהודה ולירושׁלם לפני המזבח הזה תשׁתחוו בירושׁלם׃ ²³ ועתה התערב נא את אדני את מלך אשׁור ואתנה לך אלפים סוסים אם תוכל לתת לך רכבים עליהם׃ ²⁴ ואיך תשׁיב את פני פחת אחד עבדי אדני הקטנים ותבטח לך על מצרים לרכב ולפרשׁים׃ ²⁵ עתה המבלעדי יהוה עליתי על המקום הזה להשׁחתו יהוה אמר אלי עלה על הארץ הזאת והשׁחיתה׃ ²⁶ ויאמר אליקים בן חלקיהו ושׁבנה ויואח אל רב שׁקה דבר נא אל עבדיך ארמית כי שׁמעים אנחנו ואל תדבר עמנו יהודית באזני העם אשׁר על החמה׃ ²⁷ ויאמר אליהם רב שׁקה העל אדניך ואליך שׁלחני אדני לדבר את הדברים האלה הלא על האנשׁים הישׁבים על החמה לאכל את חריהם ולשׁתות את שׁיניהם עמכם׃ ²⁸ ויעמד רב שׁקה ויקרא בקול גדול יהודית וידבר ויאמר שׁמעו דבר המלך הגדול מלך אשׁור׃ ²⁹ כה אמר המלך אל ישׁיא לכם חזקיהו כי לא יוכל להציל אתכם מידו׃ ³⁰ ואל יבטח אתכם חזקיהו אל יהוה לאמר הצל יצילנו יהוה ולא תנתן את העיר הזאת ביד מלך אשׁור׃ ³¹ אל תשׁמעו אל חזקיהו כי כה אמר מלך אשׁור עשׂו אתי ברכה וצאו אלי ואכלו אישׁ גפנו ואישׁ תאנתו ושׁתו אישׁ מי בורו׃ ³² עד באי ולקחתי אתכם אל ארץ כארצכם ארץ דגן ותירושׁ ארץ לחם וכרמים ארץ זית יצהר ודבשׁ וחיו ולא תמתו ואל תשׁמעו אל חזקיהו כי יסית אתכם לאמר יהוה יצילנו׃ ³³ ההצל הצילו אלהי הגוים אישׁ את ארצו מיד מלך אשׁור׃ ³⁴ איה אלהי חמת וארפד איה אלהי ספרוים הנע ועוה כי הצילו את שׁמרון מידי׃ ³⁵ מי בכל אלהי הארצות אשׁר הצילו את ארצם מידי כי יציל יהוה את ירושׁלם מידי׃ ³⁶ והחרישׁו העם ולא ענו אתו דבר כי מצות המלך היא לאמר לא תענהו׃ ³⁷ ויבא אליקים בן חלקיה אשׁר על הבית ושׁבנא הספר ויואח בן אסף המזכיר אל חזקיהו קרועי בגדים ויגדו לו דברי רב שׁקה׃