Psalms 126:1-150:6 Kanto de suprenirado. Kiam la Eternulo revenigis la forkaptitojn al Cion, Tiam ni estis kiel songxantoj.

Esperanto⁽ⁱ⁾ ¹ Kanto de suprenirado. Kiam la Eternulo revenigis la forkaptitojn al Cion, Tiam ni estis kiel songxantoj. ² Tiam nia busxo estis plena de gajeco, Kaj nia lango plena de kantado; Tiam oni diris inter la popoloj: Ion grandan la Eternulo faris por cxi tiuj. ³ Ion grandan la Eternulo faris por ni: Ni gxojas. ⁴ Revenigu, ho Eternulo, niajn forkaptitojn, Kiel riveretojn en sudan landon. ⁵ Kiuj semas kun larmoj, Tiuj rikoltos kun kanto. ⁶ Iras kaj ploras la portanto de semotajxo; Venos kun kanto la portanto de siaj garboj. ¹²⁷ ¹ Kanto de suprenirado. De Salomono. Se la Eternulo ne konstruas la domon, Tiam vane laboras super gxi gxiaj konstruantoj; Se la Eternulo ne gardas urbon, Tiam vane maldormas la gardanto. ² Vane vi frue levigxas, malfrue sidas, Mangxas panon kun klopodoj: Al Sia amato Li donas en dormo. ³ Jen, heredo de la Eternulo estas infanoj; Rekompenco estas la frukto de ventro. ⁴ Kiel sagoj en la mano de fortulo, Tiel estas junaj filoj. ⁵ Bone estas al la homo, kiu plenigis per ili sian sagujon; Ili ne estos hontigitaj, Kiam ili parolos kun la malamikoj cxe la pordego. ¹²⁸ ¹ Kanto de suprenirado. Felicxa estas tiu, kiu timas la Eternulon Kaj iras laux Liaj vojoj. ² Kiam vi mangxas la laborakiron de viaj manoj, Felicxe kaj bone estas al vi. ³ Via edzino estas kiel fruktoporta vinberbrancxo interne en via domo; Viaj filoj estas kiel olivaj brancxoj cxirkaux via tablo. ⁴ Jen tiel estas benata tiu homo, Kiu timas la Eternulon. ⁵ Benos vin la Eternulo el Cion, Kaj vi vidos la bonstaton de Jerusalem en la dauxro de via tuta vivo. ⁶ Kaj vi vidos la infanojn de viaj infanoj. Paco al Izrael! ¹²⁹ ¹ Kanto de suprenirado. Multe oni afliktis min de post mia juneco, Diras Izrael, ² Multe oni afliktis min de post mia juneco, Sed oni min ne pereigis. ³ Sur mia dorso plugis plugistoj, Faris siajn sulkojn longaj. ⁴ La Eternulo estas justa; Li dishakis la sxnurojn de la malvirtuloj. ⁵ Hontigxu kaj turnigxu malantauxen CXiuj malamantoj de Cion. ⁶ Ili estu kiel tegmenta herbo, Kiu forvelkas, antaux ol oni gxin elsxiris; ⁷ Per kiu ne plenigas rikoltanto sian manon Nek garbiganto sian baskon. ⁸ Kaj la preterirantoj ne diros: Beno de la Eternulo estu al vi, Ni benas vin per la nomo de la Eternulo. ¹³⁰ ¹ Kanto de suprenirado. El profundo mi vokas Vin, ho Eternulo. ² Mia Sinjoro, auxskultu mian vocxon; Viaj oreloj atentu la vocxon de mia petego. ³ Se vi, ho Eternulo, kalkulus la pekojn, Kiu povus stari, ho mia Sinjoro? ⁴ Sed Vi estas pardonema, Por ke Vi estu respektata. ⁵ Mi esperis al la Eternulo, esperis mia animo, Kaj Lian vorton mi fidis. ⁶ Mia animo atendas mian Sinjoron pli, Ol la gardantoj atendas la matenon, La gardantoj la matenon. ⁷ Izrael fidu la Eternulon; CXar cxe la Eternulo estas favorkoreco Kaj cxe Li estas granda liberigo. ⁸ Kaj Li liberigos Izraelon De cxiuj liaj pekoj. ¹³¹ ¹ Kanto de suprenirado. De David. Ho Eternulo, ne tenas sin alte mia koro, kaj ne levigxas alte miaj okuloj; Kaj mi ne okupas