HOT(i)
23 ויעשׂ בדביר שׁני כרובים עצי שׁמן עשׂר אמות קומתו׃ 24 וחמשׁ אמות כנף הכרוב האחת וחמשׁ אמות כנף הכרוב השׁנית עשׂר אמות מקצות כנפיו ועד קצות כנפיו׃ 25 ועשׂר באמה הכרוב השׁני מדה אחת וקצב אחד לשׁני הכרבים׃ 26 קומת הכרוב האחד עשׂר באמה וכן הכרוב השׁני׃ 27 ויתן את הכרובים בתוך הבית הפנימי ויפרשׂו את כנפי הכרבים ותגע כנף האחד בקיר וכנף הכרוב השׁני נגעת בקיר השׁני וכנפיהם אל תוך הבית נגעת כנף אל כנף׃ 28 ויצף את הכרובים זהב׃