Bible verses about "fruit" | WestSaxon990

¹⁵ [Note: Ðys godspell gebyrað on þære nygoðan wucan ofer pentecosten. A. ] Warniað eow fram leasum witegum. þa cumað to eow on sceapa gegyrelum. ac hig beoð innane reafigende wulfas. ¹⁶ fram hyra wæstmun gë hi under-gytað; Cwyst þu gaderað man wïnberian of þornum oððe fic-æppla of þyrncinum; ¹⁷ Swa ælc göd treow byrþ gode wæstmas & ælc yfel treow byrþ yfele wæstmas. ¹⁸ ne mæg þt gode treow beran yfle wæstmas. ne þt yfele treow gode wæstmas; ¹⁹ Ælc treow þe ne byrð godne wæstm sy hyt forcorfen & on fyr aworpen; ²⁰ Witodlice be hyra wæstmum ge hig oncnawað;

¹ [Note: Ðys god-spel ge-byrað to sancte uitalis mæssan. A. Ego sum uitis uera & pater meus agricola est. A. B. ] [I]c eom soð wïn-eard. & min fæder ys eorð-tilia; ² He deð ælc twig aweg on me þe blæda ne byrð; & he feormað ælc þara þe blæda byrþ þt hyt bere blæda ðe swiðor. ³ Nu ge synt clæne for þære spræce þe ic to eow spræc. ⁴ wuniað on me & ic on eow; Swa twig ne mæg blæda beran him-sylf. buton hit wunige on win-earde. swa ge ne magon eäc buton ge wunion on me; ⁵ Ic eom wïn-eard & ge synt twigu; Se ðe wunað on me & ic on him. se byrð mycle blæda. forðam ge ne magon nan ðing don butan me; ⁶ Gif hwa ne wunað on me. he byð aworpen üt swa twig & for-druwað; & hig gaderiað þa & doð on fÿr. & hig for-byrnaÐ; ⁷ [Note: Ðys god-spel sceal on wodnes-dæg ofer ascensio domini. Si manseritis in me & uerba mea in uobis manserint. A. Si manseritis in me & uerba mea in uobis manserint. quodcunque petieritis fiet uobis. B. ] Gyf ge wuniað on me & mine word wuniað on eow. biddað swa hwæt swa ge wyllon & hyt byð eower; ⁸ On ðam ys min fæder geswutelod þt ge beron mycle blæda & beon mine leorning-cnihtas; ⁹ & ic lufode eow swa fæder lufode me. wuniað on minre lufe; ¹⁰ Gif ge mine bebodu gehealdað ge wuniað on minre lufe; Swa ic geheold mines fæder bebodu. & ic wunige on hys lufe. ¹¹ Ðas þing ic eow sæde þt min gefea sy on eow & eower gefea sy gefulled. ¹² [Note: Ðys gebyrað to þæra apostola mæsse-dagon. Hoc est preceptum meum. A. Hoc est preceptum [meum] ut diligatis inu[icem] sicut dilexi uos. B. ] Ðis ys min bebod. þt ge lufion eow gemænelice swa ic eow lufode; ¹³ Næfð nän man maran lufe þonne ðeos ys. þt hwä sylle his lïf for his freondum; ¹⁴ Ge synt mine frynd gif ge doð þa þing þe ic eow bebeode; ¹⁵ Ne telle ic eow to ðeowan. forþam se ðeowa nat hwæt se hlafor[d] deð; Ic tealde eow to freondum. forþam ic cyðde eow ealle þa þing þe ic gehyrde æt minum fæder; ¹⁶ Ne gecure ge me ac ic geceas eow; & ic sette eow þt ge gan & blæda beron & eowre blæda gelæston. þt fæder sylle eow swa hwæt swa ge biddað on minum naman; ¹⁷ [Note: & þys gebyrað to þæra apostola mæsse-dagon. Hec mando uobis ut diligatis inuicem. A. ] Ðas þing ic eow beode þæt ge lufion eow gemænelice;