min per aferoj grandaj kaj neatingeblaj por mi. ² Mi trankviligis kaj kvietigis mian animon; Kiel infano formetita for de la mamo de sia patrino, kiel infano demamigita, Tiel estas en mi mia animo. ³ Ho Izrael, fidu la Eternulon, De nun kaj eterne. ¹³² ¹ Kanto de suprenirado. Rememoru, ho Eternulo, Davidon kaj cxiujn liajn suferojn; ² Ke li jxuris al la Eternulo, Kaj donis sanktan promeson al la Potenculo de Jakob: ³ Mi ne eniros en la sxirmejon de mia domo, Mi ne supreniros sur la liton, pretigitan por mi; ⁴ Mi ne donos dormon al miaj okuloj, Nek dormeton al miaj palpebroj, ⁵ GXis mi trovos lokon por la Eternulo, Logxejon por la Potenculo de Jakob. ⁶ Jen ni auxdis, ke gxi estas en Efrata; Ni gxin trovis sur arbara kampo. ⁷ Ni iru en Lian logxejon, Ni klinigxu antaux la benketo de Liaj piedoj. ⁸ Levigxu, ho Eternulo, en Vian ripozejon, Vi kaj la kesto de Via potenco. ⁹ Viaj pastroj vestigxu per justeco, Kaj Viaj fideluloj triumfu. ¹⁰ Pro David, Via sklavo, Ne forturnu la vizagxon de Via sanktoleito. ¹¹ La Eternulo jxuris al David veron, kaj Li ne deklinigxos de gxi: Frukton de via ventro Mi sidigos sur via trono; ¹² Se viaj filoj observos Mian interligon kaj Mian legxon, kiun Mi instruos al ili, Tiam ankaux iliaj filoj eterne sidos sur via trono. ¹³ CXar la Eternulo elektis Cionon, Kaj deziris, ke gxi estu logxejo por Li: ¹⁴ CXi tio estas Mia ripozejo por eterne; CXi tie Mi logxos, cxar gxin Mi ekdeziris. ¹⁵ GXian nutrajxon Mi abunde benos, GXiajn malricxulojn Mi satigos per pano. ¹⁶ Kaj gxiajn pastrojn Mi vestos per savo; Kaj gxiaj fideluloj gxojos kaj triumfos. ¹⁷ Tie Mi elkreskigos kornon al David, Tie Mi arangxos lumilon por Mia sanktoleito. ¹⁸ Liajn malamikojn Mi kovros per honto; Sed sur li brilos lia krono. ¹³³ ¹ Kanto de suprenirado. De David. Jen, kiel bone kaj cxarme estas, Se fratoj vivas kune! ² Kiel la bona oleo, Kiu de la kapo defluas sur la barbon, la barbon de Aaron, Kaj defluas sur la randon de lia vesto; ³ Kiel la roso, Kiu de HXermon mallevigxas sur la montojn de Cion; CXar tie la Eternulo donas la benon, Vivon por eterne. ¹³⁴ ¹ Kanto de suprenirado. Nun benu la Eternulon, cxiuj sklavoj de la Eternulo, Kiuj en la noktoj staras en la domo de la Eternulo. ² Levu la manojn al la sanktejo, Kaj benu la Eternulon. ³ El Cion benu vin la Eternulo, La Kreinto de la cxielo kaj la tero. ¹³⁵ ¹ Haleluja! Gloru la nomon de la Eternulo, Gloru, sklavoj de la Eternulo, ² Kiuj staras en la domo de la Eternulo, En la kortoj de la domo de nia Dio. ³ Gloru la Eternulon, cxar la Eternulo estas bona; Prikantu Lian nomon, cxar gxi estas cxarma. ⁴ CXar Jakobon la Eternulo elektis al Si, Izraelon kiel Sian trezoron. ⁵ CXar mi scias, ke la Eternulo estas granda Kaj ke nia Sinjoro estas super cxiuj dioj. ⁶ CXion, kion la Eternulo deziras, Li faras, En la cxielo kaj sur la tero, sur la maroj kaj en cxiuj abismoj. ⁷ Li levas la nubojn de la randoj de la tero, Li aperigas fulmojn en la pluvo, Li elirigas la venton el Siaj provizejoj. ⁸ Li batis la unuenaskitojn en Egiptujo, De homo gxis bruto. ⁹ Li aperigis signojn kaj miraklojn interne de vi, ho