HOT(i)
16 בעת ההיא שׁלח המלך אחז על מלכי אשׁור לעזר׃ 17 ועוד אדומים באו ויכו ביהודה וישׁבו שׁבי׃ 18 ופלשׁתים פשׁטו בערי השׁפלה והנגב ליהודה וילכדו את בית שׁמשׁ ואת אילון ואת הגדרות ואת שׂוכו ובנותיה ואת תמנה ובנותיה ואת גמזו ואת בנתיה וישׁבו שׁם׃ 19 כי הכניע יהוה את יהודה בעבור אחז מלך ישׂראל כי הפריע ביהודה ומעול מעל ביהוה׃ 20 ויבא עליו תלגת פלנאסר מלך אשׁור ויצר לו ולא חזקו׃ 21 כי חלק אחז את בית יהוה ואת בית המלך והשׂרים ויתן למלך אשׁור ולא לעזרה׃ 22 ובעת הצר לו ויוסף למעול ביהוה הוא המלך אחז׃