Egiptujo, Super Faraono kaj cxiuj liaj sklavoj. ¹⁰ Li batis multajn popolojn, Kaj mortigis potencajn regxojn: ¹¹ Sihxonon, regxon de la Amoridoj, Kaj Ogon, regxon de Basxan, Kaj cxiujn regnojn Kanaanajn. ¹² Kaj Li donis ilian landon kiel heredon, Heredon al Lia popolo Izrael. ¹³ Ho Eternulo, Via nomo estas eterna; Ho Eternulo, la memoro pri Vi restas por cxiuj generacioj. ¹⁴ CXar la Eternulo jugxos Sian popolon, Kaj Li korfavoros Siajn sklavojn. ¹⁵ La idoloj de la popoloj estas argxento kaj oro, Faritajxo de homaj manoj. ¹⁶ Busxon ili havas, sed ne parolas; Okulojn ili havas, sed ne vidas; ¹⁷ Orelojn ili havas, sed ne auxdas; Kaj ne ekzistas spiro en ilia busxo. ¹⁸ Kiel ili, tiel estos iliaj farantoj, CXiuj, kiuj ilin fidas. ¹⁹ Ho domo de Izrael, benu la Eternulon; Ho domo de Aaron, benu la Eternulon; ²⁰ Ho domo de Levi, benu la Eternulon; Ho timantoj de la Eternulo, benu la Eternulon. ²¹ El Cion estu benata la Eternulo, Kiu logxas en Jerusalem. Haleluja! ¹³⁶ ¹ Gloru la Eternulon, cxar Li estas bona, CXar eterna estas Lia boneco. ² Gloru la Dion de la dioj, CXar eterna estas Lia boneco. ³ Gloru la Sinjoron de la sinjoroj, CXar eterna estas Lia boneco. ⁴ La sola faranto de grandaj mirakloj, CXar eterna estas Lia boneco; ⁵ Kiu sagxege kreis la cxielon, CXar eterna estas Lia boneco; ⁶ Kiu etendis la teron super la akvo, CXar eterna estas Lia boneco; ⁷ Kiu kreis grandajn lumojn, CXar eterna estas Lia boneco; ⁸ La sunon, por regi en la tago, CXar eterna estas Lia boneco; ⁹ La lunon kaj la stelojn, por regi en la nokto, CXar eterna estas Lia boneco; ¹⁰ Kiu batis Egiptujon en gxiaj unuenaskitoj, CXar eterna estas Lia boneco; ¹¹ Kaj elkondukis el gxia mezo Izraelon, CXar eterna estas Lia boneco; ¹² Per forta mano kaj etendita brako, CXar eterna estas Lia boneco; ¹³ Kiu fendis la Rugxan Maron en du partojn, CXar eterna estas Lia boneco; ¹⁴ Kaj trairigis Izraelon tra gxi, CXar eterna estas Lia boneco; ¹⁵ Kaj enjxetis Faraonon kaj lian militistaron en la Rugxan Maron, CXar eterna estas Lia boneco; ¹⁶ Kiu kondukis Sian popolon tra la dezerto, CXar eterna estas Lia boneco; ¹⁷ Kiu batis grandajn regxojn, CXar eterna estas Lia boneco; ¹⁸ Kaj mortigis regxojn potencajn, CXar eterna estas Lia boneco; ¹⁹ Sihxonon, regxon de la Amoridoj, CXar eterna estas Lia boneco; ²⁰ Kaj Ogon, regxon de Basxan, CXar eterna estas Lia boneco; ²¹ Kaj donis ilian landon kiel heredon, CXar eterna estas Lia boneco; ²² Heredon al Lia sklavo Izrael, CXar eterna estas Lia boneco; ²³ Kiu rememoris nin, kiam ni estis humiligitaj, CXar eterna estas Lia boneco; ²⁴ Kaj liberigis nin de niaj premantoj, CXar eterna estas Lia boneco; ²⁵ Kiu donas panon al cxiu karno, CXar eterna estas Lia boneco. ²⁶ Gloru la Dion de la cxielo, CXar eterna estas Lia boneco. ¹³⁷ ¹ Apud la riveroj de Babel Ni sidis kaj ploris, Rememorante Cionon. ² Sur la salikoj tie Ni pendigis niajn harpojn. ³ CXar tie niaj kaptintoj postulis de ni kantojn, Kaj niaj mokantoj gxojon, dirante: Kantu al ni el la kantoj de Cion. ⁴ Kiel ni kantos sur fremda tero La kanton de la Eternulo? ⁵ Se mi forgesos vin, ho Jerusalem, Tiam forgesigxu mia dekstra mano; ⁶ Algluigxu mia lango al mia palato, Se mi vin ne memoros, Se mi ne levos Jerusalemon en la supron de miaj gxojoj. ⁷ Rememorigu, ho Eternulo, al la filoj de Edom La tagon de Jerusalem, kiam ili diris: Detruu, detruu gxis gxia fundamento. ⁸ Ho ruinigema filino de Babel! Bone estos al tiu, Kiu repagos al vi por la faro, kiun vi faris al ni. ⁹ Bone estos al tiu, Kiu prenos kaj frakasos viajn infanetojn sur sxtono. ¹³⁸ ¹ De David. Mi gloras Vin el mia tuta koro; Antaux la dioj mi Vin prikantas. ² Mi klinigxas antaux Via sankta templo, Kaj mi gloras Vian nomon por Via boneco kaj vereco; CXar Vi grandigis pli ol cxio Vian nomon per Via vorto. ³ En la tago, kiam mi vokis, Vi auxskultis min, Vi donis forton al mia animo. ⁴ Gloros Vin, ho Eternulo, cxiuj regxoj de la tero, CXar ili auxdis la vortojn de Via busxo. ⁵ Kaj ili prikantos la vojojn de la Eternulo; CXar granda estas la gloro de la Eternulo. ⁶ CXar kvankam la Eternulo estas alte, tamen Li rigardas humilulon, Kaj fierulon Li rimarkas de malproksime. ⁷ Kvankam mi iras meze de suferoj, tamen Vi konservas mian vivon; Kontraux la kolero de miaj malamikoj Vi etendas Vian brakon, Kaj Via dekstra mano min helpas. ⁸ La Eternulo plenumos por mi. Ho Eternulo, Via boneco estas eterna; La kreitajxojn de Viaj manoj ne forlasu. ¹³⁹ ¹ Al la hxorestro. Psalmo de David. Ho Eternulo, Vi min esploras kaj min konas. ² Vi scias, kiam mi sidas kaj kiam mi levigxas; Vi komprenas mian penson de malproksime. ³ Kiam mi iras kaj kiam mi ripozas, Vi estas cxirkaux mi, Kaj cxiujn miajn vojojn Vi konas. ⁴ CXar antaux ol trovigxas vorto sur mia lango, Jen, ho Eternulo, Vi cxion jam scias. ⁵ De malantauxe kaj de antauxe Vi cxirkauxbaris min Kaj metis sur min Vian manon. ⁶ Mirinda estas por mi tia sciado, tro alta; Mi gxin ne povas kompreni. ⁷ Kien mi iros for de Via spirito? Kaj kien mi kuros for de Via vizagxo? ⁸ Se mi levigxos al la cxielo, Vi estas tie; Se mi kusxigxos en SXeol, jen Vi tie estas. ⁹ CXu mi okupos la flugilojn de la matenrugxo, CXu mi logxigxos sur la rando de la maro: ¹⁰ Ankaux tie Via mano min kondukos, Kaj Via dekstra mano min tenos. ¹¹ Se mi diros:Mallumo min kovros, Kaj la lumo cxirkaux mi farigxos nokto: ¹² Ecx mallumo ne mallumas antaux Vi, Kaj la nokto lumas kiel tago; Mallumo farigxas kiel lumo. ¹³ CXar Vi kreis mian internajxon, Formis min en la ventro de mia patrino. ¹⁴ Mi gloras Vin, cxar mi estas mirinde kreita; Mirindaj estas Viaj kreitajxoj, Kaj mia animo tion bone konscias. ¹⁵ Ne estis kasxitaj antaux Vi miaj ostoj, Kiam mi estis kreata en kasxiteco, Kiam mi estis formata en la profundo de la tero. ¹⁶ Mian embrion vidis Viaj okuloj, Kaj en Via libro estis enskribitaj cxiuj tagoj destinitaj, Kiam ankoraux ecx unu ne ekzistis. ¹⁷ Kiel grandvaloraj estas por mi Viaj pensoj, ho Dio! Kiel granda estas ilia nombro! ¹⁸ Se mi ilin kalkulus, ili estus pli multaj ol la sablo; Kiam mi vekigxas, mi estas ankoraux kun Vi. ¹⁹ Mortigu, ho Dio, la malvirtulojn, Kaj sangaviduloj forigxu de mi! ²⁰ Ili parolas pri Vi malice, Kaj Viaj malamikoj levigxas por trompo. ²¹ Viajn malamantojn, ho Eternulo, mi ja malamas, Kaj Viajn kontrauxulojn mi abomenas. ²² Per ekstrema malamo mi ilin malamas; Ili farigxis por mi malamikoj. ²³ Esploru min, ho Dio, kaj konu mian koron; Provu min kaj sciu miajn pensojn. ²⁴ Kaj rigardu, cxu mi estas sur malbona vojo, Kaj gvidu min sur la vojo de eterneco. ¹⁴⁰ ¹ Al la hxorestro. Psalmo de David. Liberigu min, ho Eternulo, de malbona homo, Gardu min kontraux perfortulo; ² Kontraux tiuj, kiuj elpensas malbonon en la koro, CXiutage kauxzas militojn; ³ Kiuj akrigas sian langon, kiel serpento; Veneno de vipuro estas sub iliaj lipoj. Sela. ⁴ Gardu min, ho Eternulo, kontraux la manoj de malvirtuloj, Gardu min kontraux perfortuloj, Kiuj intencas renversi miajn pasxojn. ⁵ Fieruloj kasxis kaptilon por mi kaj sxnurojn, Ili etendis reton cxe la vojo, implikilon ili metis por mi. Sela. ⁶ Mi diris al la Eternulo:Vi estas mia Dio; Atentu, ho Eternulo, la vocxon de mia petego. ⁷ Ho Eternulo, mia Sinjoro, forto de mia savo, Vi sxirmas mian kapon en la tago de batalo. ⁸ Ne donu, ho Eternulo, al malvirtulo lian deziratajxon, Lian intencon ne efektivigu, ke ili ne fierigxu. Sela. ⁹ La veneno de miaj cxirkauxantoj, La malicajxo de iliaj lipoj kovru ilin. ¹⁰ Falu sur ilin brulantaj karboj; Ili jxetigxu en fajron, En abismojn, ke ili ne levigxu. ¹¹ Kalumnianto ne staros forte sur la tero; Perfortulon la malbono entiros en pereon. ¹² Mi scias, ke la Eternulo defendos la aferon de mizerulo, La rajton de malricxuloj. ¹³ Kaj virtuloj ja gloros Vian nomon; Piuloj restos antaux Via vizagxo. ¹⁴¹ ¹ Psalmo de David. Ho Eternulo, mi vokas al Vi; rapidu al mi; Atentu mian vocxon, kiam mi vokas al Vi. ² Mia pregxo valoru antaux Vi kiel incenso, La levo de miaj manoj kiel vespera oferdono. ³ Metu, ho Eternulo, gardon al mia busxo, Gardu la pordon de miaj lipoj. ⁴ Ne klinu mian koron al io malbona, Al partoprenado en malbonagoj kun malbonaguloj; Mi ne mangxu iliajn bongustajxojn. ⁵ Virtuloj min frapu favorkore kaj punu min: GXi estos oleo por la kapo; Mia kapo ne rifuzos, se estos ecx pli; Kaj mi pregxas cxe iliaj malfelicxoj. ⁶ Disigxis sur roko iliaj jugxantoj, Kaj ili auxdis miajn vortojn, kiel amikaj ili estis. ⁷ Kiel iu plugas kaj dispecigas la teron, Tiel estas disjxetitaj iliaj ostoj gxis la busxo de SXeol. ⁸ CXar al Vi, ho Eternulo, mia Sinjoro, estas direktitaj miaj okuloj; Al Vi mi esperas:ne forpusxu mian animon. ⁹ Gardu min kontraux la reto, kiun oni metis al mi, Kontraux la implikilo de la malbonaguloj. ¹⁰ La malvirtuloj falu en siajn retojn cxiuj, Dum mi preteriros. ¹⁴² ¹ Instruo de David, kiam li estis en la kaverno. Pregxo. Per mia vocxo mi krias al la Eternulo, Per mia vocxo mi pregxas al la Eternulo. ² Mi elversxas antaux Li mian peton, Mian suferon mi al Li rakontas. ³ Kiam senfortigxis en mi mia spirito, tiam Vi sciis mian vojon: Sur la vojo, kiun mi iras, ili kasxis reton por mi. ⁴ Rigardu dekstren kaj vidu:neniu volas min koni; Malaperis rifugxejo por mi, neniu zorgas pri mia animo. ⁵ Mi krias al Vi, ho Eternulo; Mi diras:Vi estas mia rifugxejo, Mia parto en la lando de la vivantoj. ⁶ Atentu mian ploron, cxar mi tre senfortigxis; Savu min de miaj persekutantoj, cxar ili estas pli fortaj ol mi. ⁷ Eligu mian animon el malliberejo, por ke mi gloru Vian nomon. Min cxirkauxos la virtuloj, kiam Vi bonfaros al mi. ¹⁴³ ¹ Psalmo de David. Ho Eternulo, auxskultu mian pregxon, Atentu mian petegon laux Via vereco, Respondu al mi laux Via justeco. ² Kaj ne eniru en jugxon kun Via sklavo, CXar neniu vivanta povos pravigxi antaux Vi. ³ CXar malamiko persekutis mian animon, Premis al la tero mian vivon; Li metis min en mallumon, kiel delonge mortintojn. ⁴ Senfortigxas en mi mia animo, Konsumigxas en mi mia koro. ⁵ Mi rememoras la tagojn antikvajn, Mi meditas pri cxiuj Viaj faroj, Mi pensas pri la faritajxoj de Viaj manoj. ⁶ Mi etendas al Vi miajn manojn; Mia animo soifas Vin kiel seka tero. Sela. ⁷ Rapidu, auxskultu min, ho Eternulo, mia spirito konsumigxas; Ne kasxu antaux mi Vian vizagxon, CXar mi similigxus al la forirantaj en la tombon. ⁸ Auxdigu al mi matene Vian bonecon, CXar Vin mi fidas; Montru al mi la vojon, kiun mi devas iri, CXar al Vi mi levas mian animon. ⁹ Savu min de miaj malamikoj, ho Eternulo; Al Vi mi rifugxas. ¹⁰ Instruu al mi plenumi Vian volon, cxar Vi estas mia Dio; Via bona spirito gvidu min sur ebena tero. ¹¹ Pro Via nomo, ho Eternulo, lasu min vivi; Pro Via justeco eligu mian animon el mizero. ¹² Kaj pro Via favorkoreco ekstermu miajn malamikojn Kaj pereigu cxiujn premantojn de mia animo, CXar mi estas Via sklavo. ¹⁴⁴ ¹ De David. Benata estu la Eternulo, mia Roko, Kiu instruas miajn manojn batali, miajn fingrojn militi: ² Mia bono kaj mia fortikajxo, Mia rifugxejo kaj mia savanto, Mia sxildo, Li, kiun mi fidas, Kiu submetas al mi mian popolon. ³ Ho Eternulo, kio estas homo, ke Vi lin konas, Kaj homido, ke Vi lin atentas? ⁴ Homo estas simila al spireto; Liaj tagoj estas kiel pasanta ombro. ⁵ Ho Eternulo, klinu Vian cxielon kaj iru malsupren; Tusxu la montojn, kaj ili ekfumigxos. ⁶ Ekbriligu fulmon, kaj dispelu ilin; Sendu Viajn sagojn, kaj konfuzu ilin. ⁷ Etendu Vian manon el supre; Liberigu min, kaj savu min el granda akvo, El la mano de fremduloj, ⁸ Kies busxo parolas malverajxon Kaj kies dekstra mano estas mano de trompo. ⁹ Ho Dio, novan kanton mi kantos al Vi, Sur dekkorda psaltero mi muzikos al Vi, ¹⁰ Kiu donas helpon al la regxoj, Kiu savas Sian sklavon David de dangxera glavo. ¹¹ Liberigu min, kaj savu min el la mano de fremduloj, Kies busxo parolas malverajxon Kaj kies dekstra mano estas mano de trompo. ¹² Niaj filoj kiel plantitajxoj kreskas en sia juneco; Niaj filinoj estas kiel skulptitaj kolonoj, ornamoj de palaco; ¹³ Niaj grenejoj estas plenaj, enhavas suficxe da greno de cxiu speco; Niaj sxafoj estas en la nombro de miloj kaj dekmiloj sur niaj pasxtejoj; ¹⁴ Niaj bovoj estas sxargxitaj; Ne ekzistas difekto, ne ekzistas perdo, ne ekzistas ploro sur niaj stratoj; ¹⁵ Felicxa estas la popolo, kiu havas tian staton; Felicxa estas la popolo, kies Dio estas la Eternulo. ¹⁴⁵ ¹ Glorkanto de David. Mi altigos Vin, mia Dio, ho Regxo, Kaj mi benos Vian nomon cxiam kaj eterne. ² CXiutage mi Vin benos, Kaj mi gloros Vian nomon cxiam kaj eterne. ³ Granda estas la Eternulo kaj tre glorinda, Kaj Lia grandeco estas nemezurebla. ⁴ Generacio al generacio lauxdos Viajn farojn Kaj rakontos pri Via potenco. ⁵ Pri la majesto de Via granda gloro Kaj pri Viaj mirindaj faroj mi meditos. ⁶ La forton de Viaj timindajxoj oni priparolos, Kaj Vian grandecon mi rakontos. ⁷ Oni gloros la renomon de Via granda boneco, Kaj oni prikantos Vian justecon. ⁸ Kompatema kaj favorkora estas la Eternulo, Longetolera kaj kun granda boneco. ⁹ La Eternulo estas bona por cxiuj; Lia favorkoreco estas super cxiuj Liaj kreitajxoj. ¹⁰ Gloros Vin, ho Eternulo, cxiuj Viaj kreitajxoj, Kaj Viaj fideluloj Vin benos. ¹¹ Ili raportos pri la gloro de Via regno Kaj parolos pri Via potenco, ¹² Por sciigi al la homidoj Lian potencon Kaj la majestan gloron de Lia regno. ¹³ Via regxeco estas regxeco eterna, Kaj Via regado estas por cxiuj generacioj. ¹⁴ La Eternulo subtenas cxiujn falantojn Kaj restarigas cxiujn kurbigitojn. ¹⁵ CXies okuloj estas turnitaj al Vi, Kaj Vi donas al ili ilian mangxon en gxia tempo. ¹⁶ Vi malfermas Vian manon Kaj satigas favore cxion vivantan. ¹⁷ Justa estas la Eternulo en cxiuj Siaj vojoj Kaj bona en cxiuj Siaj faroj. ¹⁸ Proksima estas la Eternulo por cxiuj, kiuj Lin vokas, Por cxiuj, kiuj vokas Lin sincere. ¹⁹ La deziron de Siaj respektantoj Li plenumas, Kaj ilian krion Li auxdas kaj helpas ilin. ²⁰ La Eternulo gardas cxiujn Sian amantojn, Kaj cxiujn malvirtulojn Li ekstermas. ²¹ La gloron de la Eternulo eldiros mia busxo, Kaj cxiu karno benu Lian sanktan nomon cxiam kaj eterne. ¹⁴⁶ ¹ Haleluja! Gloru, ho mia animo, la Eternulon. ² Mi gloros la Eternulon en la dauxro de mia tuta vivo, Mi kantos al mia Dio tiel longe, kiel mi estos. ³ Ne fidu eminentulojn, Homidon, kiu ne povas helpi. ⁴ Eliras lia spirito, li reiras en sian teron; Kaj en tiu tago neniigxas cxiuj liaj intencoj. ⁵ Bone estas al tiu, kies helpo estas la Dio de Jakob, Kiu esperas al la Eternulo, lia Dio, ⁶ Kiu kreis la cxielon kaj la teron, La maron, kaj cxion, kio estas en ili, Kiu gardas la veron eterne; ⁷ Kiu faras justecon al la prematoj, Donas panon al la malsataj. La Eternulo liberigas la malliberulojn; ⁸ La Eternulo malfermas la okulojn al la blinduloj; La Eternulo restarigas la kurbigitojn; La Eternulo amas la virtulojn; ⁹ La Eternulo gardas la enmigrintojn, Subtenas orfon kaj vidvinon; Sed la vojon de malvirtuloj Li pereigas. ¹⁰ La Eternulo regxas eterne, Via Dio, ho Cion, por cxiuj generacioj. Haleluja! ¹⁴⁷ ¹ Haleluja! CXar estas bone kanti al nia Dio, CXar agrabla estas la glorkantado. ² La Eternulo konstruas Jerusalemon, La elpelitojn de Izrael Li kolektas. ³ Li sanigas la korprematojn Kaj bandagxas iliajn vundojn. ⁴ Li kalkulas la stelojn, Kaj al ili cxiuj Li donas nomojn. ⁵ Granda estas nia Sinjoro kaj tre forta; Lia sagxo estas nemezurebla. ⁶ La Eternulo altigas la humilulojn; Sed la malvirtulojn Li malaltigas gxis la tero. ⁷ Kantu al la Eternulo gloradon, Muziku al nia Dio per harpo. ⁸ Li kovras la cxielon per nuboj, Pretigas por la tero pluvon, Kreskigas sur la montoj herbon. ⁹ Li donas al la bruto gxian nutrajxon, Kaj al la korvidoj, kiuj krias. ¹⁰ Ne la forton de cxevalo Li sxatas; Ne la femuroj de homo al Li placxas: ¹¹ Placxas al la Eternulo Liaj timantoj, Kiuj fidas Lian bonecon. ¹² Lauxdu, ho Jerusalem, la Eternulon; Gloru vian Dion, ho Cion. ¹³ CXar Li fortikigis la riglilojn en viaj pordegoj, Li benis viajn filojn interne de vi. ¹⁴ Li donas pacon al viaj limoj, Li satigas vin per la plej bona el la tritiko. ¹⁵ Li sendas Sian ordonon al la tero; Tre rapide kuras Lia vorto. ¹⁶ Li donas negxon kiel lanon, Li sxutas prujnon kiel cindron. ¹⁷ Li jxetas Sian glacion kiel pecojn; Kiu kontrauxstaros al Lia frosto? ¹⁸ Li sendas Sian vorton, kaj cxio degelas; Li blovas per Sia vento, kaj ekfluas akvo. ¹⁹ Li sciigas al Jakob Sian vorton, Siajn legxojn kaj decidojn al Izrael. ²⁰ Tiel Li ne faras al iu alia popolo; Kaj Liajn decidojn ili ne scias. Haleluja! ¹⁴⁸ ¹ Haleluja! Gloru la Eternulon el la cxielo, Gloru Lin en la alto. ² Gloru Lin, cxiuj Liaj angxeloj; Gloru Lin, cxiuj Liaj militistaroj. ³ Gloru Lin, suno kaj luno; Gloru Lin, cxiuj lumaj steloj. ⁴ Gloru Lin, plej supraj cxieloj, Kaj la akvo, kiu estas super la cxielo. ⁵ Ili gloru la nomon de la Eternulo; CXar Li ordonis, kaj ili kreigxis. ⁶ Kaj Li starigis ilin por cxiam, por eterne; Li donis legxon, kiun ili ne malobeos. ⁷ Gloru la Eternulon el la tero, Marmonstroj kaj cxiuj abismoj; ⁸ Fulmo kaj hajlo, negxo kaj nebulo, Ventego, kiu plenumas Lian vorton; ⁹ Montoj kaj cxiuj montetoj, Fruktoportaj arboj kaj cxiuj cedroj; ¹⁰ Bestoj kaj cxiaj brutoj, Rampajxoj kaj flugilaj birdoj; ¹¹ Regxoj de la tero kaj cxiuj popoloj, Princoj kaj cxiuj jugxantoj sur la tero; ¹² Junuloj kaj junulinoj, Maljunuloj kaj knaboj. ¹³ Ili gloru la nomon de la Eternulo, CXar sole Lia nomo estas alta, Lia majesto estas sur la tero kaj en la cxielo. ¹⁴ Kaj Li altigis la kornon de Sia popolo, La gloron de cxiuj Liaj fideluloj, De la filoj de Izrael, Lia plej proksima popolo. Haleluja! ¹⁴⁹ ¹ Haleluja! Kantu al la Eternulo novan kanton, Lian gloron en la anaro de fideluloj. ² Izrael gxoju pri sia Kreinto, La filoj de Cion gxoju pri sia Regxo. ³ Ili gloru Lian nomon en danco, Per tamburino kaj harpo ili muziku al Li. ⁴ CXar al la Eternulo placxas Lia popolo; Li ornamas humilulojn per savo. ⁵ La fideluloj gxoju en honoro, Kantu gxoje sur siaj kusxejoj. ⁶ Glorado al Dio estas en ilia busxo, Kaj dutrancxa glavo en ilia mano, ⁷ Por fari vengxon super la popoloj, Punkorektadon super la gentoj; ⁸ Por malliberigi iliajn regxojn per cxenoj Kaj iliajn eminentulojn per feraj katenoj; ⁹ Por fari super ili antauxdestinitan jugxon. Tio estas honoro por cxiuj Liaj fideluloj. Haleluja! ¹⁵⁰ ¹ Haleluja! Gloru Dion en Lia sanktejo, Gloru Lin en la firmajxo de Lia forto. ² Gloru Lin por Liaj potencaj faroj, Gloru Lin laux Lia granda majesto. ³ Gloru Lin per sonado de trumpeto, Gloru Lin per psaltero kaj harpo. ⁴ Gloru Lin per tamburino kaj danco, Gloru Lin per kordinstrumentoj kaj fluto. ⁵ Gloru Lin per lauxtaj cimbaloj, Gloru Lin per tintantaj cimbaloj. ⁶ CXio spiranta gloru la Eternulon. Haleluja!